平安夜尖東遊

24 DECEMBER 2013(TUE)

上幾年平安夜因為小小豬仲細，所以都係好平安咁係屋企簡簡單單咁過。隨著小小豬開始大個仔，今年平安夜我地終於可以衝出屋企，三口子去夜遊尖東啦~

其實原本今日我地係約左小豬媽同小豬爸嚟我地屋企打邊爐慶祝平安夜，不過因為小豬爸唔舒服，所以活動就取消左。突然間大肥豬就話夜晚帶我地出尖東行吓，等我地感受吓聖誕氣氛。

有得玩我當然係舉腳讚成啦，所以我地三口子黃昏時間就準備出發，先去食個簡單嘅晚餐，之後就向尖東出發啦！

由於已經封路，所以我地係可以係馬路上行。依個攪笑嘅小小豬開頭點都唔肯行，又話係馬路有車、又有紅燈咁，個場面真係好攪笑，不過亦都係我地平日教導有方之故，都係值得開心呀！

最後經大肥豬不停解釋之後，個傻豬仔終於都知道因為今日係節日關係封路，所以都安心地同我地一齊行啦！

我地由彌敦道開始行，沿途都好多人，真係好熱鬧呀~

路過半島酒店，當然又要影吓啦~

之後我地再向文化中心行，沿途好多人唱聖詩又聖誕歌，仲有啲姐姐派糖仔，熱愛唱歌嘅小小豬都不幾開心，聽到識唱嘅歌仔都會跟住唱(不過係好細聲，始終都未太肯於人前表演)~

我地慢慢沿路行去尖東噴水池睇燈飾~

我地好多年冇嚟睇燈飾，不過唔知點解覺得啲燈飾都唔係好靚，款式又唔太特別，最吸引都係鴨仔~

雖然啲燈飾都係一般，不過依度勝在有氣氛，因為在場都有好多教會朋友向我地報佳音，又同我地講祝福，所以都好熱鬧呀！

唔覺唔覺原來我地係今晚都玩左好耐，離開尖東時都已經差唔多十一點，平日已經熟睡嘅小小豬仲不知幾精神，仲唔願返屋企添。

睇今日小小豬嘅表現，相信嚟緊我地可以去多啲夜街啦！

出年平安夜一定要再嚟玩過呀！

============================================

感謝 小肥豬 提供以上資料

小肥豬的網誌: http://kinseymama.mysinablog.com/

============================================