10 SEPTEMBER 2013(TUE) 唔覺唔覺原來又到十號，小小豬又大一個月，已經係三十七個月人仔，即係三歲一個月啦~
之前每個月嘅十號，都總會有小小攪作同小小豬做啲簡單活動記念一吓。不過今日真係都幾忙，加上小小豬又剛剛開學，所有心思都放左係佢返學嘅安排上面。就連我自己都忙都夜晚先記得今日係十號，所以什麼都冇做，平平淡淡咁過左依一日啦！
已經踏入三歲，發覺小小豬比上幾個月，都已經有好多嘢唔同左，識關心身邊人。好似有一次我係廚房洗蝦時，俾一條蝦"SO"拮到指甲皮，痛到我即刻大叫左出嚟！小小豬聽到我大叫就入嚟廚房，我同佢講我整到手痛痛，佢就即刻好溫柔地幫我隻手指按摩，仲叫我小心啲，唔好痛痛！嗰一吓真係冧到我暈左，估唔到小小豬都有溫柔一面呀！
某程度上又開始識表達自己嘅主見，好似有一日放學我地等左好幾班巴士都冇位時，小小豬就主動提意話『不如唔搭巴士，我地搭小巴啦！』聽到嗰一刻我都真係好驚喜，因為小小豬本身講嘢係唔叻，佢可以表達自己所諗嘅解決方法，所以真係好意外呀！
仲有一件事我最開心就係，係適應週第三日，都仍然只係返一小時，不過就唔可以家長陪。我就留左係學校，打算偷偷地睇吓小小豬上堂個情況。點知俾我從遠處偷看佢地去排洗的時候，來回兩次小小豬都係跟著同學仔好乖咁一齊行，嗰一刻都真係有點感觸！因為N班的時候每次離開課室，小小豬都一定係要老師拖到實，完全冇諗過依家可以咁守秩序自己行，唔洗老師跟呀！
雖有小小豬有佢好可愛攪笑嘅一面，但佢嘅扭計功都一樣同步進步中，當扭計百厭起上嚟，真係激到你差唔多暈低。自問我唔係一個EQ好好嘅人，所以對住依個又愛又恨嘅小小豬時，都真係幾傷腦筋。
但無論如何，我都一定盡我能力教好小小豬，希望佢可以做一個乖乖嘅人見人愛好寶寶。
總之就係....我同小小豬都會一齊努力加油啦！
小小豬個FACEBOOK專頁，你今日LIKE左未呀~
![]()
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
