1 JULY 2013(MON)上幾次我地都係去沙灘玩，小小豬都仍然係怕水，所以唔敢落水。
大肥豬話可能沙灘有浪衝上嚟，所以小小豬會驚啲，就建議試吓去游池，改變一吓個環境，睇吓會唔會有唔同。
所以今日我地就去左佐敦谷嬉水池，進行我地正正式式嘅下水禮啦！
講真，我都真係NNNNNNNNNNNNN年冇去過游水，冇著過游衣，之前同小小豬去沙灘玩，我地係冇落過水。不過今次係希望可以令到小小豬唔怕水，所以我都好唔知醜咁著埋游衣陪埋小小豬一齊落水。慶幸就係我十年前買嗰件游衣仲啱身，不過啲肥肉就.....好明顯囉，所以都真係要的起心肝KEEP一KEEP啦！(希望我可以做到啦)
真係未出發先興奮，睇吓小小豬見到個水泡船仔幾開心，仲要企住嚟行添~
真係俾依個小小豬激C呀~
哈哈哈....未出發時就勁興奮，不過一去到嬉水池就打回原形，基本上我地係池邊都坐左成個幾鐘，小小豬表現出極度怕水，我地邊講故事又邊同佢傾計咁，希望可以分散佢注意力，等佢唔怕水。不過依個小小豬都係KEEP住好驚，我地一帶佢行出少少，都已經不停尖叫，真係俾佢激親呀。
原本都以為今日係冇功而回，點知突然間小小豬話想去玩滑梯，所以我地就一齊去玩啦！有得玩就真係唔同啲，來來回回都玩左滑梯幾十次，小小豬都已經唔再驚，就連"SIR"左落水，佢都自己起返身，只係叫我地抺面，之後繼續行去"SIR"啦！
玩嘅時候小小豬都不知幾開心又投入，最衰唔可以影相，冇得影低小小豬個開心玩水LOOK呀！
最後我地玩到清場先走，係走時小小豬仲唔肯走添呀~
![]( "IMG_0836")
因為我同大肥豬都要換衫，所以我地先係池邊幫小小豬換衫先，咁到我地分開更衣室時會方便啲。點知我地換完之後先發現，原來依個游池係有一個家庭式更衣室。下次我地可以一齊入更衣室去換衫啦~
![]( "IMG_0840")
今日我都真係覺得小小豬有好大進步，起碼已經唔驚水，可以自己係池度行嚟行去，又好ENJOY咁玩。
慢慢嚟啦....我地會KEEP住多啲嚟玩水，咁小小豬應該就唔再驚，到時就可以開始教佢游水啦！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
