13 NOVEMBER 2010 (SAT)
自上次帶小小豬去過香港公園之後，都冇再去過街街。上幾個星期因為天氣唔隱定，所以唔敢帶小小豬去街，怕佢仲細細個易凍親。
依家都已經三個月人仔，加上見今日有太陽又唔大風，所以就有得去街街。我見海港城都已經有啲聖誕佈置，所以就近近地出尖沙咀行吓啦！
係我地行去海港城前，路過鐘樓位置，大肥豬就建議係度休息一吓，順便影吓鐘樓。可能小小豬剛剛瞓醒，所以都唔算太精靈，都唔係好識笑，不過佢肯有幾張望住鏡頭影都算好啦~
影完鐘樓就再去海港城影聖誕佈置，不過小小豬唔知係唔係鐘意望人，佢成日都周圍望，唔肯俾個正面樣我地影，好辛苦先叫做有幾張相見得吓人呀~
不過我最嬲就係竟然當大肥豬同佢影時，可以影到咁靚，又望鏡頭之餘仲整個個攪笑樣，真係嬲嬲地呀...哈哈~
其實我都知小小豬咁細個又點識得望鏡頭，只不過是撞啱個位置咁先會有張靚相，不過我都覺得小小豬對鏡頭幾敏感，唔知係唔係我胎教嘅成效呢...哈哈哈！
係我地影完相嘅時候，見小小豬片片有啲濕，所以就入去海港城個BABY CARE換片片，嗰度真係勁大勁乾淨，仲分左飲奶奶區同換片片區，又有整清潔同消毒用品俾我地用，真係唔錯，下次再出尖沙咀都記住有依個好地方呀！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
