尋日同小豬媽去睇新ANNA SUI香水時,講講吓就又再提起最鐘意嘅香水味就係~~爽身粉味。點知小豬媽就係度笑我,話不如買支爽身粉塗仲好啦!真係俾佢笑死!
其實我都係因為好耐之前嗅個一個舊同事噴過爽身粉味之外,就愛上左依種味,不過都找左好多年都買唔到,都放棄左啦!係尋日講開先提番。我鐘意嗰種味,係因為感覺上塗左之後就好似BB,個人都好似年輕晒,仲好似可愛咁嘛!
等左咁耐,今日我終於都擁有到啦!
事緣就係今日小豬媽出左銅鑼灣整野時,行過一間商場見到入面有一間以自助形式香水鋪,仲可以自已調味。咁佢就貪得意入去八卦吓啦!
首先小豬媽係睇佢嘅至愛茉莉花味,竟然有哦,咁佢當然唔放過買左啦(因為小豬媽都係找左好耐都找唔到呀!)之後一問之吓,原來佢地都有爽身粉味香水,小豬媽話記得我想要,所以佢就買左一支細嘅俾我啦!
一返到屋企就即刻試塗,真係好正呀,好有BB FEEL呀!哈哈~
支香水因為冇酒精成份,所以可以KEEP耐D,同埋係以滾珠形式,好似冇咁浪費呀!真係好正呀!
除左依D味之外,小豬媽話仲有好多古怪味,好似水味、草味、生果味....等等,真你幾攪笑咁,等我找日都上去八卦吓先得!
PS:見咁多位朋友仔想知係邊,我問左小豬媽啦!個地址係銅鑼灣地帶二樓,仙蹟岩對面。有時間去睇吓啦!
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================