0

昆明。金馬碧雞坊﹑建新園

平凡人 於 2014-09-04 01:00:23 發表  |  累積瀏覽 1430

分類:長線旅遊 餐廳 特色景點 古蹟 ;地區:中國

< 雲南大理﹑昆明6天遊 >


第一天(續)

東風路算係昆明市中心,一出來就人多車多;今晚好夜先上火車,冇理由一早就去火車站等車掛?所以就去市區行行,希望可以hea到夠鐘先去火車站


昆明仲有好多地方都起緊地鐵,相信過多幾年文通一定更方便


沿東風路向南屏街方向走


跨過盤龍江繼續向前走;成個天都係雲冇太陽曬,舒服好多!之前又曬又熱行得好辛苦,而家冇太陽清涼晒


紫色呢棵係咩樹黎架?又紫又大棵,昆明好多地方都可以見到


一路行一路有一種熟悉感覺,呢道三年前已經來過,三年黎變化唔大,一樣係咁多高樓大廈人多車多,如果要講有咩變左,我諗就係天氣啦,上次係冬天來到天氣又凍又舒服,今次溫度尚算可以接受,如果遲一個月去昆明就大鑊啦,去到四十幾度仲熱過去沙漠!




又再次去到南屏街,呢道啲大商場我就唔岩行架啦,但都有間家樂福算係岩我既,賣既野又平又多選擇,可以入去hea下補充糧水


德克士仲係道bor,當年曾經係呢間德克士hea過一段時間,對佢好有感情^^不過經常都比朋友話我食快餐,今次唔食就唔會有機會比人話啦,哈哈


轉向正義路向北走,以前又係黎過呢道,環境算係好熟,冇野做就隨便閒逛下;對我黎講昆明真係好悶,係市區都冇野好做,但又唔夠時間去遠少少既地方,所以只可以好似上次咁行來行去


轉入景星街,呢道亦都俗稱「昆明老街」,原來呢道又係黎過,早知就唔過來啦;所謂昆明老街就係呢兩行小攤檔,諗黎諗去都同「老」拉唔上關係囉,只係一啲賣遊客野既地方,唔黎都冇捐失






行行下竟然見到間「建新園」!佢係昆明其中一間最出名既米線店!原本計劃夜晚都會食佢架啦,冇諗過咁快可以遇到!係又肚餓又攰又無聊之下完全抵擋唔到建新園既誘惑,自自然然就走左入去!唔好睇佢咁舊地方又唔靚,佢真係好好食架!


過橋米線有平有貴,視乎餸菜多少由18蚊到60蚊都有,而我純粹想過下米線癮又唔係想食餸,當然係食最平既18蚊「傳統過橋米線」啦(其實係我呢啲窮人冇錢食貴野就真)


揀個靚位坐低,交張收據比職員之後就可以慢慢坐定定等食啦;呢間建新園設計比較舊,冇新開既分店咁靚,但我覺得呢道比起新既更加好feel,話晒都係百年老字號,有返少少原始感覺睇落去更有味道,唔食得都睇得ma


雖然係最平既過橋米線,不過已經可以享受專人送米線服務,只要乖乖地坐係道等食就有人送上米線;如果係買小鍋米線或其他米線,就要自己行去廚房拎啦(18蚊就可以做大爺?哈哈)


首先來既係一碗熱辣辣米線,望落咁靚一定好好食啦


之後就係凍冰冰既配料




最後最重要既湯底黎左啦,可以開始我既米線大餐




經過三年幾時間,終於可以再次品嚐過橋米線
今次我醒目啦,識得落配料既先後次序,先落生既肉再落菜,最後再放米線入湯,一碗正宗過橋米線完成;我曾經有諗過放啲生肉落去會唔會唔熟架?不過隻碗真係好熱我相佢咩都淥得熟!職員送碗湯來個時已經提醒我碗湯好熱千奇唔好掂!


平時我好少咁詳細話一樣野好食,不過呢碗米線真係太太太好食啦!今次我係雲南應該食過三次過橋米線,最好食一定係呢碗!首先只係米線已經嬴晒香港我食過既任何一間米線店,米線又彈牙又好食,香港個啲軟林林米線邊有得比!唔只建新園,雲南普遍既米線都係比較彈牙好食,好食過香港好多;除左米線之外湯底都係重點,呢道既湯底真係太好味啦,唔知點形容,好好味既雞湯底再加少少胡椒味,令到人越食越想食,我未食過咁正既米線架!


品嚐完一碗美味過橋米線後非常滿足,休息左好耐先離開;再次去到正義路,又係一個熟悉既地方;時間已經六點半,太陽伯伯好似仲未想收工,依然陽光普照,不過呢種陽光比起下午舒服好多啦,曬住都唔覺得熱






當年我就係呢間KFC享受豆漿加油炸鬼早餐;舊地重遊,態度﹑想法同以前已經唔同晒啦,我都好耐好耐冇食KFC lu


行行下就去到光華街


成條街都係舊樓,睇落應該有好多年歷史,莫非呢道就係真正既昆明老街






睇落真係好舊,但應該仲有人居住,見到有啲衫晒左出來






路過抗戰勝利堂,時間唔早已經關左門啦


沿市府東街去返景星街,見到好多人係道擦石頭,當時我都唔知佢地係道做咩,後來聽一位對玉石相熟既朋友講,呢啲就係傳說中既賭石!話明係賭石,就係賭石頭入面有啲咩,情況就好似買六合彩一樣,擦開石頭一係中一係唔中,當然唔中既機會大好多好多啦,一舊大既石頭擦出來如果係靚既翡翠隨時可以賣過千萬,所以呢個
石 頭遊戲就好似賭錢一樣,好多人都希望可以以少搏大;講到明呢個係賭錢遊戲,所以同賭錢一樣係十賭九輸,見到有人因賭石發達既同時,又有幾多人因賭石而家破人亡?朋友亦都題醒我呢啲街頭賭石有可能已經比人做左手腳,靜靜雞「開窗」睇下裡面有咩先拎出來賣比人,靚個啲一早已經抽起晒唔會比人見到,而普通人亦都 極難發現石頭已經做過手腳,所以玩呢啲賭石玩下無妨,千其唔好有任何期望可以擦到粒靚翡翠出來




一條全都係攤檔既商業街唔知可以有幾原味




冇咩特別野行,行返出去就走人啦




睇下去邊道好先


其實都冇邊道好去,見步行步啦,正義路上又見到有個牌坊就上前望望;不過呢個地方令人有少少不安,天色開始暗,四方八面不段有人行來行去,又有好多乞丐係廣場之上,直覺話比我知此地不宜久留,影完張相即刻收好部電話走人


牌坊之後又有多個牌坊,路中兩旁有好多幫人按摩既小攤檔,我唔理咁多啦快速穿過佢地之中


直 行好快就去到昆明最後一個「景點」「金馬碧雞坊」;金馬碧雞坊係明朝宣德年間已經存在,數數手指佢咪有成六百年歷史?唔怪得金馬碧雞坊已經成為昆明既象 徵;傳說金馬碧雞坊有一個「金碧交輝」奇景,金馬碧雞兩個牌坊倒影會互相重疊,不過六十年先一次唔知邊個咁好彩可以見到呢


金馬




碧雞




金馬碧雞坊吸引好多遊人影相留念,同時亦吸引左好多人係廣場之上搵食!如果想影一張正正常常既金馬碧雞坊相係好有難度,因為係影相同時,廣場上好多「公仔人」永遠都會係你相機前出現,出現都算,仲會撲去你相機面前,又唔知自己樣衰!心諗好心佢係扮小丑扮卡通就扮得專業小小啦,整到鬼咁樣衰見到都想嘔,我幾鐘意喜羊羊都頂唔順呢隻「羊」!一個正正經經既廣場就係咁比人污染晒!!


廣場之後有好多餐廳選擇,有我當年至愛德克士


有間好大既老滇味米線店(見呢間評語一般)


仲有又新又靚既建新園;原本諗住夜晚來到呢道先食米線架,但頭先已經食左咁就唔再食lu;呢間建新園睇落新淨好多,又大又光孟,頭先食個間就同對較落後,不過食傳統既野緊係襯返一個傳統既環境先至夠味道,呢道就冇個種地道既feel啦


呢間建新園咁新我仲以為價錢都會貴啲,原來又唔係bor,價錢同之前食個間一樣


昆明街頭有好多小食,最多一定係炸薯仔,其次就係呢種魷魚




天色已經全黑,再次影低金馬碧雞坊;金馬碧雞坊高12米闊18米




穿過金馬望向碧雞


再穿過碧雞望向金馬;我又真係幾無聊,兩個牌坊玩到冇得好玩


見到咁多人坐係廣埸邊,我又住埋一份,行左成日已經攰攰地;而家先係8:45,火車仲有成三個鐘先開,又係一個漫長等待


坐低靜靜望住人來人住既廣場,看似雜亂,其實好安全;旁邊就有武警站崗,廣場附近亦都有好多武警巡邏,唔只廣場,昆明只要係多人既地方就會有好多武警看守,比起以前睇落更安全


望住月亮等,不斷等...平時呢個時間係屋企睇緊電視,今日就只可以一個人戇居居望住月亮,正宗有自唔在攞苦黎辛


大約九點,係時候回程啦


去返南屏街,路過之前我話要買黃牛飛既戲院,而家好似冇人炒黃牛啦?順路去家樂福買定幾枝水,之後直衝返去東風廣埸地鐵站


由南屏街去火車站距離大約三公里,坐巴士都好快到,行去搭地鐵其實仲更遠更唔方便,不過我又懶等車所以走左去坐地鐵,結果一陣落車就大獲啦!去昆明火車站真係千其唔好搭地鐵,由其係夜晚更加唔好搭!坐巴士會好100倍!去到就會後悔莫及!


東風廣埸站將來好似係一個轉車站,大堂比起一般地鐵站都大


好快就有車到啦;昆明地鐵好似好密?又會次次都唔洗點等車


晚上既地鐵乘客更少


三個站就返到昆明火車站;我都知道由地鐵站行去火車站要兜一個大圈,今日都行過我相信識行既,只係冇諗過出面環境日頭同夜晚差好遠




見到A出口寫住去昆明火車站,照道理就係呢個出口啦,咁就搭電梯上去;但一上到去出面黑媽媽咩都見唔到,只知道前面係一大片冇路燈既平地,仲有好多個煩到爆既電單車伕,見到咁既情況都係落返去地鐵站冷靜一下!問左地鐵站職員,佢好好人咁解釋去火車站係由A出口出,向前行200米再轉右落隧道,過左隧道再轉右向前行就係火車站,講起來好似有少少複雜,簡單啲講就係直行轉右直行轉右再直行;路線就知道啦,不過出面咁黑點算好?我諗到有幾個方法去火車站:
1.依照職員提供路線衝過去<-
-咩住咁多野又跑唔快,比人打劫點算
2.搭返去前一個站落車再行/搭巴士過去<--都算係一個可行方法,但有少少戇居
3.比10蚊地錢站口既電單車車去<--10蚊唔好貴啲!加上黑媽媽搭佢感覺更唔安全
諗來諗去都唔知點好,為安全起建我傾向用第二個方法,見仲有好多時間可以再慢慢諗一下;正當仲諗緊既時候,有幾個拎住行李既人出閘走向A出口,睇佢地個樣都似係去火車站,我都係唔理咁多啦跟住佢地行出去啦


一路要擺脫啲拉客電單車(唔知點解個個唔跟係要追住我...),行左一百米終於去到呢個有路燈既地方,順便問下其他人係唔係去緊火車站,我果然冇估錯大家都係去火車站!有多幾個同伴都安心啲,一路跟住佢地尾


去到隧道位置啦,估唔到條隧道係咁既樣,同幻想中既隧道有好大分別,自已一個人真係唔敢行落去...有位朋友話呢道似鬼屋,唔講唔覺一講又真係幾似!


上面就係火車路軌,因為火車站有好多路軌所以隧道都好長;穿過隧道就由火車站南面去到北面


行完隧道出來係一塊冇街燈既爛地,黑到路都睇唔到,大家要開電筒出來照路(相中間黑色地方大約30米遠就係隧道出口,係黑到完全睇唔到)


轉右沿馬路向前行五分鐘就正式去到火車站廣場!如果搭巴士來火車站就可以係呢邊落車,唔洗好似地鐵咁走來走去,方便好多;其實頭先地鐵站出口旁邊就係火車站,不過火車站南入口冇開放,大家都要兜大圈走到北面入口入站


好多人排隧做保安檢查


正式進入火車站大樓要再做多次保安檢查同檢查證件,呢道保安程度比起其他火車站嚴格好多,而且四周圍都有好多持槍警察巡邏


過左重重檢查終於入到來啦


入到火車站就係條購物街,第一次見到火車站有啲咁得意既野




穿過購物街就去到候車大堂,大堂有一個地方好多人圍住,原來有免費影相服務;影免費相當然要付出代價啦,就係會被不停sell你買記念品,我就唔去影lu


好多人已經坐定定等車啦,火車仲有個幾鐘先開呢


係座位對出竟然有間德克士!咁岩今日早食晚餐開始有少少餓,成個大堂就得德克士一間餐廳唔通要食佢??!


好彩仲有最後一個脹卜卜雪芳蛋糕,就當係今晚宵夜啦


等左一陣,竟然可以提早45分鐘上車,咁就快啲排好隊,要早啲上車霸個靚位先


火車由昆明開出,不停站直到大理


上車就快手放個背囊上行李架;今次係坐硬臥車箱,理論上行李架應該唔易full,不過自從試過因為搶唔到行李架而要攬住個大背囊幾個鐘之後,而家都係放好行李先算


上車後同其他乘客處理一下換位問題,又傾下計,唔經唔覺火車好快就開出啦;K9366火車係11:20準時開出,開車後乘務員就話要熄燈叫我地去訓教啦; 今次我專登買上鋪,係12306試左幾次先成功出到張上鋪車票,上鋪岩晒夜晚訓教,就算下面有人行來行去都唔易受影響,而且對住冷氣位好舒服架


第二天

過左舒服既一晚,第二朝大約六點半就去到大理啦,大家都準備好落車迎接有「風花雪月」稱號既大理


火車準時到達


來到大理呢個咁吸引既地方,相信呢道每一個人都對大理有好多唔同既期望,而我就好簡單,只係想睇下靚景,影下相,hea下就已經好開心啦




大理我黎到啦




鐘意SeeWide的分享,給我們一個Like吧!
  • 攻略日期:N/A
    攻略地點:中國
  • 攻略時間:1日以上
    是次消費:N/A
0人比"掂"
  • 1874飛飛 於2014-09-04 08:33:01 留言
    建新園OK 架, 我都吃過幾次。你講條隧道真係嚇人, 獨行要特別小心, 其實火車站附近不少人找機會打遊客主意, 好彩你見到幾個人
  • 舉報 回覆
  • No.1
  • 特搜總編E 於2014-09-04 14:56:28 留言
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
  • 舉報 回覆
  • No.2
  • 平凡人 於2014-09-05 02:49:34 留言
    原文由 1874飛飛 於 2014-09-04 08:33:01 發表
    建新園OK 架, 我都吃過幾次。你講條隧道真係嚇人, 獨行要特別小心, 其實火車站附近不少人找機會打遊客主意, 好彩你見到幾個人
    建新園真係好好食,我好喜歡呢個味道
    如果得我自己一個人真係唔敢行個道,太可怕啦,最多坐返車去正門個邊...火車站附近人多比較雜,我會打醒十二分精神,感謝你既提醒
  • 舉報 回覆
  • No.3
  • 平凡人 於2014-09-05 02:50:27 留言
    原文由 特搜總編E 於 2014-09-04 14:56:28 發表
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
    Thanks
  • 舉報 回覆
  • No.4

最多能輸入300字

累積瀏覽 112279

全部攻略 126

全部回應 1394