幼稚園 - 定案

由敗家媽媽於 2013-03-11 00:00:00 發表 | 累積瀏覽 1356

分類：

今日卒之出post 講返小齊來年幼稚園K1 o既去向,

睇返日子, 由出第一篇interview post (見前文) 起, 到今日收埋最後一封信, 成5個月時間先close file~

其實又唔算好辛苦, 都係填下表同埋去interview 要時間囉

中間有過緊張o既時候, 不過都係少少啫, 敗家媽媽都叫比較理智, 勝固欣然敗亦喜~ 淡然處之~ 幼稚園啫, 唔駛咁大壓力o既~

total 報左12間, 村校, 名幼, 龍校都有, 我地去左10 間, 成績一般啦, 4 offer, 3 waiting, 3 reject, waiting 同reject o係我心目中冇大分別, 只係覺得出waiting 唔出reject o既學校厚道o的咁解。成功率40%, 媽媽收貨了~ 其中覺得同龍校冇乜緣, 撞左我地去旅行不戰而降, 另外兩間interview時間又一般, 老師趕收工咁~

面試咁多間總有d o野分享下, 所以今篇係歸納分享文, (只代表本人意見, 不代表學校立場) , 大家睇完得啖笑~

背景資料:

i. 舊年有同阿女報N 班, 有offer冇要到, 因覺得玩比返N班似乎更重要, 所以阿女只返pg, 冇讀N班, 今次報K1係冇任何BACK UP o既情況;

ii. 所有interview (以我所見, 我睇唔到果d唔知) 阿女都係有反應, 有greetings, 有問有答正常發揮, 叫唱歌有唱歌, 叫砌puzzle有砌到/有嘗試砌果隻;

iii. 阿女係獨女, 冇阿哥家姐讀名校, 冇宗教信仰

1. 冇back up o既話, 報雙位數字o既學校 -- 係合理 ~ 一d 都唔誇張, 因為你總要預"撞期", "撞時間", "病", "扭計" 等外圍因素影響表現; 同埋, 你知唔知而家d 學校幾多人報先 ?

2. 報k1 同n 班策略唔同, k1 唔駛o徒時間報有n班直升o既幼稚園, 得返幾多位比街外人爭自己計下數先, 有信心幾千人中突圍者又或時間特多者除外;

3. reject 過你一次o既學校, 多數會reject 你第2次, n班時比offer 你o既學校, 多數k1會再比offer你, 道理真係同男女兩情相悅情況一樣, 鐘意你就鐘意你, 唔鐘意你你死纏爛打都冇用o既~ 以上理論同今年o既結果好吻合, 上年收offer今年一樣有offer, 上年收waiting今年一樣收waiting~

4. 唔好一味只報名幼, 第一階段 (10月至12月) 最好已有一間半間offer o係手, 一鳥在手好過二鳥於林, 經常見到d家長o係網上呻all waiting/reject, 好徬徨, 所以back up真係唔可以冇, 當你已經有一個半個offer o係手時, 講o野都氣定神閒o的, 呵呵呵, 學校唔係只問小朋友的, 家長o既風度都好重要~

5. 衣著得宜, 太靚太hea都不適宜, 大大個頭卡通人物衫又或者冒牌貨都最好避免啦, 真的, 斯文就好 (大人細路同樣適用);

6. 面試唔係校際時事問答比賽, 家長唔駛"搶答", 小朋友唔識答/ 未識講o野都好, 老師問問題可能只係想睇下"反應", 反應包括眼望/手指/口up up唔知講乜, 但家長一搶答就即係搶左小朋友個機會, 戒之哉戒之哉~

7. 收waiting 想寫求位信 (係求位信, 唔係求情信, 而家犯左事咩?!) 我個人neutral, 但我今年冇寫, 想寫o既話, 寫好喇, 唔好抄呀~

8. 你揀am 但話pm都會考慮你只會得到pm, 除非你揀果間學校根本am 都收唔足人啦;

9. 實戰心得: (以下係綜合自己經驗加三姑六婆處o既hearsay)

a. 九龍塘蝦餃名幼: 聽我講, 除非你小朋友仲未識講o野, 否則報用英文考; 有樣o野幾想講, 就係考砌puzzle ok o既, 不過可唔可以改善下, 搵d 真puzzle 而唔係一張卡紙過膠再剪成4個正方形冇入"荀"位, 加個圖案係手畫仲要係萍果(即係切成4張都係一樣樣咁呢?), 仲有拎本故事書考對答我覺得果個位都幾搞笑, 打開本書指住一個男仔問: "呢個係邊個?" 係咪IQ 題? 冇上文下理我都真係唔知佢係邊個, 如果我答男仔又唔係好對題? 但我又真係唔知佢係邊個? 大文? 小強? PETER? interview 就係問呢d咖喇, 小朋友執生喇~

b. 九龍塘跟得完: 練定首飲歌唔該, 小朋友唔肯唱, 大人可幫手"領唱", 鼓勵下佢唱, 仲有, 唱一句都係唱, 另外家長切忌提水, 老師會問家長o野就係唔想家長插咀, 多謝前輩媽媽小橙子媽媽post 文比埋參考答案, 所以家長真係要做下功課呢;

c. 九龍區龍校x 2: 填問卷比d心機, 言之有物而意猶未盡者, 加紙亦可, 交表又要親身噃;

d. 九龍塘學卷名幼: 阿女有問有答砌好puzzle, 面試表現上佳, 正當自信滿滿之際收reject, 死因不明~

e. 某新晉英普名幼: 要見3 關, 成個鐘咁滯, 瞓夠食飽至為重要, 本身幾鍾意呢間學校, 不過佢封waiting 信寫得好傷人哦

f. 港島天主教女龍校: 小朋友自己顧自己, 訓練獨立, 忌遲到(會入遲到房), 搵媽媽同喊你估有冇機, 人地幾千人揀~ 媽媽們做下功課啦, 有男仔媽媽考到都唔知小學係女校, 真救命!!

g. 九龍區半山女龍校: 又發布會, 又1st in又2nd in, 真係未收你已消耗你唔少假期;

h. 九龍塘多元智能名幼: 車輪式收生, 所以有人話佢係人都收, 但其實除非你係一個星期內收到信, 否則其實你只係學校o既"後補位", 不過人地冇o黎到先2輪收生, 但作為back up我個人認為相當唔錯, 裝備考小一o既軟硬件一流~

結語: 面試幾分鐘, 收佢唔收你莫問原因, 你唔會知道點解, 純運氣 ? 我唔認為, 只不過背後原因你唔知啫, 做家長唔駛諗太多, 擔心o既報多幾間就好~

講左咁耐, 媽媽o係幾個offer 之中揀左根德園, 小齊o黎緊8月會成為根德女, am class~ o黎緊到8月之前媽媽有個挑戰就係如何同小齊戒絕尿片呢 ?

============================================

感謝敗家媽媽提供以上資料

敗家媽媽的網誌: http://buyjiamama.blogspot.hk/

============================================

鐘意SeeWide的分享，給我們一個Like吧！