過咗無幾耐,我個死黨朋友又建議由錦田踩落元朗，過屏山，右轉入屏廈路，經過廈村，直入流浮山。到達流浮山之後，沿住上下白泥，稔灣，爛角咀，可以一路踩去龍鼓灘，踏石角，中電發電廠，跟住到望后石難民營，然後取道蝴蝶彎路出番屯門，再沿住單車路穿過元朗，咁就可以踩返錦田。
正!我呢個朋友嘅提議認真有建設性，呢條路線又真係幾新鮮喎!但我哋當時無諗過,究竟條路通定唔通? ![]( "(thinking)")
事不宜遲，我哋即刻由錦田出發,沿途你追我逐,過咗元朗市中心,眨吓眼去到屏山,跟住直趨流浮山,左轉入上白泥，沿途風景同大欖涌水塘截然不同，白泥分上白泥同下白泥兩笪地方,最出名係日落景色。![]()
![]()
嗰陣時有齣電視劇叫大地恩情，好多鏡頭都係喺嗰度取景。嗰度啲村民除咗出海攞漁之外，就係養鴨，所以我哋沿途見到唔少嘅鴨場。一路踩一路迎住由后海水彎吹過嚟嘅微風，認真舒服。
![]()
我哋冇幾耐就過咗下白泥，正想由稔彎兜番出爛角咀，點知嗰處係掘頭路，前面有個山擋住。![]()
咁點搞![]()
？唔通踩返轉頭？我個朋友話無咁衰仔嘅，點可以踩返轉頭咁失威![]()
！佢話前呢嗰個山應該係《青山》，如果冇估錯，個山後面就係龍鼓灘，我哋可以沿住啲黃泥路踩上個山度，眨吓眼就爬過個山喇！又有道理，羅文話齋:小小苦楚等於激勵!我哋一於勇往直前,無有怕。
我哋沿住山路一直向上踩，啲路愈嚟愈崎嶇不平，加上係斜路，我哋雖然踩到攤攤腰，但又唔衰得，大家係度死頂![]()
，話冇問題，照去！![]()
接近山頂嘅時候，前面已經冇路可踩，我哋又唔甘心踩返轉頭，唯有將架單車托上山，之後發覺托架單車上山係好辛苦嘅，我哋曾經想返轉頭，但望返轉頭先至發覺條路好斜，根本無可能將架單車托番落山，呢次真係斃傢伙![]()
，進退兩難，喺嗰個時候先至知道乜嘢叫做上山容易落山難。
望上山頂見到前面有幾舊大石擋住條路，我哋冇可能一邊托住架單車，一邊爬過舊大石。我哋都唔知點收科同埋有少少後悔踩上山。我哋無計可施![]()
，唯有一個爬高啲，然後兩個將啲單車托起，再逐架傳上去，雖然距離山頂只有十幾呎，但我哋足足用咗成二十分鐘先至將啲單車全部傳晒上山頂。呢次真係成身散晒，最後我哋幾個攤晒喺山頂度呌氣。
突然間聽到一把聲音問我哋喺邊度嚟？嚇咗我哋一跳，明明個山頂得我哋幾個，點解會有聲呢？睇清楚，原來有三個著咗迷彩軍服嘅《穿山甲》部隊，![]()
佢哋喺度執行緊反偷渡工作，佢哋用墨綠色嘅繩網，扎咗個營喺叢林側邊作掩飾。如果唔留心啲睇![]()
，以為係一堆爛草添。我哋話：阿蛇，我哋係喺白泥嗰邊爬山過嚟嘅。佢哋話：你哋都得囉，嗰邊冇路上山個喎！咁都可以托住架單車上到嚟山頂？真係唔知班差人讚定笑我哋。佢哋跟住話：呢度好多偷渡客，因住俾人老笠，重有，落山條路好斜，開頭嗰段最好推車，唔好踩落去，如果唔係，分分鐘撻死冇命賠 ！
班差人講得冇錯，條路真係斜夾窄，我哋唯有慢慢推落山，去到較為平啲嘅地方先至上番車，然後沿住蝴蝶彎踩番出屯門，![]()
再經過洪水橋，元朗，跟住踩返錦田。見過鬼怕黑![]()
，自此以後，我哋都唔再敢再踩上青山。
我哋喺踩單車期間，經歷過好多驚險鏡頭，其中有次個朋友喺大霧山翻車，我哋以為佢嗰次真係唔死都一身潺，結果好好彩，剩係啲衫褲擦爛咗，同埋擦損咗啲手手腳腳，個人冇乜大礙，可以話不幸中之大幸。我哋又試過踩上屯門公路，發覺條公路係分開幾笪地方同時施工，然後再用預先做好嘅路面接駁。我哋偷偷踩上其中一段飛車，點知俾啲工人發覺，追住我哋喊打喊殺![]()
。我哋都好鬼招積,重同啲工人講:吹咩!嚟捉我哋呀!跟住踩住架單車飛返落青山公路。我哋算唔算係單車發燒友呢?你哋話喇!我哋一得閒就踩,直至幾年後我考到車牌，先至將踩單車畫上句號。
（完）
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
