北歐之旅小感~

(擺另一張丹麥新港的相做此篇的"cover"相~)

先說對此行的感受~~ "去北歐"其實是自己其中一個小小的夢想, 小時候睇過北歐的介紹或者紀錄片, 知道芬蘭是千湖之國, 是聖誕老人的"故鄉", 可以去到北極圈, 北歐有得睇北極光、北極熊等等, 加上天氣冷才可以去, 而且價錢不菲, 所以從小都好嚮往~~

最初都想了好久, 因為自己選了報團, 好明顯比自由行貴, 而且自己係從未試過於冬天去旅行, 未試過身處嚴寒, 所以都考慮了一段時間......想來想去, 都係覺得既然此時有機會 (尚算後生, 應該可以捱吓, 加上有點可用的錢), 不但去看歐洲的風景, 更有機會看罕見的北極光, 就"去馬"啦~~~ 其實報完之後再找資料的時候, 都知道北極光不是想看就有, 但行程其他活動, 例如破冰船、去聖誕老人村等等, 都是有趣而特別的活動, 亦都未試過, 就算唔好彩冇北極光, 豐富的行程都可以補數, 所以都有哂心理準備~~

最後總算順利地完成了, 最難忘的當然是看到北極光 (還有彩虹、小雪同大雪都試過~~), 坐了破冰船同在冰海上行/浮水都是難忘的體驗, 第一次體會零下10、20度的嚴寒也是寶貴的經驗, 白濛濛的雪景同樹景也很美~~ 另外在有限的行程內, 可以參觀6個國家的首都及海岸, 看到了不同的古蹟及現代建築, 尤其是各國的舊城區 (例如塔林、里加古城), 都很值得遊覽~~~ 美中不足當然亦是"走馬看花"的行程, 參觀古蹟同歷史建築的時間比買名牌、購物的時間少多了, 如果有時間可以看看博物館、於皇宮或其他古建築物內多行一會, 得著想必更多~~

另外, 其實都係報名之後才醒起, 情人節就是在這行程裡其中一日, 而且這是婚後第一年去的第一個旅行, 就是大家說的"紙婚旅行", 能夠有老公一齊同行, 還有他的包容及接受 (各長輩知道我們報名都擔心架, 淨係錢都擔心啦...), 令到行程更錦上添花~~

(擺多張相做"間場"先~)





通常大家都會寫自由行的經驗, 既然自己是報團, 不如講多啲關於跟團~~ 一開始報名的時候, 我們有比較過幾乎所有的旅行社, 為何都係揀翠x? 除了因為它是北歐團的老字號, 而且有親戚跟過都覺得ok, 加上日子適合, 更重要的是只有它的冬季北歐行程是會去埋愛沙尼亞同拉脫維亞 (起碼今年係咁), 其他團可能就會去了其他地方代替, 例如華沙戰船博物館、動物園等等~~ 其實那些景點都不錯 (例如見到有blog友去了動物園見到好多北歐才有的動物), 不過個人覺得可以多去2個國家及看到世界文化遺產的古城似乎更值得, 而且有些團可能會對景點有取捨, 例如去了動物園就不去博物館 (或者相反);  另外有些團是坐火車, 未坐過的我們有點擔心火車的質素, 所以寧願選飛機 (當然後來blog友的介紹又證明火車都是可選的交通工具~~), 而且各團的價錢差不多, 所以都係選了翠x~ (絕對不是賣廣告呀~~)

除了以上原因, 揀它亦有其他原因~ 例如我們去到玻璃酒店時, 才知道由於房間有限, 只有翠x的團友才可以全部一齊住玻璃酒店, 其他團 (例如新x、康x)都要將團友分成2批甚至3批, 分2晚、3晚住玻璃酒店, 即係就算它們的旅行團單張話可以住玻璃酒店, 報名之後可能才知道如此安排, 而且由於其他團未必日日可以用同一架旅遊車, 行李仲要放在玻璃酒店的reception, 而那裡是沒有鎖、沒有人負責看管行李.......難怪我們的導遊兼領隊成日都"賣廣告", 話公司的安排最好, 亦有其他人想報都報唔到~~

講到價錢及報名時間, 由於我們要用"紅日"假期, 結果在團期4個月前報名都算遲, 因為各大旅行社已經收正價 (所以更貴), 可能因為上年同今年都是"極光年", 大家都想去, 所以如果今年聖誕節或者下年新年想去的話, 暑假 (7/8月) (即係半年前) 可以去問有冇團, 因為通常只有頭10個才有報名價優惠~~ 唔需要在"紅日"假期去的朋友們當然揀淡季或者平日去, 一定平好多又唔駛同人爭~~

好多人唔鍾意跟團, 除了觀光時間不多、行程受限制等 (不過反過來說, 就係唔駛自己諗行程同book酒店/交通), 有時就係驚遇到奇特或者唔夾的團友, 幸好這次的團友都是很守時同合作, 大部份亦可以傾到計, 當然部份也很有錢, 例如每去到一個國家都去買名牌、買大堆貴價手信、或者成家9個一齊去~~ 而且我們以為去這種團的只有大人/老人家, 點知成團除了幾對夫婦, 幾家人計埋都有5個小朋友, 依家的小朋友比我們幸福多了, 年紀小小已經可以去這麼遠~~ 也有獨行的女仕團友, 以前去日本團都有見過, 應該係覺得跟團較安全同有人照應~~ 可能因為此團女士較多, 所以領隊兼導遊都是1位女士, 大致都很照顧團友, 又有講解不同景點, 不過有時有團友影相太耐, 聽到佢哋講見到領隊有黑面, 但大部份時間都冇問題嘅~ 無論是行程、住宿、飲食、交通安排等, 個人都是滿意, 10分最高的話都算有7-8分~~

至於行程上其他要留意/注意的事情, 自己在之前的blog或者其他blog友都有提供, 如果有問題, 隨時留言問我都ok~~ 其實網上真的有好多資料 (除了各景點的官方網站, 當然是各網友的詳盡介紹), 再加上去圖書館借或者買幾本相關的旅行書, 其實都好足夠~~ 至於保暖衣物等, 之前準備篇都有提過, 影北極光技巧就在"3.2:終於看到北極光"那篇, 大家又是可以看看~~

說漏了2項, 第一就是關於手信, 除了食物同各種紀念品 (例如公仔、頸巾、帽、聖誕樹/裝飾、毛氈等), 如果大家想買真係由芬蘭製造的商品又唔想太貴, 可以考慮買Lumene這個牌子:

都係臨行之前, 見到雜誌的介紹, 知道Lumene是芬蘭自家的護膚品牌, 除了上圖的潤手霜, 還有angry bird版本的body lotion、梘液, 各種護面、護眼、護手/腳的產品 (可說有點似"屈x氏"的自家護膚品), 如果想買多些不同類型的產品又是芬蘭製, 可以考慮, 而且價錢不貴, 一支上圖的潤手霜喺百貨公司買都係4.5 euro, 有減價的話就3.96 euro~ 不過搞笑就係買咗幾支, 先發現它們包裝竟然是不同的橙色, 難度有新舊之分? (定係真/假貨?...) 而且因為屋企太多潤手霜, 未有機會試用, 試咗再告訴大家~~

第二就是關於各國的治安~~ 初初我們以為北歐國家比西歐/東歐安全, 不用擔心俾人打荷包/打劫, 點知導遊話除咗芬蘭羅凡尼米、凱米、玻璃酒店等郊區係唔駛擔心治安之外, 一去到大城市, 無論係赫爾辛基、哥本哈根、斯德哥爾摩、奧斯陸, 里加定係塔林等, 都係扒手出沒的熱門點, 因為自從神根公約國免簽證之後, 很多不法份子就由西歐/東歐去到北歐"搵食", 而且仲鍾意打劫中國人/華人, 因為我們一睇就知係外國人, 加上"強國人"時常露出錢財, 吸引了他們的注意.......他們的手法層出不窮, 例如扮成遊客接近打荷包, 或者故意掟雪球整污糟你, 藉詞幫你拍身上的雪, 就借機打荷包......導遊都分享了一次俾人偷袋的經歷, 令到大家好緊張, 不過幸好大家都提高警覺, 例如留意到可疑人物, 大家會互相通知或打眼色, 所以最後個個都冇事~~ 個人見到很多blog友都沒有保安的煩惱, 可以好好享受旅程, 但都係要提高警覺~~

有關北歐之旅的blog就暫告一段落, 希望第時有機會再訪這幾個國家, 仲希望係自由行添~~~