探險家攻略 > 休閒玩樂 / 旅遊 > 主題公園 / 長線旅遊 > 新加坡自由行(4): Legoland (旺季/節日注意事項)

新加坡自由行(4): Legoland (旺季/節日注意事項)

由 helenhlblog 於 2014-03-22 00:00:00 發表 | 累積瀏覽 2383

分類：主題公園長線旅遊；地區：新加坡

這篇真的有點難下筆, 因為自己計劃去Legoland的行程時, 一點都沒有想過會發生以下的事, 而且出發前找資料不夠仔細, 後來才知道原來去Legoland有好多方法, 各位如果好似我們般, 要旺季時間去Legoland及Hello Kitty Land的朋友, 一定要多多留意行程安排~

都係由頭講起先啦~~ 話說我們參考了網上意見, 覺得參加WTS的巴士團應該係最方便去Legoland的方法, 因為只需要去到指定地點上巴士, 過關之後就送到你去目的地, 回程又自動送返新加坡, 於是預先網上報名 (文章後段再告訴大家網址), 當日就搭的士去到Singapore Flyer (摩天輪) 地下的旅遊巴士停車場~

去到已經好多人, 見到WTS旅行社門口有條隊伍, 即刻去排隊~ 向職員出示確認信/單據, 就會給予識別的貼紙及樂園的票~ 我們架車係9:00, 趁仲有時間, 就上去看看摩天輪, 再去買早餐~

今次唔坐摩天輪, 又俾個藉口下次再來~~

當時唯一有開的店舖就是"阿坤", 其實想幫襯其他, 不過冇得揀~~

這裡唔需要叫指定餐, 可以散買, 試了2種食物, 這個叫"Toast sticks", 係炸了的火腿芝士多士, 咖央醬另上~~ 味道很不錯, 炸了的多士不算油膩, 點埋咖央醬, 鹹鹹甜甜的味道幾夾, good~

仲試了這個, 叫"Kaya balls", 有點似我們的雞蛋仔, 蛋波入面就塞了咖央醬, 熱食味道不錯~~

係時候上車, 於是上了旅遊巴, 一心諗住開心的旅程開始啦, 點知......

旅遊巴大概45分鐘就到了關口, 卻開始塞車了......

長長的旅遊巴士車龍, 旅遊巴有段時間係"原封不動"......看著時間分秒過去, 第一時間諗到就係下次應該買最早一班車的票......不過未過上午, 仲有希望嘅...

差不多等了一小時才可以落車過關......唔係關站唔可以影相, 真係想影低當日的"盛況".......百幾二百人堆在一個得10個counter的小關口, 仲要係得4個關員處理咁多人過關, 自然係打哂蛇餅, 就好似喺香港, 新年節日於羅湖/落馬洲過關、人山人海、人迫人的恐怖情況......仲要好多都係一家大細、推住bb車過關......

4個僅有"營業"的關口, 有其中2個是寫只給馬來西亞人過關......當時都冇諗過既然係寫住只有係馬來西亞人可以用, 行埋去未必過到關......但因為太多人, 有其中一班人就唔理, 照排隊, 結果又俾佢哋過, 我們就排了一條慢的隊伍, 激氣......

好唔容易過了新加坡的海關, 計埋已經用了2個多小時, 仲未到馬來西亞......倒霉的事又發生, 我們架巴士上有一家人唔知去咗邊, 定係可能仲未過到海關......結果成車人在車上等等等...差不多一小時, 他們才出現.......唉......行程愈來愈遲...

巴士即刻開車前往新山......已經係中午時間......連馬來西亞都未見到......

幸好天氣暫時仍不錯, 過關時灑了一場大雨, 跟住就停咗......這就是新加坡同馬來西亞之間的海峽~~

去到馬來西亞的關口, 又係塞車, 又係要等過關, 又用了一個小時......這邊的關卡都係得幾個職員招呼我們, 不過地方大d, 唔駛"迫沙丁魚"......

結果我們去到Legoland酒店門口時, 已經係下午1時半, 足足用了4個多小時才到......後悔冇好好搜集資料, 網上或旅遊書都冇提過任何關於新加坡同馬來西亞海關的塞車同服務問題......平時淡季就冇問題, 但估唔到自己已經係揀平日 (27/12), 但因為係聖誕時段, 咁多人一齊搭車, 加上那幾個遲到"團友", 令到行程失哂預算......

唯有影吓相補數啦......酒店的外形真係幾靚~~ 如果夠時間, 真係應該喺度住一晚, 咁就可以一日去Legoland, 一日去新開的Legoland Water Park, 先夠時間玩~ 不過個人不太喜歡水上樂園, 加上Legoland只預了一日行程, 所以這次只是去Legoland......

其實......本來我們的套票, 係包去Legoland, Hello Kitty Land同中間一程車, 點知當時行程遲哂, 由Legoland去HKL的包車開下午2:00, 但我們去到Legoland已經係1:30, 根本趕唔切搭包車......Legoland係重點, 唔可以錯過, 唯有放棄跟車去HKL, 玩咗Legoland先...

在巴士站再行了8分鐘, 才真正到了門口...

周圍行吓先~ 看到期間限定的Lego聖誕樹~~

還有這個Happy Holidays的字樣~~

之前看了介紹, 知道這裡的遊戲大部份都係適合小朋友玩, 於是決定先在"迷你世界"影多啲相, 例如雙子塔~~

泰妃陵~~

又"返番"去新加坡~~

又見到摩天輪~~

中國紫禁城~~

仲有Lego系列經典之一: 海盜船~~

其實仲有好多用Lego砌的建築物, 例如其他亞洲國家的景點同城市景觀等, 不過去過的朋友應該都影哂, 或者其他blog友都介紹得好仔細, 篇幅所限, 都唔係擺好多相喺度~~

經過在US的濕身經驗, 唔想再玩滑浪飛船或類似的遊戲, 於是睇人玩~~

嘩...玩呢架滑浪飛船一定由頭濕到落腳, 大家如果想在Legoland玩呢個, 一定要預先帶膠雨褸、包好哂成個人呀~

繼續周圍影相~~ 用Lego砌的各種公仔都好可愛, 謀殺了不少菲林~~

最初見到4D影院唔多人, 走去排隊, 結果都排了半小時先有得睇~~ 劇情同特別效果都唔錯, 幾好睇~~

之後去了排隊玩過山車 (Dragon's Apprentice), 一邊排隊一邊影相, 城堡入面有好多用Lego砌的得意擺設同人物~~ 這個過山車都幾chok同快, 隔離有架細啲/短啲的過山車 (The Dragon), 就啱較細的小朋友玩~~

因為原本我們係想去Hello Kitty Land, 於是爭取時間周圍影相之餘, 又看看有哪些遊戲是不用排隊先玩, 不過好多都要排最少半個鐘, 唔夠時間......

行行行...終於有個遊戲冇人排隊, 就是Technic Twister, 可能係個個都怕轉嚟轉去...即玩~

轉吓轉, 老公就話好暈, 我就覺得幾好玩~~

之後又周圍行, 同吓Lego鹿車及聖誕老人影相先~~

跟住發生的事超出了我們的想像, 一張相都冇影到, 唯有用文字覆述......

見到Lego火車都好想玩, 不過又要排半個鐘, 而且當時係下午4時半, 已經夠哂鐘去Hello Kitty Land, 於是就此離開了Legoland, 去了巴士站等去HKL的巴士......

又係怪自己冇睇定多D旅遊資料......冇得搭包車之後, WTS的職員有提我們可以自行搭巴士 (LM1或JPO2) 或者的士去HKL, 10分鐘之內應該到...... 我們諗住有巴士, 唔駛俾多啲錢搭的士, 點知原來個職員又唔講, 後來查番先知道, 平日的巴士班次好少, 幾乎1個鐘1班......早知唔想煩就跟番個職員搭車返新加坡啦, 不過當時始終都有希望想去到HKL, 於是決定用自己的方法, 又出事了......

嗰啲馬來西亞巴士司機好似不太識英文, 原本15分鐘等到2架巴士, 問來問去, 2架都話唔去HKL, 結果再等了45分鐘, 又來了一架LM1巴士, 但係就已經等埋"成村人", 個個都要迫上呢架巴士...想迫上車時又發現唔夠馬幣, 死死氣行返去商場再"唱錢", 以為架巴士走咗, 點知原來太多人迫上去又未走, 糊裡糊塗又迫了上去......以為呢架巴士係返轉頭 (因為LM1同JPO2都係循環線), 應該係去HKL啦......

以為迫了上車, 終於去到HKL, 點知原本應該係10分鐘的車程變了30分鐘有多, 又知出事了......再問巴士司機同車上的乘客, 先知架車原來係返新山市中心 (唔通巴士司機飛了HKL個站?又好激氣!!...)...不幸地拜拜了HKL, 連原本要搭的WTS包車又趕不上, 又蝕了錢啦......當時以為自己搭錯車, 在車上好擔心返唔到新加坡要留落馬來西亞, 真係好驚......後來再查網上資料, 發現其實自己去Legoland根本唔難架, 怪自己太依賴巴士團, 冇預先好好查清楚去的方法, 搞到自己虛驚一場......

我們跟住一群都係返新加坡的乘客, 在Johor Bahru Sentral (Checkpoint) 落車, 當時才發現原來返新加坡有另一個大關口: Woodlands (就好似我們香港的深圳灣關口)......問了當地人, 過了馬來西亞關口之後, 跟住可以隨便上一架過境巴士, 就可以過番去新加坡, 過關之後再轉巴士返地鐵站就ok~ 雖然Woodlands已經係一個大關口, 但都係勁多車, 過關、轉車加塞車, 用了2個多小時才上到地鐵......

另外, 當時隨便就上了一架是賣票的黃巴士 (唔記得幾多號), 後來又係事後查番, 有票的話, 過完關口之後再上番同一路線的車, 應該就唔駛俾錢......雖然只係$1 SD, 不過我們好似又花多了錢啦......

坐完MRT返到Chinatown已經9點幾......身心都好累呀......

綜合了自己的經驗及再找一次網上的資料, 個人認為旺季/節日去Legoland或HKL要注意:

1. 逐日分開去Legoland、Legoland Water Park或HKL (Puteri Harbour) 比較好, HKL原來下午6:00就關門, 最後入場時間其實係5:00, 如果好似我們咁遲大到, 根本不能一日去2個樂園......如果唔係好鍾意HKL, 得一日時間, 應該只係去Legoland就夠, 想去埋Water Park一定要預多一日 (WP都係下午6:00關門...)

2. 如果真係要一日內由Legoland去HKL, 坐的士好過坐巴士, 其實Legoland入口位置有個服務台可以協助call的士, 大家應該善用~

3. 個人認為WTS巴士團的方法只適合淡季/平日時間, 旺季坐WTS原來竟然要用幾個鐘過關, 激氣, 啲職員又唔helpful, 公共巴士班次少又唔講俾我哋聽......不過唔坐WTS, 坐Causeway Link (黃巴士) 過關同去Legoland都好花時間......平日幾乎1小時1班車, 反而星期六日仲多d車...

4. 網上資料說自己包私家車可以唔駛落車過關, 不過旺季時段, 啲關口塞滿哂車, 可能都係要用好多時間先過到對岸......

5. 唔係教大家用"不法"方法過關, 不過寫住係俾"馬來西亞人"過關嘅關口都原來結果係人人用得, 如果去到過關時好多人, 唔好理啦, 邊個關口開就過去排啦!! 可以快D架~

結論: 旺季由新加坡去Legoland要用不少時間, 敬請小心行程安排......一係就早啲起身、早D過關避開人潮同車龍......

如果有興趣WTS或其他公司的巴士團, 可以看看以下網站~ 唔一定要在WTS官網訂票, 有好多旅行社同WTS都有聯繫, 大家可以比較行程/價錢再決定:

http://legoland.wtstravel.com.sg/book-now.html

http://www.busonlineticket.com/ (看Tour的部份就有Legoland有關的套票, 就是同WTS有聯繫)

http://www.facebook.com/TravelDelight88

如果想自行搭Causeway Link巴士去Legoland, 可以看看官網和blog友的詳細介紹:

http://www.legoland.com.my/en/Plan/Bus-Services/ (Legoland官網有路線介紹)

http://www.causewaylink.com.my/singapore-bus (CL的網站)

http://www.causewaylink.com.my/shopping-bus (都係CL的網站)

http://wangwalker.pixnet.net/blog/post/49026502 (介紹很仔細, 由Woodlands Checkpoint過關, 個人覺得比較理想, 因為關口面積大好多, 但車程會耐啲, 因為距離Legoland較遠~ 其中一個方法就係在Kranji地鐵站坐170號巴士去WC)

http://iamhappy88.com/2013-08-01-14/ (都是介紹得很詳細, 坐地鐵去一些有得搭CL的站, 例如Jurong East或Boon Lay, 再由Tuas Checkpoint過關, 其實由Tuas去Legoland近好多, 但關口好細 (就是我們用了2個多小時才入到馬來西亞的關口...), 建議都是淡季才來這邊)

紅色圈就是Woodlands, 綠色圈就是Tuas~