第3日似乎悠閒少少, 主要景點都係一個: 環球影城 (Universal Studio)~~ 於是早上決定去拜會個個都去的"阿坤" (Ya Kun Kaya Toast), 試試它的咖央多士~~ 在我們住的酒店坐巴士3個站, 行多5分鐘, 就可以去到它在牛車水附近的總店~
這是它的側邊, 有露天位置, 環境不錯呀, 有好幾個上班人士都在嘆茶吹水~~
這是它的正門, 其實我們是先從這裡入去坐底食早餐, 食完先記得它仲有側邊露天位~ 不過唔緊要啦, 去過的朋友應該都記得店舖入面的裝潢都很有心思的~
入面都唔算多人~~ 侍應一睇就知我們是遊客, 二話不說就叫我們點2個"指定"餐, 我們又乖乖照做......下次應該睇吓餐牌先再決定~~ 可能他們招呼過太多遊客, 已經麻木哂...
指定餐一: 咖央多士~ 份量少少, 如果熱辣啲更好, 不過薄薄的多士幾脆, 咖央醬味道真係唔錯~ 水準是合格以上~
指定餐二: 西多士配咖央醬~ 這次的包包是軟軟的, 都係嗰句, 熱啲更好食~ 配上味道不錯的咖央醬, 點都合格嘅~~ 個人就鍾意脆脆多士~~
套餐當然仲有生蛋一份, 包一杯飲品~~ 老公選了薏米水, 不算好甜, ok~ 我就揀了飲熱檸茶, 因為個人不好奶茶/咖啡, 但其實個個都話它的咖啡同奶茶好飲, 下次應該試吓~~
侍應知道我們要走, 又即刻好快手做出"指定動作", 就是叫我們買手信, 仲即刻show哂啲sample出嚟~~ 我都好想買架, 不過昨日用錢太多, 唯有不買啦......今次侍應失手啦...
之前本來都對"阿坤"有些期望, 不過可能它已經是"梗有一間喺左近"的連鎖集團, 做生意的手法變了招呼遊客的手段, 雖然食物味道不錯, 可惜有點失望, 唔係話它們的服務不好, 但感覺上為了做生意, 少了一些街坊風情 (可能我要求太高了...)......難怪牛車水遊客中心的職員一知道我們要特地找"阿坤", 就話唔駛一定要食佢, 隨手找一間餐廳食咖央多士都係好食嘅, 原來都有他們的道理...
食飽飽, 又係時候出發去Sentosa~ 用番第2日行程的方法, 坐地鐵去到Harbourfront站, 再由Vivo City行過去~
不過因為對鞋有些磨損, 要買對鞋墊補救, 於是去了行"2蚊店", 計港紙就一樣物件12個幾, 都係喺香港買好d, 不過呢間店好有規模, 唔買嘢行吓都唔錯~~
沿住入園的路線行行行...其實US就在SEA Aquarium的對面~~ 指定動作又嚟啦, 影吓正門先~
已經醒目地預先在網上購票, 排少了一條隊, 不過入去都仲要排隊, 這日唔係新加坡公眾假期, 不過仍然有好多來自世界各地的遊客~~
等了15分鐘, 可以入場了~~
雖然仍是上午, 不過已經周圍都係人, 人山人海, 同香港的海洋公園或者廸士尼差不多, 又唔想俾多一筆錢買fast pass, 最初就諗住先揀一些不用排隊太久的遊戲或表演~
先看了這個史提芬史匹堡動感劇場 (Light, Camera, Action by Steven Spielberg)~~ 排了15分鐘~ 都幾好睇, 模擬十級颱風的威力幾似~~
之後見到好多遊戲都要排好耐, 選了一個聲稱排1小時的過山車 (Revenge of the Mummy), 結果真係排了差不多1個鐘, 不過幾好玩~~ 後來都有再玩多一次, 下面再解釋~~ 要玩呢個遊戲, 一定要先將身上所有物品 (包括眼鏡、銀包等) 寄存在附近的locker, 頭1小時是免費, 之後就要收錢, 幸好我們1小時之內回去取物, 就可以免費~
之後折返, 見到芝麻街話排半小時, 又乖乖等咗半個鐘入去玩~~ 中途見到大街有芝麻街人物的表演就睇唔到~~
唯有影吓入面的卡通人物先~~ 不過唔知係咪因為好多遊客, 啲車仔好似行快咗, 好快就遊完一圈...
出到嚟, 剛好是怪獸樂隊表演時間, 又即刻行過去睇~~ 演員都好落力, 不過個人對奸角冇咩興趣, 當睇show之餘可以坐吓休息~~
啱啱好夠鐘睇"未來水世界"的表演 (WaterWorld), 即刻連行帶跑趕去睇, 好彩剛剛開場~~ 表演都幾精彩, 又有爆破場面, 睇住啲船飛來飛去, 演員都跳來跳去, 幾驚險~~ 如果想體驗濕身, 可以坐中間前幾排, D船同D演員都會刻意潑水過來, 所以唔想濕身的, 就要坐高D或者坐側邊~~
睇完呢個, 決定去玩很受歡迎的"Transformers the Ride: the Ultimate 3D Battle", 嘩, 一齊排要2個鐘...於是唯有做single rider, 可以排少一個鐘, 結果大約排了45分鐘就玩到~~ 好chok, 不過幾驚險, 又有劇情, 係好好玩, 多人真係有原因~~
呢個時候突然落大雨, 雖然我們有帶遮, 不過啲戶外遊戲好多都停咗, 於是即刻走去Far Far Away睇史力加4D影院~~
雖然入去睇戲可以避雨, 不過呢度地下的疏水做得好差, 周圍水浸, 排隊時真係要小心行......而套4D電影幾好睇, 劇情有新意, 小朋友一定啱哂~~
出到嚟, 啲雨停咗, 即刻又要趕去排過山車 (Canopy Flyer), 呢架係所有遊戲中排得最耐, 真係排咗1.5小時, 因為呢架冇single rider, 就算有fast pass都要排差不多1個鐘...好彩冇買啫...
玩完呢個, 發現我們仲未去到Madagascar區, 於是就去玩坐船 (Madagascar: A Crate Adventure), 好似廸廸尼的"小小世界", 只係入面換哂做呢套卡通的人物~ 一路影相一路休息吓~~
玩到天也黑, 周圍都開始著燈~~ 我們又回到了大街, 因為......
係飄雪表演的時間~~ 突然場內飄下一塊塊"雪花", 大家都很興奮~~ 其實是泡泡來的~~ 雖然不是真的, 但都令大家雀躍了好一陣~~
之後在大街預早半小時霸位, 為的就是看芝麻街人物的聖誕歌舞表演~~~ 時間不長但看得幾開心~~
當然他們的表演不少得有聖誕老人~~ 他表演完成之後登上"鹿車" 離開, 大家都爭相拍照~~ 當他走開了之後, 又有第二場飄雪, 大家又開心多一次~~~
睇完呢個表演大概係晚上8點幾, 如果大家唔趕住走, 就要趁機留低, 因為原來呢啲時候, 好多機動遊戲都冇人排隊, 或者只需要排15至30分鐘就有得玩~ 既然好多人都走咗, 我們encore了"盜墓迷城"過山車, 因為唔駛排隊~~
老公又話想玩激流 (Jurassic Park Rapids Adventure), 於是擺好哂啲物品在locker, 排了5分鐘就有得玩~ 可惜坐錯位, 搞到個身濕了一大片, 吹風機又要俾 $5 SD先可以用, 有少少唔開心添......如果大家唔想濕身, 請不要坐前面(倒望其他人)的位置, 一定要坐後面 (即係向前望其他人的位置), 成架船的人都冇濕, 淨係我們兩個濕哂, 又冇著雨褸, 好狼狽呀......又或者應該下午就排隊玩咗先, 等啲衫自己乾又好啲...
是時候回酒店, 唯有著住一身濕衫, 返到去Chinatown附近食快餐店, 再乘巴士回去~
環球影城真係面積不大, 不過排吓隊, 玩吓呢樣睇吓嗰樣都用了一日, 所以有心去的朋友最少都要預足一日. 另外呢度雖然有一些適合小朋友的遊戲, 但小朋友玩時大人好悶, 而大人玩得開心的遊戲, 好多都要小學生以上先玩得 (身高+心理問題), 所以這裡較適合帶住6-9歲或以上的小朋友來, 太細就好多遊戲都冇得玩~~
個人就覺得過山車同變型金剛都好玩, 4D影院都睇得開心, 喜歡樂園的朋友一定鍾意~ 唔想排隊就可以買fast pass, 善用single rider條隊, 或者晚上留到最後一刻, 就可以玩多啲, 當然最好就係淡季或平日來玩, 一定少d人, 不過就未必有假日或節日的特備節目~~~ 希望第時會有更多新遊戲或設施, 又有藉口可以再來~~
有興趣又可以看看官網或其他blog友的介紹:
http://www.yakun.com/
http://kitx.mysinablog.com/index.php?op=ViewArticle&articleId=1938903
http://aiko6034.pixnet.net/blog/post/37365562
http://www.rwsentosa.com/language/zh-CN/Homepage/Attractions/UniversalStudiosSingapore
http://www.utravel.com.hk/DetailSpot.php?id=ADIRaBEuA3U
http://blog.yam.com/winniea/article/68450167
http://www.kiri-san.com/blog/articleDetail/1764.htm
http://worldtravelholics.com/2012/08/26/2012sguniversalstudio/
http://www.anismile.com/2013/08/universal-studios-singapore/
============================================
感謝 helenhlblog 提供以上資料
helenhlblog的網誌: http://helenhlblog.blogspot.hk/
============================================
