趁住有時間又可以請假, 報了一個附近社區中心舉辦的蛋糕+甜點+小食班~~ 每堂可以做2款不同的蛋糕/甜點/小食, 而且價錢不太貴, 決定一試~~
第一堂, 知道了上堂的情況, 又聽到其他同學同導師的談話, 就知有少少"中伏"......工具要一齊分嚟用都預咗, 但這次所有人要共用一個電子磅, 因為另外2個都壞咗, 唯有逐個人排隊, 由其中一個同學幫手量材料; 打蛋機得3個, 碗碟廚具都要自己攞、自己洗......比起去工x會仲辛苦, 起碼工x會工具都多dd, 仲有一個助手幫手洗碗...
另外佢哋話社區中心不時超收學生, 之前試過同時有十幾二十個人一齊整麵包, 好明顯工具唔夠分, 又唔夠時間完成製品, 當然好多人投訴啦~~
幸好今次計埋得8個人報名, 而且焗爐同雪櫃都夠位, 2個人一齊整, share啲用具都唔係等好耐.....
至於導師, 是退休的廚師, 都算有耐心教學, 不過由於他同他女兒本身都另有公司教人整蛋糕, 所以社區中心的工作都係"玩票", 以及借機宣傳一下他們的公司, 所以有時材料唔係買得好足夠, 睇埋落去就知~~
第一堂的其中一個成品是藍莓蛋糕~~ 製成時覺得有點似"莎莉蛋糕", 不過唔知係咪粉漿唔夠, 定係我們打發得有點過時, 不算發得好起, 另外藍莓果醬要大家一齊分, 可能份量不太夠, 食完覺得冇咩藍莓味~ 不過都食到嘅~~
另一個就是豆腐芝士蛋糕~~ 望落白雪雪, 其實食譜話可以用朱古力來畫花裝飾, 但唔知阿sir唔記得定係故意, 冇提過要裝飾, 而且第一堂大家都用多了時間, 趕住走, 都冇人問點解冇朱古力, 於是冇咗件事~~ 不過味道都唔錯, 豆腐味幾濃~~
第二堂大家都開始習慣課堂節奏, 而且今次整的蛋糕及甜點比較簡單, 所以有時間剩等蛋糕出爐~~
其中一個就是日式芝士蛋糕~~ 第一次用"蒸焗法", 原來同免焗或其他類型的芝士蛋糕真係好唔同~~ 一拎出來好似一個月亮~~
脫模之後, 蛋糕開始"座"低了少少, 不過都keep都個樣~~ 味道都幾好, 淡淡芝士味, 軟綿綿, 幾似伊x家的出品~~
但其實食譜明明話要用牛奶, 牛油, 但阿sir又冇買牛奶, 又冇要我們落牛油, 連步驟同食譜上寫的都有d唔同, 不過都算整到......唔知話阿sir真係有料到, 定係偷工減料, 想快d整完快d收工...
另一個就是士多啤梨mousse~~ 阿sir本來想去買士多啤梨, 點知冇得賣, 於是同學仔好心幫佢再去搵, 都係冇, 結果又冇士多啤梨裝飾同加入去, 粉紅色的效果是士多啤梨蓉、食用色素做出來的效果, 所以味道係甜, 不過就未算好食~
希望之後2堂整的小食會好味啲啦~~
============================================
感謝 helenhlblog 提供以上資料
helenhlblog的網誌: http://helenhlblog.blogspot.hk/
============================================
