大理。雙廊古漁村 (Part 1)

< 雲南大理﹑昆明6天遊 >

第二天(續)

去到大理啦！三年前坐火車經過大理，今日終於可以係大理火車站落車！傳說大理最出名就係「風花雪月」，風花雪月代表下關風、上關花、蒼山雪、洱海月四大風景，究竟我見唔見到呢幾個風景呢？
1. 下關風：冇特別係下關感受，但有時候大理真係無啦啦好大風
2. 上關花：冇時間去上關睇花...
3. 蒼山雪：以前話蒼山終年積雪，但而家全球增溫加上夏天，咩雪都冇啦
4. 洱海月：我都算係見到架^^
大理之旅開始啦！！


真正既旅程就由大理火車站開始；大理比昆明凍好多，落左火車就先去售票處拎回程火車票，朝早人唔多好快就拎到，搞掂之後就行返去火車站出口對出既巴士站，避開n個拉客既人成功坐上開去大理古城既8號巴士，呢個巴士站位又細又多人，比人煩到爆炸；我由第一次去旅行都唔敢信呢啲拉客既人，見到太多人有中伏經驗啦，都係信自己好過（如果去古城就要留意，而家8號車唔入去古城裡面，只係古城外面經過，不過網上好多網站都未有更新呢個資料；而且8號車收費係2蚊，唔係以前既1.5，第二次搭先見到加左價，好彩司機冇發覺入少錢咋）


我就冇坐到去古城咁遠，係大理市區（正確稱呼係下關先岩）已經落左車


目的就係要黎汽車北站


去雙廊就要係呢個汽車北站坐車；我想買最早個班8:25竟然已經賣晒，唯有買第二班9:00開出既車啦，去雙廊車費13蚊；而家先係岩岩7點鐘咋，即係話我要係道等兩個鐘車！會唔會耐左少少丫！


由下關去雙廊要由洱海南面去到洱海北面再去洱海東面，圍繞呢個雲南第二大湖「洱海」走大半個圈，距離大約55公里，所以車程比較長需時一小時十五分鐘


車站對出咩都冇，唔好話有野行連鋪頭都唔多間，所以只可以坐係道慢慢等夠鐘開車；係車站對出見到今次雲南之旅第一個日出，原本凍冰冰既大理都開始溫暖起黎，再加上咁靚既藍天白雲，大理有一個美麗開始






車站外面有幾個小攤檔，既然有咁多時間就係道先食個早餐




有大理特色野食「餌塊」


得兩檔選擇，見到呢檔有兩個人食緊野就揀佢啦；我一向都覺得係車站出面食野係中伏多，又貴又唔好食，但而家都冇野好做又冇其他選擇，求其有個地方坐低就算，唔可以要求太多


難得去到雲南當然繼續食米線，問過價錢原來一蜿米線只係6蚊咋，真係好平
最重要係呢蜿米線好好食，比起香港既米線好食好多，平野都有好野！（電話差電器出現問題，搞到張相出黑邊，個差電器就咁壞左啦，唉...）


加少少辣椒就更好食


食飽就入去慢慢等；進入侯車室要經過X光機，睇落好似好安全，不過呢部X光機係冇人睇住，就算佢照到有野都冇人會見到，咁即係得個樣冇用啦...


去雙廊既車35分鐘一班，仲有個幾鐘要等


我就係乖乖地坐係呢個小小候車室等車；呢道去廁所都比5毫，第一次見汽車站廁所要收費


等丫等，等丫等，8:25既車終於黎到，當然呢班車已經full晒啦；售票員話巴士可能會早到，所以我都唔返去候車室，企定定係道等下部車到


大理真係好好天，陽光普照




蒼山頂被太霧覆蓋，暫時未見到蒼山真面目


好多人已經等緊車，我都去排好隊，等陣就可以快啲上車霸個靚位；部車會沿洱海邊行，如果可以坐到右手邊就可以睇住個洱海啦


成功比我坐到右邊，Yeah
巴士8:40就開出，比預定時間早左20分鐘，Yeah！Yeah！Yeah！


走廊已經擺好晒櫈仔bor，都估到佢會載多好多人，35分鐘先一班車而且又有遊客，唔迫爆人都奇啦，就係呢個原因我寧願係汽車站等車都唔先去古城，係古城先上車既話隨時迫唔上


巴士連司機規定最高人數係十九人，出汽車站時已經坐滿十九人啦，沿路不斷仲有乘客上車，又幫人載貨，最多時車上曾經多左十個人出來，超載率超過50%




本來想沿途欣賞風景，但路過古城之後好快已經訓著左啦，直到去到洱海東面先訓醒，錯過左好多美麗風景


臨到雙廊之前幾公里，路上出現好多人好多攤位，唔知發生咩事呢？


好多人都穿著民族服裝，幾特別




一路上人多車多，巴士係道慢慢塞用多唔少時間；之後聽人講今日呢道係一年一度既唔知咩節日定廟會，所以咁多人走出來襯熱鬧，早知道咁難得遇到節日就即刻落車啦！當時咩都唔知就繼續坐車去雙廊

去到一個路口司機就話雙廊到啦，旅客們都係呢道落車，落車後一路向下行就會去到海邊（應該係湖邊先岩）；大理既天氣真係冇得彈，陽光普照藍天白雲，最重要係著住外套都唔覺得熱，比起昆明舒服好多




有goolge map同路牌指路，落完斜轉左向海邊/南詔風情島方向前進




向前行埋呢小段路就係海邊啦，究竟洱海係點既呢？


來到海邊，都唔知講咩好啦，就一個字：嘩！
真係好靚丫，唔知點解釋，總知就好靚啦！要知道相機影出來已經冇咁靚啦，現埸睇係更加靚！


有山有水有藍天有白雲再加多隻小船，構成一個美麗畫面，我可以肯定山長水遠黎到雙廊係冇錯






靚景唔會走左去既，而家都係去hostel放低行李先，重要幫電話差電，琴日掛住玩電話玩到外置電都冇晒，電話得返小小電唔挨得好耐；我一路行發現到同車 有兩個女仔一路都跟住我行，我轉左佢地又轉左，我轉右佢地又轉右，我調頭行佢地又跟我調頭，都唔知發生咩事？見佢地咁迷惘就上前問下做咩，原來係唔識路去 酒店...好彩我有google map可以幫到佢地搵地方...而我一早都已經知道hostel係邊唔怕盪失路




由海邊呢個位行去hostel唔係好遠，沿海邊行就得，以我平時行路速度唔洗五分鐘就可以去到，不過而家又唔係趕時間洗咩咁急，一路影下相慢慢行




好靚！好靚！好靚！除左好靚都唔知講咩好！






對出呢個係「南詔風情島」，洱海三個島其中一個，上面有一啲景點可以參觀，但要收費所以就唔去啦


好多人都會坐小船遊洱海，明天我都會坐




洱海對岸就係蒼山，山下係好多唔同既農村，明天我就會去對岸玩啦




一路沿海邊行去hostel，海邊已經起左好多好靚既酒店，住係道望住個海一定好正啦！不過呢啲地方唔岩我住架啦，我都係住返係hostel比較好




海邊有好多餐廳，環境好靚


差唔多到啦




南詔風情島之上有「阿嵯耶觀音」，守護住大理呢個咁靚既地方，而且呢位觀音娘娘仲係世界上最高既漢白玉觀音雕像


Hostel就係南詔風情島碼頭對面，好易搵到




隱藏係一間傳統白族民居之中


由hostel行出去海邊只係一小段路，都算係方便啦


去 到hostel就先放低背囊，但時間太早住客仲未check out，所以冇得入房只可以暫時放係櫃台，順便留低粒外置電慢慢差；為左擋住燦爛陽光，要帶返好頂帽，再包住塊面，咁就冇太陽可以曬到啦（因為手指冇野保 護，最後曬黑左兩隻手指...）；拎住相機加多枝水就開始雙廊探險之旅


出發！Hostel位於雙廊「島依旁」村，村口有棵大樹做標誌


今次唔沿海邊行，行內街睇睇；雙廊好多地方都有呢啲又新又有特色既酒店，來雙廊渡假係一個唔錯選擇，又有靚海景又有靚酒店好有渡假feel


雙廊而家都可以算係出名既旅遊地方，遊人比起以前多好多，不過相比大理古城呢啲超級出名旅遊景點，雙廊商業化程度明顯低得多，所以係雙廊感覺好舒服：不過 而家雙廊已經不斷發展旅遊業，內街好多地方已經起緊新酒店新客棧，將來一定會吸引更多遊人黎到雙廊，如果唔想對住一個又多人又商業化既雙廊就要快啲去啦






由於好多地方起緊樓，唔少街道都變得沙塵滾滾，所以怕污漕既話就要好好考慮；不過我又覺得問題唔大，如果只係係海邊行可以話冇咩影響，海邊已經起好晒唔會有沙塵呢個問題，而且雙廊風景咁靚因為呢個原因而唔去咪好唔抵








穿過冇人既小巷出返去大路，沿住頭先落山既路上山


要行上一個小小山腰位置


個天藍得好靚
就算接近中午天氣都唔太熱，呢種天氣好適合行街，當然可以再凍少少會更好啦




上到一片平地，有咩睇呢


第日會變成觀景台！頭先坐車經過時見到呢個位置好似好正，所以就自己走左上來睇睇


呢個位風景真係好靚！可以望到全個雙廊，更加可以見到蒼山﹑洱海，呢個位置真係完美！


雙廊有一個突出洱海既半島，半島最尖位置最靚既地方就係舞蹈家楊麗萍既酒店，不過咁靚既地方當然唔會係我呢啲凡夫俗子可以住架啦，只可以企係呢個遙遠地方偷偷地望望；不過太遠咩都望唔到...




望到洱海對岸蒼山腳下有好多鄉村，明天我就會去到對岸望返過來啦；同又大又高既蒼山相比鄉村顯得好渺小


有大船埋岸！除左坐車來雙廊，係古城個邊才村碼頭都可以坐船來雙廊，只不過船貴好貴，聽聞要百幾蚊...我當然唔會考慮啦


蒼山長長既山頂全日都被白雲覆蓋，暫時仲未可以見到蒼山十九峰真面目


影多張相就繼續前進


沿路行就可以去到真正雙廊村所在地，但我就懶行過去...如果有部單車係道就好啦，可以去多好多地方，原本都有計劃踩下單車，不過heahea下就冇左件事


揀左個有利位置望下；雲南好多地方都有呢種紅色泥土，飛機上已經見到好多啦，如果去東川紅土地睇會更多更靚


山下好似有間學校bor？呢間學校位置一流，面對180度無敵大海景，座落豪宅地段，係道返學讀書一定醒晨好多！


好大既雙廊鎮，唔知入面有咩睇呢？我冇去到呢邊所以唔知啦...其實我只係知道雙廊呢個名，雙廊除左有個好靚既洱海之外有咩玩有咩睇我都唔係太知，又冇時間慢慢去研究，所有野都係隨緣啦，去到邊就睇到邊，果然雙廊風景冇令人失望；香港人可能對雙廊比較陌生，暫時都好似仲未見有香港旅行團來雙廊，自由行去雙廊既人都唔多，不過我相信呢道好快會旺過旺角，唔知呢個係好事定壞事呢？






望過去呢邊好似都已經有好多酒店係海邊啦；我相信住係海邊一定好舒服，打開門行出露台就可以望到一片美麗既海景山景，呼吸新鮮空氣，夫復何求


一層層建築睇落好有層次感，好特別




睇多張相就離開呢個美景，返轉頭回程啦


又再次望到南詔風情島


島上白色建築物係「南詔行宮」，其實係一間酒店...但住係島上感覺唔係太方便...


一部船離開，有另一部更大既船即將進入雙廊，有一個問題由當時到而家都仲未諗得明，究竟點樣可以將咁大部船運到來洱海？


有大船亦有小船，小船漂蕩係洱海之上更有漁村feel，話晒雙廊係一個漁村ma

欣賞完咁美麗既風景就行返落去啦




咁岩又一部巴士由大理來到；今朝我就係坐住呢部小小既巴士來到雙廊，今次巴士又載住幾位追尋雙廊美景既朋友來到呢個美麗地方




就咁企係路邊睇都幾靚啦




日頭好多旅行團來到雙廊，馬路邊泊滿旅遊巴；旅行團來雙廊絕大部份都係去南詔風情島，其他地方唔會去，所以雙廊都仲算保持到寧靜環境；係雙廊小巷之中穿梭感覺好好，只係呢啲大馬路比較污煙瘴氣，少行為妙






原來呢道係巴士總站，不過係呢道隨時上唔到車，因為上一站可能已經上滿人！


去到「大建旁」村，村口又係有棵大樹


好多著住白族民族服裝既老人家坐係道，生活又幾悠閑；近排見啲明星都話要黎大理買屋渡假，可想而知大理生活係幾咁舒適；隨左雙廊，洱海邊仲有好多古鎮環境 比雙廊更好，我就更鐘意明天去既喜洲，大理真係要慢慢hea遊先可以感受到大理咁靚既環境，可惜我冇咁多時間慢慢遊，只可以去好少地方咋...




全部都係白族建築；白族建築好易認，好多時都係白色外牆，再加上山水畫；大理有好多白族人居住，好多地方都可以見到白族建築，明天會見到更多






咩住個大背囊好型丫！

睇睇路牌先，見到我想去既「海地生活」啦；海地生活可以話係雙廊標誌，每一個自由行既朋友都會去海地生活到此一遊，我相信呢道出鏡略係成個雙廊之中最高，係唔係真係咁靚呢？


開始穿入小巷尋找海地生活；呢道睇落當地人多過遊客，感覺幾好丫夠晒地道，就好似去左鄉村一樣，自由自在向前走


去海地生活都需要行一段路，係小巷之中左穿右插，唔想行錯路就要好似尋寶咁四圍搵呢啲小小路牌；呢啲鄉村地方google map都幫你唔到，搵唔搵到路就要考眼力啦




跟住「暖暖」行都得


繼續行繼續行


好似就到啦！海地生活其實唔係旅遊景點，係一間青年旅舍+酒店，分為六個院住宿有平有貴，海地生活好似係雙廊第一個經營住宿既地方，所以可以話佢帶起左雙廊旅遊業，比更多人認識雙廊；我都想book呢道住架，不過full晒book唔到，太受歡迎啦


終於出到海邊！無論係邊道睇，蒼山﹑洱海都係咁靚






到左啦！原本我就係想住呢道，由睡房行出露台就有無敵大海景，超靚
佢話可以提早七日開始預計，我計好時間早七日打電話來book但都係book唔到...算啦住第道都一樣開心既


傳說中雙廊最多人影相最多人鐘意既地方就係呢道，呢兩張枱！呢道真係好多人，長期都有人係道影相，等左唔知幾耐先可以成功襯少少空檔時間影低一張冇人既相


唉...呢張失敗左，左右都有個影入左鏡...


橫掂咁難影，有人係道照影落去啦！好多美女都鐘意係道擺pose慢慢影，我唔理咁多照影落去！




以前有老人與海，而家有花花與海






影多張先


望住咁靚風景，咩煩惱都唔記得晒啦




狗仔都玩得好開心

要行返出去搵搵朋友


琴日係火車上識左一個朋友，到落車時大家就分開啦，我去雙廊佢去古城；本來故事已經告一段落，我係雙廊遊蕩緊既時候突然收到佢message話來雙廊搵我 食lunch，最後佢真係來左！呢個位比較難搵，佢搵唔到路我要行出去搵佢，但當我地相遇時，佢竟然唔認得我向我問路...包實塊面真係冇人見到架，哈哈 ^^


又再去到呢道啦


睇完風景就行另一邊路走，想返去我住個頭，不過啲小巷冇指示都唔知自己行左去邊，結果行錯晒路，行極都係地盤...兜個大圈先出得返去大路...








又再次去到海邊啦


時間已經係一點半，係時候食午餐啦，今次呢碗唔係米線，係大理特色美食「餌絲」，我係第一次食餌絲咋；餌絲同米線睇落好相似，有餌絲賣既鋪頭都會有米線 賣，但餌絲米線食落係有好大分別；餌絲質地煙韌，食落有少少痂牙既感覺；餌絲又唔可以話唔好食，不過我唔太鐘意呢種個口感，食落好奇怪，我都係鐘意爽滑彈 牙既米線多啲


食完就帶朋友坐車，佢又返去大理古城lu；呢道真係好耐一班車，等左勁耐先有車到


送左朋友上車，我就先返去hostel做返check in手續，仲有最重要既係要返去幫電話差電，部電話已經熄左機，完全同外界失去聯繫，都唔知好定唔好？不過費事媽媽打電話比我時搵我唔到，都係快啲返去差電


海邊有好多海景酒店




我在雙廊你在哪裡？講緊邊個你呢？


呢間酒店冇露台冇咁正


呢間就正好多啦


呢間仲大


感覺上好多女仔鐘意黎雙廊，好少見到男仔




一路影住相行返去








呢間酒店設計好特別，不規則形狀




又經過呢道啦，坐係道對住個靚海景食野真係一流，可惜冇機會體驗




轉個靚灣就見到hostel


四圍都有好多電動車同單車租，有左佢地就可以去環湖去其他城鎮都冇問題，原本我都有諗過踩下單車，但今次時間真係唔多，只得一日係雙廊，唔可以做咁多野啦，話明呢個係hea trip，點可以做呢啲辛苦野


Hostel對出就係應急避難場所，有咩事都可以走出黎，又幾安全bor，哈哈


返到來啦


處理好check in手續，交低40蚊房費，就入房放好個背囊；出到來無聊就幫hostel影相先，我真心覺得呢間hostel好正，建築環境靚係一個原因，最重要既係呢 道既職員實在太有趣啦，又好人又得意，係呢道住得好開心；以前我成日都話成都個間Lazy Bone Hostel係我住過最好既一間青年旅舍，睇黎佢今次有對手啦










而家三點半有咩做呢？我都唔知可以做啲咩，結果趴左係呢張枱之上訓著左，到訓醒已經係一個鐘之後既事啦，哈哈^^