0

大理。喜洲古鎮

平凡人 於 2014-09-08 00:13:36 發表  |  累積瀏覽 1624

分類:踩單車 長線旅遊 特色景點 古蹟 飲品美食 ;地區:中國

< 雲南大理﹑昆明6天遊 >


第四天

唔經唔覺旅行已經過左一半啦,今日天氣都係非常好,日日都遇見咁靚既藍天好幸運丫!


今日繼續早起身,六點鐘就已經起身啦,然後走到客棧天台,為既就係睇日出!6:20上到天台,太陽仲未出來,四圍環境仲係好黑


月亮準備落山啦




企係天台一路食風一路等;大陽未出來時天氣凍好多,大約十度多少少啦,而且大理好大風感覺特別凍,為左睇日出就要犧牲一下






繼續等繼續等;睇日出最靚既位置可以去海舌半島,又或者可以行去海邊,不過我又懶出去所以都係留係天台慢慢等




遠方開始出現紅色彩雲






太陽就係山後面,但仲未肯出來






等到6:50都仲未有太陽睇,我好似太早等啦




冇野做就影下雀仔,天空上好多燕子飛來飛去,真正「早起鳥兒有蟲吃」






天空開始變得金黃色






七點鐘,金黃色既太陽開始係山後爬出來啦






由未出太陽到太陽完全出來只係幾分鐘時間,日出好短暫丫








太陽已經飛左出來




望去另一邊已經出現藍天白雲,我相信今日一定會好天既




可以見到咁靚既日出,今日有一個好開始,睇到7:20就返去房間攤返上床啦


已經起左身就好難再訓返,係床上碌左一陣都係決定起身啦;係客棧入面影下相先,客棧有兩層,我就住係地下,一推開門就係花園




樓上有客廳有露台,一班人傾計就最岩




為左過下單車癮,係客棧拎左部單車出去飛下車先,一路沿環海西路向前踩






唔洗幾分鐘就出到海邊啦












呢條路好靚,風景一流








我太無聊啦,當部單車係model






見到我住既芒果小屋bor




路過琴晚食米線既地方,白色個間就係啦;客棧姨姨話呢道後面有排屋已經起緊,想吸引多啲人來旅遊,唔知將來會唔會多人好多呢?


踩單車都冇點影相,好快兜個圈踩完就返去客棧啦(左邊個條就係環海西路)






點解咁多人住架?我住呢日就人影都唔多個!客棧由兩個年輕成都女仔經營,但咁岩我去呢個時間其中一個女仔結婚,大家都離開左客棧幾日,無緣見到佢地...成間客棧就由一個武漢姨姨負責打理


同武漢姨姨傾左陣計,又係時候同呢道講byebye啦






由金圭寺村去返喜洲古鎮可以坐馬車,村口空地就可以上車,只係幾蚊;但我想睇多啲唔同風影就選擇行返出去,行另一條路經過金河村翔龍村等等鄉村,大約四公里就會去到喜洲古鎮


出發!


好多牆壁上都印左唔同口號




一開始係小巷之中穿梭,盡量向住我認為岩既方向前進,不過都試過行行下係掘頭路要行返轉頭






咁岩有村民坐馬車返屋企,馬車細細部可以係小巷之間穿插又幾方便


發現好多牛牛






繼續行






終於離開小巷,去到可以行車既大馬路






又係有好多標語口號










少部份牆壁之上畫有呢啲咁靚既畫,比起標語好睇好多




行左45分鐘,終於行到金河村村口位置,向前一直行就係喜洲古鎮


一望無際都係農田




路上有好多馬車經過,但我係唔會咁容易就比人引誘到上車既,我要靠自己對腳行出去








兩旁都係未開始耕作既農田,冇左植物既顏色感覺單調小小,遲啲種滿植物一定靚好多







路經一條小鄉村,呢道都係白族鄉村,但啲屋冇頭個道咁靚,明顯殘舊好多;只係相隔一幅田兩條村已經差得遠




好多馬車經過丫,如果將啲馬車改成古代馬車應該好feel好多,哈哈






離開鄉村繼續上路










開始種到野啦










大家都好努力工作










好多人一齊插秧






進入喜洲鎮中心,開始人多車多啦












喜洲市集之外停左好多馬車三輪車;由呢道坐馬車去我起步既金圭寺村唔記得係3蚊定5蚊一位,其實好抵架,最衰我冇搭過咁有趣既馬車啦




呢道係一個街市,食既用既咩都有得賣,可能呢個就係喜洲最大既市集,唔怪得住係好遠既村民都要坐車出來買賣啦








穿過市集就正式進入古鎮範圍,呢條係成個古鎮最旺既一條街,都唔算好多人,而且街上多數都係當地人,遊客寥寥可數










行左個半鐘,我又再次返到古鎮中心牌坊位置啦,今日個天睇落更藍更靚




終於有機會比我品嚐到喜洲白族傳統破酥粑粑啦,簡稱喜洲粑粑


「喜洲粑粑用麥麵做成,口味有甜、咸兩種,甜的夾玫瑰糖、豆沙、紅糖、白糖,鹹的夾鮮肉蔥花。甜口味雖然加了4種糖,吃起來最讓嘴巴敏感的味道卻是香,等香味溢滿了口腔,咽下肚了唇齒間才逐漸跳出些甜味,完全沒有甜食的膩口。無論甜、咸,制時皆用上下兩層炭火,將鍋內油炕著的粑粑慢慢烤黃,烤香直至烤酥。因此,喜洲粑粑的香酥而又軟和受人喜愛,且層次分明,宛若蒼山十九峰十八洞,美色可餐。」

喜洲粑粑係大理四大出名小食之一,大理好多地方都可以見到喜洲粑粑出現,但要講最正宗最地道當然係喜洲呢道既喜洲粑粑啦,全部現場新鮮製作,想唔好食都幾難




白色既粑粑好快就可以變成金黃色既粑粑,有導遊同外國人講呢個係「喜洲pizza」






突然出現咁多人既


喜洲粑粑5蚊個,我買左個咸既坐係出面慢慢食,熱辣辣又香脆真係好好食


大大個好足料架,一個字:正


食一個就已經飽啦,唔可以試甜個個lu,算啦;之後就好滿足咁起程離開喜洲


係走既時候,突然遇到琴晚一齊影月亮既老師,佢仲邀請我去到佢任教既學校參觀;我咁得閒就緊係話去啦,有人帶住唔洗煩仲有野睇,去睇下都好




穿過小巷,轉來轉去都唔知去到邊,最後去到學校啦




學校係位於喜林苑二號院--楊卓然院;呢間唔係普通既學校,而係一間由一位美國人經營,比美國小朋友讀書既學校!




學校由白族建築改建而成,可以見到三坊一照壁呢啲建築風格;係呢道遇到喜林苑創辦人Brian Linden,真係好好人,帶我四圍參觀,不過我普通話英文都唔夠人講,勁奇怪








邀請左我入去canteen食飯!好多學生係道討論緊唔知咩呢,佢地由美國來到呢個小小喜洲,大多數都係中學生,來到主要就係想中文,好多都係上一學期堂就會返去美國繼續升學;呢道既學貴都唔平架,同大家去美國讀書收費差唔多啦



呢道學生好少,大約二十個,二樓就係廳同課室;學校有幾位老師負責教唔同科目,而且幾位來自外國既老師都係美國名牌大學畢業,來頭唔細架,所以學生係呢道都可以繼續上美國普通課堂,完全唔會影響佢地學業




二樓小花園好正




離開學校穿過小巷去下一個地方參觀




嚴家寶城府暫時改建緊,將來會係喜林苑三號院,變成一間靚酒店




牆上寫有一段老舍文章<<滇行短記>>;老舍當年去到雲南後,1941年寫出文章形容當時對雲南既感覺
<<滇行短記>>第二十二段其中一節:
「喜洲鎮卻是個奇蹟。我想不起,在國內甚麼偏僻的地方,見過這麼體面的市鎮,遠遠的就看見幾所樓房,孤立在鎮外,看樣子必是一所大學校。我心中暗喜;到喜洲來,原為訪在華中大學的朋友們;假若華中大學有這麼闊氣的樓房,我與查先生便可以舒舒服服的過幾天了。及仔細一打聽,才知道那是五台中學,地方上士紳捐資建築的,花費了一百多萬,學校正對著五台高峰,故以五台名。一百多萬!是的,這裡的確有出一百多萬的能力。看,鎮外的牌坊,高大,美麗,通體是大理石的,而且不止一座呀!進到鎮裡,彷彿是到了英國的劍橋,街旁到處流著活水:一出門,便可以洗菜洗衣,而污濁立刻隨流而逝。街道很整齊,商店很多。有 圖書館,館前立著大理石的牌坊,字是貼金的!有警察局。有像王宮似的深宅大院,都是雕樑畫柱。有許多祠堂,也都金碧輝煌。不到一里,便是洱海。不到五六里便是高山。山水之間有這樣的一個鎮市,真是世外桃源啊!」


而家既喜洲有冇咁吸引就不得而知,但我相信當年喜洲真係一個好地方




大理白族其中一種傳統手工藝「紮染」






喜洲四大院之一既嚴家大院,保留左白族傳統建築風格,如果想了解白族建築可以入去參觀一下,不過白族建築我已經睇得多啦,所以就唔打算入去參觀,而我既老師朋友話唔參觀都冇損失


向前行準備去另一個大院參觀




前面個座大屋就係目的地,又係喜洲四大院之一--楊家大院




一入門口已經好有白族感覺啦!以前呢道係楊家大院,Brian已經將大院改建為喜林苑酒店,而且呢間酒店更加係全喜洲最高級最豪華既酒店,冇返千零蚊都住唔到一晚!






外表睇落去好舊,但入面設施好新好靚架,而家成日都講保育活化,我諗呢道可以話係一個成功例子








環境超靚丫






遲少少下面田地就會種滿農作物,一片綠油油一定好靚;呢道住左好多外國人架,就係因為老闆Brian咁鐘意喜洲,所以吸引到好多外國人來到喜洲旅遊,一個小小而且唔係太出名既喜洲就因為咁所以吸引到好多外國人到來



離開喜林苑,老師又帶我去第道參觀


去到又係四大院之一,琴日都有路過門口既董家大院(相中左手邊係入口);董家大院而家係一間賓館,不過佢實在太似一間賓館啦所以琴日行過左都唔知發生咩事,呢道正常可以入去睇睇,但今日話有貴賓到訪謝絕參觀(傳聞喜林苑想買埋呢道做酒店!)




都睇得差唔多啦,老師要返去準備上堂,就係呢道道別




我都準備離開喜洲,要行返出去大馬路坐車






車軑都可以咁用?










又再返到來古鎮中心




佢地買左超多粑粑,裝左好多袋




得返一個咋!買咁多食唔食得晒架?!


向大馬路方向前進




呢道有個「嚴家民居」景區,入面有表演有建築睇,大多數旅行團會來呢道參觀,而且因為入場費貴好多司機都會車人來呢道收回佣;不過呢道「嚴家民居」唔係真正既嚴家大院,只係發展商開發出來賺遊客錢既地方咋,歷史價值差太遠啦




出到古鎮入口啦




唔知兩個外國人係呢搞咩呢?


喜洲古鎮再見






出到來仲未有車可以坐,問人先知想坐車要再向南行幾分鐘,前面會有巴士站




巴士站就係古鎮另一個入口,即係市集個邊,呢道更旺好多三輪車停係路口等客




車站有車去唔同地方,而我去古城當然就係搭下關呢部啦


好快就可以去到大理古城啦^^我對大理古城其實冇咩期望,都係普通古城一個又唔覺得特別靚,來大理最主要既目的係想去雙廊同喜洲,呢兩個地方果然冇令我失望




鐘意SeeWide的分享,給我們一個Like吧!
  • 攻略日期:N/A
    攻略地點:中國
  • 攻略時間:1日以上
    是次消費:N/A
0人比"掂"
  • EEChan 於2014-09-08 00:59:42 留言
    呢處居然有咁多美國學生來學中文
  • 舉報 回覆
  • No.1
  • 小龍 於2014-09-08 11:34:09 留言
    引用自 '平凡人' 的相片:

    回覆:有d香港既似蔥油餅~
  • 舉報 回覆
  • No.2
  • mrsakwok 於2014-09-08 13:28:28 留言
    大理古城曾到過,印象不深,應該不及喜洲和雙廊。
    我完全不認識喜洲和雙廊這兩地方,想不到西方遊客比我們更知星,多謝分享!
  • 舉報 回覆
  • No.3
  • stellaluk 於2014-09-08 22:55:11 留言
    原文由 EEChan 於 2014-09-08 00:59:42 發表
    呢處居然有咁多美國學生來學中文
    中國文化的確有吸引!
  • 舉報 回覆
  • No.4
  • 平凡人 於2014-09-09 01:28:55 留言
    原文由 EEChan 於 2014-09-08 00:59:42 發表
    呢處居然有咁多美國學生來學中文
    我都估唔到咁偏遠既小鎮都有咁多外國人,佢地既中文標準到聽唔出係外國人架
  • 舉報 回覆
  • No.6
  • 平凡人 於2014-09-09 01:30:02 留言
    原文由 小龍 於 2014-09-08 11:34:09 發表
    引用自 '平凡人' 的相片:

    回覆:有d香港既似蔥油餅~
    都有小小似,呢個係更香口,好好食
  • 舉報 回覆
  • No.7
  • 平凡人 於2014-09-09 01:38:43 留言
    原文由 mrsakwok 於 2014-09-08 13:28:28 發表
    大理古城曾到過,印象不深,應該不及喜洲和雙廊。
    我完全不認識喜洲和雙廊這兩地方,想不到西方遊客比我們更知星,多謝分享!
    大理古城都唔錯,但我好怕多人,而家既古城實在太多人啦所以我比較喜歡喜洲﹑雙廊呢兩個地方,兩個地方都係洱海邊,真係好靚架大理本來都多外國遊客,我諗因為喜洲保留到更多白族傳統文化,所以更能吸引外國遊客參觀
  • 舉報 回覆
  • No.8
  • 平凡人 於2014-09-09 01:42:23 留言
    原文由 stellaluk 於 2014-09-08 22:55:11 發表
    中國文化的確有吸引!
    中國文化博大精深,好多外國人都好仰慕
  • 舉報 回覆
  • No.9
  • 平凡人 於2014-09-09 01:43:54 留言
    原文由 stellaluk 於 2014-09-08 22:56:36 發表
    日落很美!祝你佳節愉快!
    多謝我都祝你中秋節快樂
  • 舉報 回覆
  • No.10

最多能輸入300字

累積瀏覽 87748

全部攻略 126

全部回應 1394