0

大阪 與 神戶

平凡人 於 2014-09-16 01:20:00 發表  |  累積瀏覽 621

分類:長線旅遊 餐廳 特色景點 其他 ;地區:大阪,神戶

 < 大阪﹑京都6天遊 >


第三天

又一天新開始,琴晚真係訓得好舒服,相比前一晚機場簡直係五星級享受;原本諗住一早就出發,最後當然唔得啦,訓到九點好滿足咁起身,慢慢整理好行李再出發;行程第一站先用10秒行去對面郵局,買到傳說中日本Hello Kitty郵票,好可愛丫!再用兩分鐘行去附近既「黑門市場」


黑門市場同琴日京都錦市場一樣都係日式街市,可能時間尚早只係九點幾,人唔多




話明係市場當然咩都有得賣啦,隨意偷影下相














黑門市場有好多美食可以即時買來品嚐,壽司﹑魚生﹑水果﹑牛肉...越行越多人來,不過奇怪既係呢道聽到中文比率比起聽到日文機會更高,好多到黑門市場既都係旅客,仲好多人拎住一盒二盒士多啤梨,真係咁好食咩?原本都有諗過係道買早餐食,諗諗下都係走人算


行返去JR難波站方向,沿路都係商店街,但又係好多食店都未開門(呢間店名好有趣)


大阪街頭好多人都用單車代步,仲會踩得好快係行人路左穿右插,好得人驚!而好多地鐵站口都泊滿單車,不過係要收費,唔會貴唔貴呢?




一街都係黃葉,望到都覺得舒服


商店街仲未開門,一早仲係靜英英


又去到御堂筋啦,日頭果然好靚






嘩...冇呃人架真係一望無際都係銀杏,仲要係最靚最金最黃既銀杏,平時見好多朋友都會專程去大陸睇銀杏,原來大阪銀杏都唔差,係好靚好靚,點解可以四圍都銀杏咁靚架!






好唔捨得咁多咁靚既銀杏樹,今晚返來再探訪一下大家!離開銀杏就轉返落去地下街入難波站,朝早地下街行人唔多而且好多店鋪都未開門


JR難波站旁邊有間大型超級市場,好多野食賣丫!一時間花多眼亂?所有野食都好靚,買咩野食好呢?






簡簡單單買左個飯團,貪佢夠方便隨時都食得,坐係火車站等車時就可以食左佢;日本既飯團真係好好食,又平又多肉又多飯而且味道好正,返到香港太掛住飯團,係吉之島買左個品嚐,不過又細個D飯又硬又難食,都唔知想點


去到JR難波站,可以玩售票機買車票;部機好易用,只要選岩去神戶既價錢就可以買票;我仲有JR Pass繼續唔洗車費,而妹妹就要買車票lu


多謝690円,好貴丫


一路等車一路食早餐


坐一個站到「新今宮站」就要轉車;日本人都咁鐘意坐車玩電話


去到新今宮站,要轉乘大阪環狀線;我見坐外環(順時鐘方向)好似比較少站,所以就麻煩少少行過對面月台等車


日本鐵路會分唔同列車,之前去京都坐過特急,另外仲有快速﹑普通等等,視乎停站數目而定;下面綠色橙色兩部望落比較舊既就係站站停既普通列車




呢部望落比較新既就係快速列車(但又有機會係普通列車,哈哈)


路程唔遠我都唔理咁多啦,邊架快到就上邊架


最後上左架普通列車;唔好睇普通列車外表咁舊,入面好舒服,兩邊都係好軟熟既座位,而且座位之下有暖氣供應,一坐落好會覺得好暖好舒服


去到大阪站,又要轉車




今次要坐去姬路方向,咁岩下班就係新快速,咁就最好啦由大阪去神戶都有點遠




部車咁多人既


去到「三ノ宮站」又要再轉車
因為快速列車唔會停下個站,所以要係道等下一部普通列車;唔經唔覺去一去神戶都要轉三程車,好彩車站好多時都係用中文,指示好清楚唔需要擔心轉車問題;係三ノ宮站呢道竟然可以見到日本難得一見既火車delay!!


坐多一個站終於去到目的地「元町站」,但一落車就落大雨,今次麻煩啦


出到站仍然落大雨,冇帶遮想行都冇得行






好彩日本好興商店街,呢道鐵路橋之下就有一條,可以乘機入去行下避下雨


仲有好多餐廳,順便揀間岩心水先




仲有好大間遊戲機中心,日本好多呢D機鋪






行多兩行出到來竟然冇落雨不特只仲出埋太陽,天氣變得真係快;呢道都有好多銀杏樹丫,不過就掉左好多葉lu






四圍都有好野食


嘩...好多人排隊食神戶牛丫!我都知道神戶牛係好食但洗唔洗咁多人丫!我就冇佢地咁好心機慢慢排啦,留返多D時間去第道行下好過,我同神戶牛只能說係有緣無份


附近仲有大量餐廳可供選擇




全條後巷都係餐廳


記得以前睇小丸子,有一集講小丸子想黎香港食中華料理;其實我都唔知中華料理係咩?唔通就係普通既餸菜?之前見過有人話日本有一樣野叫「香港的士飯」,但好可惜搵唔到,唔可以睇到香港的士飯盧山真面目!


經過左咁多餐廳終於揀到間岩心水
呢間好有日本feel,而且偷望入面見到有好多日本人食野,我相信唔會好似琴日個間咁易中伏


坐係廚房前偷睇師傅煮麵
呢間餐廳用自動售價機,可以睇住圖揀野食,岩晒我呢D唔識日文而且唔敢出聲既獨男^^估唔到既係店員都識用廣東話同我打招呼,突然比佢嚇一嚇差D唔識反應,不過份外有親切感


妹妹叫既拉麵定食


呢個係我既
比起琴日個碗,呢碗拉麵好食100倍,終於係日本食到好食既拉麵啦!仲有餃子同飯都好好食!不過份量真係好多,我都係岩岩好可以食晒全份,妹妹就食唔晒啦,有少少唔好意思


食飽就繼續四圍行


呢道又係有好多商店街,買左D零食;日本買零食平過香港好多好多,如果知道個喼咁輕我一定買大量返來






行左一段時間幾經辛苦先係一間便利店搵到wifi,為既就係搵呢間鋪頭啦,原來之前都曾經經過,只係眼大睇過龍......


有一排隊bor,應該係好野啦




大家排隊就係想買呢個可樂餅/牛肉餅啦,外脆內軟真係好好好好好好食架!呢間店原本係售賣和牛,但機緣巧合下牛肉餅好受歡迎就兼顧賣牛肉餅,仲要係用和牛去造牛肉餅,比幾蚊就有正野食唔怪得咁受歡迎


越來越多人排隊


天氣都好返好多啦,有藍天又有陽光




山上個個咩黎架?


神戶都冇咩地方特別想去,係時候返去大阪




由三ノ宮站坐去大阪站


大阪站(梅田)係大阪其中一個最旺既地區,一出站全部都係高樓大廈﹑大百貨公司﹑大商場,如果想shopping呢道係必到




甚麼阪急百貨,太丸百貨...間間都好大間好豪華,只係睇阪急超級市場,裝飾設計都係五星級,雖然冇幫襯但都值得去參觀一下


好多人排隊唔知排咩呢?全部日文睇唔明


冇野岩我行,好快行完離開lu,坐車返難波;撞正放工時間人開始多,但就冇傳說中要迫上車




返難波站190円;咁神奇既,原來分開兩程買比一程買平10円,哈哈


又再次去到新今宮站轉車,天已經黑晒啦


好快又回到JR難波站;大阪京都好多車站都有洗手間,而且仲好乾淨,唔洗擔心搵唔到廁所~


再次回到御堂筋


呢座大廈有部跳樓機


繼續四圍行














御堂筋旁邊有一個叫「美國街」既地方,去望望先


美國街以賣年青人野為主,好多潮流服飾店鋪,不過我都唔係潮人所以唔岩我
唉...日本好似咩都唔岩我咁既?




呢頭好似有好多特色餐廳,如果有時間都想慢慢享受一下,但日本店鋪好早就關門,要趕係關門前買野所以暫時冇時間食野啦


又見到中餐廳


MOS BURGER唔係用紅色招牌既咩,見到綠色有少少唔習慣


呢間個名好正


妹妹行到咁夜都應該餓啦,路過便利店先買少少野食,遲少少先食晚餐


又去返大丸百貨,今次入去行下先


真係行下咋,都冇野岩買




又去到Hello Kitty商店,妹妹琴日已經揀岩心水,今日正式來買野啦;呢間Hello Kitty店好大有三層高,而且有好多唔同產品,仲有好多唔同地方限定商品都可以係呢道買到,真係花多眼亂唔知點揀好








基本上全店既野都好靚好想要,只係冇咁多錢冇辦法啦,只可以選擇唔太貴,而且又靚又有用既野,就係咁係道揀到差唔多關門先肯走,哈哈(我講妹妹咋唔係我!)






搞掂Hello Kitty,即刻用5秒時間行去對面agnes b,要買手袋送比媽媽
呢 道既店員又真係好好人,我地係道搞左成半個鐘,幫我地又上又落拎野,終於買到兩個手袋啦;但可惜既係店員唔太識講英文但又識國語,蝦我唔識國語><唯有全程都係由妹妹負責溝通><呢個咁難得可以同日本女仔傾計既機會白白冇左啦><點解以前唔好好讀書><


(係買手袋時有個疑似香港女仔因為信用卡比錢問題係道發顛大大聲X店員,唔係比佢個FD拉住都唔肯停口,我終於見識到香港人係外國有幾出醜!心諗有病就返去睇醫生啦,如果唔係妹妹係道我可能會上前X返佢轉頭,不過妹妹係道就唔搞事啦,哈哈)

買完手袋出到門口大約9:10,要趕係大丸9:30關門前趕入大丸處理退稅手續,好彩有驚無險順利完成


處理退稅手續既位置就係大丸百貨超級市場,見超級市場野食咁吸引就順便買埋晚餐食,因為都夜啦又拎住野懶得出去搵食;妹妹買左盒佢最鐘意既鰻魚壽司,佢話好好食


而我就買左盒豬扒飯,塊豬扒係凍冰冰不過味道都OK既
一路返酒店時想睇下沿路有冇串燒或者其他小食可以加餸,但可惜咩都見唔到


今次去日本都冇咩特別想買,最重要就係買左呢兩個袋比媽媽啦,哈哈
呢個牌子產品日本比香港平好多,大約係75折,而且仲有日本限定產品,之前媽媽係香港都睇岩左想買架啦,今次成功係日本買到,Yeah!


返來先知原來冇影到酒店房既相,所以係網上搵到下面呢張同一間房既相
酒店房真係好細,影相既位置已經係角位,不過張床就訓就好舒服,住得好滿意,可能日頭行得太累,兩晚都一訓上床就訓著啦,一覺訓到大天光


唔經唔覺好快就係日本玩左兩日,妹妹明天就要返香港,開心既時間過得特別快,如果可以玩耐D就好啦



鐘意SeeWide的分享,給我們一個Like吧!
  • 攻略日期:N/A
    攻略地點:大阪,神戶
  • 攻略時間:1日以上
    是次消費:N/A
0人比"掂"
  • 小龍 於2014-09-16 16:44:44 留言
    引用自 '平凡人' 的相片:

    回覆:成條街都係銀杏樹,真係好靚喎
  • 舉報 回覆
  • No.1
  • 平凡人 於2014-09-16 23:12:23 留言
    原文由 小龍 於 2014-09-16 16:44:44 發表
    引用自 '平凡人' 的相片:

    回覆:成條街都係銀杏樹,真係好靚喎
    我都覺得好靚好少機會見到咁多銀杏
  • 舉報 回覆
  • No.2
  • 1874飛飛 於2014-09-18 10:20:09 留言
    引用自 '平凡人' 的相片:

    回覆:應該唔準有聲
  • 舉報 回覆
  • No.3
  • 平凡人 於2014-09-18 23:22:02 留言
    原文由 1874飛飛 於 2014-09-18 10:20:09 發表
    引用自 '平凡人' 的相片:

    回覆:應該唔準有聲
    太家都好靜冇出聲架
  • 舉報 回覆
  • No.5
  • 平凡人 於2014-09-18 23:25:06 留言
    原文由 1874飛飛 於 2014-09-18 10:21:10 發表
    你既時間好啱, 見到咁多黃葉!
    我都唔知大阪原來有咁多黃葉,好開心
  • 舉報 回覆
  • No.6
  • 平凡人 於2016-05-08 21:00:52 留言
    原文由 林公子 於 2016-05-08 09:54:26 發表
    一編長到要睇十分鐘......正!!
    多謝
  • 舉報 回覆
  • No.8

最多能輸入300字

累積瀏覽 112278

全部攻略 126

全部回應 1394