每月一次嘅細胞小組活動，人人負責一次，一年裡邊永無走雞。今期唔喺小弟負責，不過，負責人忙爆，迆搞場飯局嚟交差，大家都明，反正邊食邊傾偈，志在一聚，搞乜都只喺個形式。地點由負責人話事，揀咗大家都方便搭車嘅又一城八月花，點菜亦由他人負責，小弟依時出席樂得輕鬆。
八月花喺美心集團中幾出名嘅品牌，專做中高檔粵菜，裝潢比較新派，一室嫣紅，富中國色彩，樓底又夠高，空間感十足。而此店一向好旺，今晚亦然，坐無虛席。
晌美心嘅粵菜餐廳，其實唔單止環境雅致，就連啲餐具都份外用心。
![bowl]()
餐前小食 $16
鹹脆花生搭鹹酸菜，感覺較潮州嘢，花生脆卜卜，鹹酸菜又唔無過鹹。晌等人期間，止牙痕嘅至佳小食，我哋7個人收兩碟錢。此外，茗茶收$12位，可揀普洱、香片、鐵觀音，另備有其他靚茶葉，但貴之餘兼逐位計。
![bowl]()
雙鮮燴南瓜 $118
今次頭盤無叫，一嚟就喺個「海鮮」菜式 - 雙鮮燴南瓜。雙鮮即喺蝦同帶子，前者又大隻，又爽甜，而後者軟腍味鮮。加入埋南瓜粒、紅椒粒、西芹度，並以豆豉一齊爆炒，味道惹味。
![bowl]()
嫩煎黑豚卷 $88
再嚟就喺「家禽‧肉類」，選了兩款，一道豬肉，一道牛肉。嫩煎黑豚卷個賣相就差啲，其實喺金菇肥牛嘅黑豚版，薄切黑豚肉，唔太肥膩，捲住好多金菇。不過，其實感覺普通啲，如果知佢好似金菇肥牛咁，相信大家未必會點。
![bowl]()
蟲草花黑椒牛柳絲 $78
近年興咗食蟲草花，晌網上搵搵，就知蟲草花含豐富蛋白質、氨基酸、甘露醇……等等唔多識嘅成份，總之就增強人體免疫力同提高人體抗病能力，確實有益嘢唔怕多食。除咗蟲草花，仲有牛柳絲、雞脾菇絲、翠玉瓜絲，整體食味不俗，爽口濃香。
![bowl]()
艷影紗窗 $80
「蔬菜‧豆腐」亦都叫咗兩款，一道竹笙，一道豆腐。個艷影紗窗做得幾靚，以竹笙作為「紗窗」包裹好多筍絲、菇絲、豆腐絲，切得極幼細，味道淡雅清新，猶如高級版腐皮卷。碟嘅兩角仲有毛豆、杞子襯托，一紅一綠，挺有詩意。
![bowl]()
天白花菰紅燒豆腐 $78
天白花菰大隻而厚肉，所以入口爽滑，而豆腐亦都非常嫩滑，以蠔油紅燒炆煮，濃郁入味。可是，份量似乎有啲少啊！
![bowl]()
一品砂鍋飯 $108
「單尾」嘅選擇，揀嚟一個飯，一個蘿蔔糕。雖然個砂鍋飯唔喺好多，但色香味全，首先一送嚟，打開蓋已香氣撲鼻，飯粒炒得金黃「勻巡」，飯內混有鴨肉絲、帶子粒、瑤桂絲，富咬口，味道又豐富。
![bowl]()
中山蘿蔔蒸盆糕 $58
咪被佢個「木盆」樣呃到，其實好細份，因為個糕盆好淺吓。不過，個蒸蘿蔔糕實在有料到，蘿蔔味極之濃郁，質感綿綿又唔削，味道又清甜，而且，糕面勁多瑤桂絲同臘腸粒，口感豐富。
甜品向來都喺八月花另一賣點，真喺好少中菜館有咁多甜唔選擇，有西式，又有中式，合共有成近20款，當中仲有唔少創意、特色，上次就已經試過101鮮果拿破崙 。由於今次唔喺我揸旗，就等各人揀選就好嘞，反正咩甜品我都啱。
![bowl]()
嫲嫲朱古力餅配雲呢嗱雪糕 $68
賣相跟足餐牌個模樣，無偷工減料，朱古力餅底有啲似班尼士，實質喺巨型美式朱古力曲奇，質感軟綿煙韌，濃重嘅朱古力味，又加入杏仁碎，如果你鍾意Mrs Field啲美式曲奇，依個朱古力餅應該好啱你。加埋5球雲呢嗱雪糕，足夠5、6個人分，一凍一熱嘅感覺，的確美妙。
![bowl]()
吾中吾西炸雪糕配蛋球 $32
一客有兩個迷你沙翁，兩個炸雪糕球，加少少桂花棉花糖襯托吓，賣相精緻立體。因為喺炸雪糕球，當然要食佢先，冰凍嘅雲喱嗱雪糕夾著熱呼呼嘅泡芙外皮，再次一凍一熱嘅美妙感覺，不過，確實溶得非常之快；而沙翁做得鬆軟富蛋味，香軟兼備。
八月花嘅菜式，可謂八面玲瓏，精巧細緻，變通靈活；而今晚，大家食得開心，談得暢懷，有個圓滿美好嘅晚上，用月圓花好嚟形容，都不為過喇！
個人評分
味道：8/10
環境：8/10
服務：8/10
抵食：8/10
平均每人消費：HK$150
餐廳資料：
八月花 Jasmine
九龍塘達之路80號又一城G層25號舖
2333 0222
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
八月花 Jasmine：八面玲瓏．月圓花好
八月花 (九龍塘店)
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)