年初趁有個悠閒嘅星期六，同老婆嚟到海運嘅麵屋武藏食晏。今次，又喺星期六，不過，唔喺食晏，而喺食晚飯，更唔喺悠閒，因為佢開完整日OT，所以先「專燈」出嚟一齊食餐好少少。
晚市較多人，要輪5個籌，不過，都好快有位。但喺，就坐唔到對維港嘅窗口位，我哋志在食，又唔喺要晌度迆（hea嘅正字，最近睇報紙學識），所以，咩位都唔緊要。
上次嚟，試過「蕃茄水牛芝士米紙卷」及「牛肉年糕卷」，又撞啱出咗款新拉麵「二刀流拉麵」，幾樣嘢都著實好食。今之又遇到有新拉麵「豚骨魚介醬油拉麵」推出，貪新鮮當然要試吓。再加兩款小食，及一個小碗炒飯，應該差不多。
![bowl]()
爆炸男爵沙律 $38
第一次試嘅時候，覺得好得意，所以，今次叫嚟俾老婆一試。送到嚟，點解唔見咗隻蛋嘅，追問侍應查個究竟，原來放咗晌下底，真喺奇怪，個賣相當堂普通晒。以沙律菜、青瓜絲、車厘茄為沙律底，配以柚子油醋汁，將所有材料撈勻即可，整體味道跟上次差唔多，入口清爽，又帶有蛋黃嘅甜香，只喺，炸北海道男爵薯仔絲落得太少，卜卜脆嘅口感就差咗啲，層次未夠豐富。
![bowl]()
明太子薯仔球 $38
老婆一向好鍾意食薯餅之類小食，所以，佢揀咗一客明太子薯仔球，可惜，對佢嚟講都幾失望，因為唔喺印象中嘅薯餅嗰種質感。一客3球炸得金黃嘅明太子薯仔球，外層沾滿麵包糠炸，咬落非常脆口甘香，不過，內裡質感頗為削身，比薯蓉仲要削，味道有點點辣，小弟就認為唔算太好食。題外話，用個不銹鋼兜作為盛器，極之樣衰。
![bowl]()
豚骨魚介醬油拉麵 $80
侍應介紹話依個喺人氣限定產品，今次喺載譽歸來喎，不過，見佢寫住「每日限定發售50碗」，我就覺得喺卓頭嘢啫。講番個麵，較上次個「二刀流」，餸料就顯得有啲失色，除水準依然嘅溏心蛋、筍乾、蔥花之外，就只有配上一大片叉燒，叉燒少肥而鬆化。麵條直身耐浸，食到尾都仍有一定柔韌度，麵質帶爽。然而，整碗麵最大亮點，其實喺個湯底，豬骨湯加入幾款魚乾及日本醬油熬煮成，再額外多加魚介粉，集濃鮮香於一身，啖啖精華，所以……一於飲勝！
![bowl]()
高菜叉燒小碗炒飯 $25
細細碗又幾好喎，等人試多少少小食，又有飯墊肚而唔會食得太飽。個炒飯炒得夠乾身，飯粒分明，又有好多野菜：紫菜碎、甘筍粒、洋蔥粒、菌粒，再加埋叉燒粒，口感豐富。
除咗個「明太子薯仔球」唔啱口味之外，其他3樣嘢食都屬水準中上，不過，始終有一樣嘢唔好食，所以，今次覺得只可以俾個OK佢好嘞。
個人評分
味道：7/10
環境：7/10
服務：7/10
抵食：8/10
平均每人消費：HK$100
餐廳資料：
麵屋武藏 虎洞 Menya Musashi Kodou
尖沙咀廣東道17號海港城海運大廈 LCX 3樓31號店
2735 8711
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
7
麵屋武藏 虎洞 Menya Musashi Kodou：豚魚大結局
麵屋武蔵 (紅磡店)
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)