晌大力棒棒摩登中菜幫姨仔、舅仔慶祝完生日，就由弟婦負責付鈔請所有人去Lab Made食分子雪糕作飯後甜品，估唔到分子雪糕嘅熱潮依然咁旺盛，晌鋪外一堆二堆客人，有排隊落單，有等候雪糕，更有正正品嚐緊雪糕嘅滋味。
分子料理晌香港發展已有多年，相信好多人都有一定嘅認知，而分子雪糕亦相信大家都知喺咩嚟，都唔使再多講咩喺液態氮……等等嘢。Lab Made嘅雪糕每兩星期都會轉款，每次都有4款口味，而每款味道都賣$44，標明每杯1.5球，不過
實際有多少球、球大球細就完全無標準，純睇彩數。
顯示屏標明每杯1.5球喎！
Lab Made嘅雪糕比較溶得快，所以店面都有個溫馨提示，此外，佢哋堅持真正全天然，不加人工穩定劑，相信俾個信心食客，等大家食得安心啲。
既然叫得分子雪糕，味道嘅突破喺一種賣點，往往喺出人意表、你估佢唔到嘅嘅味道，不過，今期嘅4款口味，個人就覺得非常普通，用唔用分子料理手法都做到。但既然一家人興致勃勃嚟到，又無理由空手而回唔試就走佬。我哋5個人，可以一次過試齊4隻味道。
其實晌等候雪糕期間，睇店員整雪糕都幾有趣味，將材料攪勻，加入液態氮，產生濃濃嘅煙霧，幾有科幻感，轉眼就為成雪糕狀態。
![bowl]()
無糖伯爵抹茶（使用代糖）
幾杯雪糕，以伯爵抹茶裝得最大杯，有相為證，豈止1.5球，足足有兩大球，抹茶味非常突出，伯爵茶味就若隱若現，似有還無之感，而質感挺軟滑。
![bowl]()
焦糖醬海鹽牛奶脆脆
點睇都睇佢唔出有1.5球，頂多都喺1球多少少，然喺加啲焦糖醬及星星脆脆，啲焦糖醬少到好似得幾滴，真喺唔知點解跟杯伯爵抹茶雪糕晌份量上有成倍落差。味道其實一啲唔差，柔滑嘅牛奶雪糕，慢慢滲出鹹味，焦糖醬實在太少，焦糖味半啖就無晒。
![bowl]()
薄荷朱古力脆脆
跟住依個薄荷味雪糕又出現番兩大球，原來最估佢唔到喺個分量，唔喺分子。再者，只喺薄荷味雪糕，淋上朱古力漿形成脆脆外層，真喺分子之名都幾虛。都喺嗰句，佢啲雪糕本質喺唔錯，只喺搞搞卓頭將一般味道升級化。
![bowl]()
極度檸檬蛋白脆批（雪葩）
哎呀，點解嚟到極度檸檬雪葩又會變番得咁少一杯，不過，都比個海鹽牛奶味雪糕多，貼近1.5球嘅標準份量。極度檸檬顧名思義，以超重酸味為賣點，而個酸味都夠晒酸爽清新，但就未至於酸到叫人瞌埋雙眼。面頭好似花塔餅嘅蛋白脆批，OK啦，甜甜脆脫咁囉。
小弟為人一向大事化小，小事為無，乜事都淡化咗就算，不過，今次嘅「氮化」就覺得流流哋，感覺喺純粹「卓頭」嘢，只喺搵液態氮嚟「急凍」啲雪糕漿，欠缺分子料理嘅精神，加上所試到嘅味道實在普通，再者，份量時多時少，認真求其，俾個OK都仁至義盡。
個人評分
味道：8/10
環境：7/10
服務：8/10
抵食：6/10
平均每人消費：HK$44
餐廳資料：
Lab Made 分子雪糕專門店
尖沙咀彌敦道132號美麗華商場地下G42號舖
2670 0071
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
7
Lab Made 分子雪糕專門店：氮化不力
Lab Made 分子雪糕專門店 (尖沙咀店)
旮旯 The Glock
旮旯 The Glock
茶墨 Tea Brush
T.O.P.商場地庫
La Famille (海港城海洋中心店)
滔滔甜品(井財街)
JUICY Fresh Juice Bar