一鍋 – 台日式精緻小火鍋專門店 iPot - The Shabu Shabu Expert：心有不柑

座落晌天后琉璃街嘅一鍋，鄰近天后地鐵站，交通極之方便。而店內環境簡單骨子，感覺舒適，無一啲做任飲任食火鍋嘅酒樓咁嘈。此外，以2、4人枱居多，適合三幾個朋友嚟聚聚。店員話為方便管理，分咗3個時段：6:00pm-8:30pm、8:30pm-10:30pm、10:30pm-12:30pm，不過，都解釋依個都唔喺硬性規定，如果當晚人客唔算太爆，都唔會太跟足個時段做嘢，早啲嚟又得，晏啲走都得，但如果撞正日子旺，就最好麻煩要依時交枱喇。

雖然以前個食評已寫過，都概略講講一鍋嘅收費方式。享用模式好簡單，一條方程式就明晒：湯底1鍋 + 肉類1份 + 配菜飲品自助 + 加送台灣啤酒1罐 + Haagen-Dazs雪糕1杯，而收費取決於所揀選嘅肉類。肉類分為4大類、5個級別價錢：

牛肉類
- 美國雪花肥牛200g（$198）
- 美國安格斯牛肩胛肉200g（$248）
- 美國安格斯去骨牛小排200g（$298）
- 美國頂級肉眼200g（$348）
- 澳洲和牛肉眼180g（$498）
豬肉類
- 培根豬200g（$198）
- 日本松阪豬肉200g（$248）
- 日本黑豚梅花肉200g（$298）
羊肉類
- 紐西蘭小羊捲200g（$248）
雞肉類
- 美國無骨滑雞肉片200g（$198）
此外，亦可以以優惠價再追加，例如第5級別嘅雪花肥牛、培根豬、無骨滑雞肉片都只不過$20 / 100g，其他為$30 / 100g（第4級別）、$50 / 100g（第3級別）、$80 / 100g（第2級別），而第1級別就當然喺最貴，追加價為$150 / 100g。（以上所有價格當然要加收10%服務費）

上述都喺基本套餐，仲有1款龍蝦 / 毛蟹餐，1人份收$398 + 10%，2人份收$738 + 10%，前者包括龍蝦或北海道直送毛蟹1隻，湯底1鍋，肉類4選1（牛小排、梅花肉、小羊捲或滑雞肉片），配菜飲品自助（加送台灣啤酒1罐），Haagen-Dazs雪糕1杯；而後者則湯底2鍋，肉類4選2，另再加一份海鮮拼盤（廣島蠔及帶子）。

湯底比以前所見多咗3款，依家一共有成11款：台式麻辣鍋、日式壽喜燒鍋、北海道牛奶鍋、養生蕃茄鍋、香濃咖喱鍋、牛骨湯、豬骨湯、素菜湯、冬蔭功湯、昆布麵豉湯、日式鰹魚湯。對上一次已試過日式壽喜燒鍋及養生蕃茄鍋，以後者做得突出且啱心水。

今次既然衝著新出品而嚟，就當然試新產品為首要目標，可惜，個古早柑桔雞鍋太受歡迎，是日沽清，幸而仲有上品花雕雞鍋，當然，未能一次試齊兩款新品，心裡總有點「心有不甘」嘅感覺。而依兩款新鍋收費模式跟基本套餐大同小異，包雞鍋1鍋，肉類4選1（牛小排、梅花肉、小羊捲或滑雞肉片），配菜飲品自助（加送台灣啤酒1罐），Haagen-Dazs雪糕1杯，食完雞鍋加湯再涮肉類及配菜，暫時嘅試食價喺$338 + 10%。

上品花雕雞鍋

估唔到，雞件份量不少，睇嚟至少都有半隻雞，可知道，依個喺一人份量嚟架。鍋內仲有洋蔥、芫荽、西芹等材料一起加熱，滾起再倒入一小杯花雕酒，即時酒香四溢。鮮雞件的確好味，嫩滑以外，帶微微酒香，據餐牌介紹，此養生雞鍋更有行氣活血、驅寒保健之效。

美國安格斯去骨牛小排

個上品花雕雞鍋嘅肉類揀咗牛小排，原來，因為個鍋有半隻雞，所以，份牛小排喺比基本套餐少一半，即喺100g，其實，過吓口癮已好夠食。安格斯嘜頭，喺品質保證，牛小排油花多而平均，輕灼後軟腍而肉味濃厚，正。

北海道牛奶鍋

依個牛奶鍋相對就簡單啲，採用北海道3.6牛乳，配合自家熬製嘅豬骨湯，加點杞子、紅棗之類藥材而煮成。湯底滑溜富奶香，鮮甜健康。唔需要擔心個牛奶鍋會越溝越淡，一鍋細心之處就喺每款湯底都有預備咗獨立嘅「補充湯底」，即喺北海道牛奶鍋會加番牛奶湯底，養生蕃茄鍋則加番蕃茄湯底。相反，由於水份蒸發，怕湯底會越滾越濃，加點水溝淡少少作平衡都得。

日本黑豚梅花肉

足200g嘅基本份量，梅花肉刨得超薄，色澤粉嫩，肉質細緻柔軟，睇落脂肪唔算多，配北海道牛奶鍋都好唔錯。

一人一鍋採用小型嵌入式電磁爐，無火既安全又無咁熱，開關及火力調較就晌枱邊，1-5度火力完全掌握閣下手中，完全自我操控。 

自助配菜

一入門口左右兩旁就會搵到所有配菜，等小弟一口氣講晒有咩啦（由下至上，並左至右）：白蘿蔔、芽菜、紫心番薯、板豆腐、蓮藕、雞脾菇、秀珍菇、金菇、雲耳、鮮冬菇、洋蔥、豆卜、龍蝦球、海鮮球、冬瓜、南瓜、芝士蛋、芝士包、蝦腐皮卷、沙律包、幸福包、香菇貢丸球、蟹粉蟹籽包、櫻花蝦片、干貝鮮蝦丸。另一邊廂，又有菠菜、油麥菜、小棠菜、娃娃菜及唐生菜，樣樣都翠綠新鮮；兼且掛有粉絲、出前一丁、日式烏冬、統一福麵，自家製拉麵等。全部任夾任食，拎多拎少，份量隨你心意。用料都頗新鮮，尤其啲蔬菜，個別丸類又幾特別，而自家製拉麵值得捧場。

自助飲品

一大雪櫃放滿多款支裝汽水，如可口可樂、雪碧、芬達、玉泉忌廉，此外，上層又有幾款特飲，是晚就喺水蜜桃汁、芭樂汁、荔枝汁，其實睇佢側邊放有好多名牌（烏梅汁、冬瓜茶柑桔檸檬……等等），就知啲特飲每晚都會輪流登場。至於額外送贈嘅台灣鳳梨味水果啤酒，試咗少少，跟飲一般嘅啤酒口感差唔多，只喺味道多咗一層菠蘿味，而且入口又甜甜哋，都幾有趣。

自助醬料

點解臨尾先介紹啲醬料？其實兩個鍋都唔錯，淥起啲肉或配菜都有味，食咗成晚，都無乜點沾過啲醬。不過，都介紹番吓佢哋有咩醬料提供，上層有麻油、黑醋、醬油、白醋、甜白醋，而下層有蒜蓉、麻醬、蔥花、乾蒜、沙茶醬、辣椒粉、芝麻、辣天椒及乾蔥。以前有生雞蛋提供，似乎依家無咗。

Haagen-Dazs雪糕

最後以甜品作結，每位客人都獲奉上一杯Haagen-Dazs雪糕，可惜只喺僅此一杯。味道有雲呢嗱、朱古力、士多啤梨、同忌廉曲奇。雖然只得一杯，但亦為今餐有個美好結束。

由於喺一人一鍋，真喺一時興起，一支公走過嚟涮個火鍋都唔喺咩問題，當然，始終三五知己一齊食會開心好多。雖然單以價錢而言，唔算好親民，但喺，計及整體質素，都仲喺可接受呢！再次感謝店方邀請，祝願小店繼續努力，做得更成功！

個人評分
味道：7/10
環境：7/10
服務：8/10
抵食：6/10
平均每人消費：HK$350

餐廳資料：
一鍋 – 台日式精緻小火鍋專門店 iPot - The Shabu Shabu Expert
天后琉璃街11號地下
2111 1241