2

京都。 嵯峨野小火車﹑嵐山

平凡人 於 2014-09-18 01:00:00 發表  |  累積瀏覽 933

分類:長線旅遊 特色景點 廟宇 ;地區:京都

 < 大阪﹑京都6天遊 >


第五天

又再次係關西機場渡過一個安全舒適的晚上^^晚上可能人流比較少,感覺上越來越凍,好彩本身自己都唔太怕凍,所以問題不大,而機場服務都好好怕凍可以去借用毛氈,咁就幾凍都唔怕啦;大約六點訓醒,同早兩日一樣整理好行李就出發去火車站,坐第一班前往京都既特急HARUKA;去到月台時列車已經到站,我都好快上車享受一下暖氣;可能琴晚訓既時間比較短,上到車等車長檢查好車票後我就好快訓著lu,直到差唔多到京都先訓醒,冇辦法啦火車比起機場更舒適,想唔訓著都好難,哈哈


今日應該有唔少香港人來到京都,一落車個個都好開心走到車頭影相留念,我都唔執輸一齊影


影完相其他人都係去出口方向,而我就要去旁邊月台上另一部車


行到列車旁邊既時候覺得有少少奇怪,點解明明部車都冇開門但車上面又有乘客既?望望上車既乘客先知道原來火車係總站係要自己按制開車門,上左車就要按制關門,咁就算出面有幾凍入面都唔怕凍啦,第一次見火車要自己開門,又幾有趣


上一班車迫滿成車學生想上車都難,呢班車就冇咩人;八點幾仲返緊學真係幸福,以前中小學要返八點,遇著當值就大獲七點半前就要返到學校,都唔知以前點可以咁早起身......


列車去緊一個小城市「亀岡市」,望見成個亀岡市只得一座大廈而其他都係平房,同大阪市差好遠,我都係鐘意呢D小城市,環境靚又舒服好多


到左落車地方「馬堀站」


車站兩邊都冇咩野,好多地方係農田,正丫




呢個馬堀站超出JR Pass使用範圍一個站,所以要補一個站車費180円,好貴


車站對出


有指示牌,我就係想去「トロッコ亀岡站」,跟住箭嘴行就冇問題


今日天氣好好,藍天白雲,係香港久違了的藍天




沿鄉村小路前進,路上行人唔多,但遇上禮貌既日本人會主動向我打招呼,始終鄉村生活比較淳樸,人與人相處少左隔膜,我就係喜歡呢種生活;平時我可以行得好快,而家都係收慢一下腳步,享受短暫田原風光


沿路好大片農田,配合一個藍天真係好靚,唔知田入面種左D咩呢?










如果有時間我會跳入田裡面玩下,不過今次要趕火車所以唔玩啦,要快D去火車站買火車票


熊本隻熊仔係呢道出現


呢個就係トロッコ亀岡站,嵯峨野小火車其中一個總站,話明係小火車個站都特別小


首先要上去二樓售票處買票,想坐第一班9:35火車


段時間唔係旺季,成功買到車票,如果係櫻花或者紅葉季節想即場買車票真係有難度,好似要預早一個月訂車票,或者一到機場就要買定,但都唔一定買到;而五節車箱入面其中一節車箱係全開放車箱,只可以係小火車車站即時購買冇得預訂,如果係影相睇風景就岩晒,不過天氣咁凍都係唔玩呢個啦,坐返普通車箱好D


由二樓望出去,見到好多好多田丫


車站月台




月台對出放有好多狸貓;日本好多地方都見到狸貓,因為日本傳說狸貓代表開運﹑福氣,而且就好似招財貓咁有招財作用,所以好多商店都鐘意係店鋪放隻狸貓招財,傳聞日本家庭都會放隻狸貓希望帶來好運,唔知係唔係真架呢?(叮噹都唔係好似狸貓咋?點解成日都比人認錯?)


火車軌兩旁應該就係櫻花樹,所以等到櫻花盛開季節呢道一定好靚好靚,坐住小火車係櫻花樹下穿過,我相信係一件好浪漫既事,哈哈唔知將來有冇機會體驗一下呢?


由月台望出去,隱約見到紅葉既痕跡,所有滿山紅葉既秋天來到一樣好靚


火車埋站啦


咁快有聖誕裝飾
唔知點解小火車比我既感覺好歐洲feel,就好似去左瑞士坐火車一樣,如果加埋落雪就正啦!Sorry我好似諗多左,都係快D上車先!


我個位係右手邊,比個太陽曬住tim


大獲...有個旅行團上來我呢卡,今次一定嘈到爆!全卡只有我旁邊幾個空位,都好多人搭丫,真係買定飛穩陣D


小火車準時出發,我最愛既火車之旅開始


一開始小火車就入隧道,並沿保津峽峽谷中間保津川旁邊行駛


沿路不斷穿過隧道;車箱都加左聖誕燈飾


可以清楚見到保津川,夏天好多人喜歡係保津川玩漂流,而定咁凍就請都冇人玩啦;火車旁邊見到好多櫻花樹,全條路都粉紅色一定超正




前面見到既橋就係JR線保津峽站,第一次見有車站起係橋上;之前坐車經過時都好想落車影下相,保津峽環境真係好吸引,不過呢道成二十分鐘先一班車,等下班又怕趕唔切上小火車,所以最終冇落到車......


有棵黃葉bor


好快停一停站,都冇人上落車


繼續前進,保津川變左黎右手邊,正!


成山都係灰葉,如果一個月前來到睇紅葉黃葉就perfect


仲有黃葉bor




都仲有唔少留低




河對岸深山仲有屋,呢個畫面好得意,車長都好識做每遇到靚景就會減慢車速比大家慢慢睇慢慢影,仲有專人介紹風景




望住咁靚環境,呼吸住清新空氣,人都輕鬆自在;有時候車長會出來唱歌,大家唱下歌睇下風景好快就完成二十多分鐘小火車之旅


大部份人都會係嵐山站落車,而車長都好好客忙全同大家影相;今次小火車之旅好開心,我都係第一次坐呢類小火車,小火車開行時唔似普通火車咁平穩,係好搖而且有好大嘈音,不過正正因為咁先覺得小火車有獨特風味,係普通火車唔會有,而小火車行得夠慢,可以慢慢欣賞美景及穿越山林之間,真係一次難得體驗


嵯峨野小火車之中嵯峨兩字平時可能較少見,其實嵯峨係解山勢高峻,好多好多山既意思,就正正係呢條小火車鐵路寫照


小火車離嵐山站而去,向總站邁進






火車一走,大家都離開啦,月台開始變得冷清






不過...等左一陣比我等到佢返來啦


冇人同我爭位影相,Yeah!




再次目送佢離開
原本我都冇諗住等佢返來,但站長行出來同我講火車仲有十分鐘就到,咁就等埋啦,哈哈




行上去車站大堂離開,呢個只係一個小小既車站


「嵐」字係日文中解做暴風雨,即係呢座係暴風雨山?好彩冇遇到暴風雨


附近有好多靚地方可以參觀,可惜時間唔多唔可以一一欣賞,能夠坐小火車已經好開心,而家要行返去JR站坐車啦


首先去竹林步道












竹林就有啦,不過就差左深處人家;嵐山有好多竹出產,所以亦都有好多用竹做既產品出產,竹籃、竹杯、竹盒、竹墊等等


竹樹真係好高,高到連個天都睇得唔清楚,係道散散步都唔錯


行返轉頭離開竹林步道,周圍既樹都生得好大棵




行去另一邊有個好靚既湖




沿湖邊行,人都唔多個,呢種感覺其實好冷清








有咁靚既樹葉陪伴,幾凍幾冷清都唔怕啦




唔知仲有冇人住既呢?又會用竹簾做窗咁得意?


呢間仲正,隱藏係植物之中,環境一流


行左去唔知咩地方,再向前行就會到二尊寺,不過之前都去過清水寺,相信日本寺廟建築都係大同小異,所以唔特別去參觀,隨意望望四處花草樹木就好滿足啦




轉向JR站方向,又見到美景


外國人都係道影相,有咩好睇呢?


原來係一家日式民居;可以住係一個咁靚既環境真好,有一間大屋,又有咁靚既花園,而且一打開窗就可以見到咁靚既紅葉,唔怪得日本人咁長命啦,我都想住係咁靚既地方


種左好靚既日本蕃茄仔,係香港買好貴架




周圍環境都好靚


同清水寺一樣,呢邊都可以坐人力車參觀,見D車伕會一路行一路講解,當係請個導遊都係一個唔錯既選擇,而且好多車伕都係又大隻又靚仔,唔怪得大部份乘客都係女仔啦,哈哈






藍天白雲真係好靚,好開心可以預到咁好天氣,不過有位遲我一日到京都既朋友就冇咁好彩,遲一日京都已經落雨啦






繼續穿越民居之中;係京都唔需要特別去邊D地方,隨街行都可以發現美景處處,目不暇給




繼續去JR站,即野宮神社方向前進


繼續行繼續行




好多老人家玩草地滾球,真係咁好玩?屋企樓下都有個草地滾球場,又係有好多老人家玩


呢個係小狗公園?




繼續行繼續行






有一間竹廠,唔知有咩出品呢?


有個平交道係前面,香港除左輕鐵之外就冇平交道


基於大鄉里出城心態,企係上面玩下先


前面隱約見到有兩盞火車車頭燈,唔係有車黎緊掛?


係火車到之前,會有警告聲響而且著紅燈,欄杆都會跟住落擋住馬路,我都係唔玩住走人先,真係有車黎緊


原來係小火車,自落車後第二班火車到lu,原本我係呢就遊蕩左一個鐘


第一卡就係開放式車卡,冇窗只有欄杆


後面四卡就係普通車箱


小火車走左後幾秒欄杆再次升起,我又可以再行返出路軌;下一個平交道都見有汽車橫過路軌


嘩...警報聲再次響起,走得快好世界,今次黎左部行得好快既JR列車


離開路軌,前行幾步就係野宮神社


「野宮神社奉祀許多神明,包括中央正殿祭拜的健康及智慧之神「野宮大神(天照大神)」;右邊是祈求多子多孫、順利生產、事業發展的「白福五稻荷大明神」,以及財運亨通、學藝進步的「白峰辯財天」;左邊則有「龍神」能救護生病之人,還有「野宮大黑天」保佑信徒締結良緣,據說只要摸野宮大黑天旁邊的神石「龜石」, 即可實現願望。」


野宮神社最出名就係求姻緣同學業(都係返左香港先知),咁我又冇求錯bor,正所謂入屋叫人入廟拜神,我咁岩係道幫左妹妹求求學業,希望真係有用啦


D水係唔係比人飲既呢?


呢道唔似其他地方用竹籤來求籤,隨意拎一張籤文就可以,好方便;呢個方法望落去好似兒戲左少少,但我相信唔理咩形式,只要真心向善神都會保佑你


呢邊求戀愛成就
都話過戀愛呢樣野冇我呢D獨男份架啦,過來八卦下就算




無論係良緣以及學業都掛滿許願卡,祝大家都心想事成




我應該要買返左學業御守送比妹妹先岩,但當時醒唔起結果冇買到


野宮神社唔大,一眼都可以睇晒,不過善信唔少,好多人都會係野宮神社求籤祈願,我都係跟住其他人先知道日本神社參拜方法,係一次好好體驗;當時其實唔認識野宮神社,只係我亂行之下無意間相遇,都算係我同神社既緣份;離開野宮神社就沿路向前走




好快就出到大路啦,有商店有餐廳;見到有野食賣先醒起自己仲未食早餐,順便睇下有冇野岩食先,不過又唔餓都冇野特別想食,咁唔買野食lu,早兩日買左排朱古力係背囊,拎出來一路行一路食先








就到火車站啦,向左邊行就得;但向左行真係一個好錯既決定,如果向右行就可以去到「渡月橋」;本來我都已經知道渡月橋係京都一個好出名既地方,但我諗而家渡月橋個邊未必有紅葉睇所以就懶行過去,直到返到香港見其他人介紹先知渡月橋原來係咁靚咁有歷史價值,而渡月橋旁邊既日本古代建築都好靚,真係好後悔冇行過去,唉...而家講咩都冇用......!!!




再穿過民居地方,呢道既民居比起頭先見到既都新式同現代好多,不過兩者都係一樣散發住日本味道






經過一個比較大既平交道




仲見到小火車總站


火車站旁邊突然出現一個蒸汽火車頭




咁岩見到個郵筒就先將寫好既postcard放入去,日本既郵筒都係細細個,冇香港咁大


終於到達JR嵯峨嵐山站,嵐山之旅係時候完結啦;嵐山之旅雖然冇去渡月橋有少少美中不足,但可以坐到小火車,可以見到咁靚既風景我已經好開心啦


坐車返去京都方向,不過就唔係去京都






望住駕駛室,感覺同電腦入面模擬電車駕駛遊戲一模一樣,不過我玩既時候經常都泊唔岩位又追唔到時間,所以我衷心覺得列車司機非常厲害,可以係全人手控制之下都咁準時咁成功泊好每一個站,唔寫個服字都唔得


原來係車掌唔係車長;列車入面會有兩位車掌,車頭負責駕駛列車,車尾負責列車上廣播,大家分工合作,前車掌就可以專心揸車


好快就到「二條站」落車


見到二條站呢個名我諗都好容易估到我將會去邊個地方,不過落左車仲有一段好遠既路要走,要加油喔快D行過去!



鐘意SeeWide的分享,給我們一個Like吧!
  • 攻略日期:N/A
    攻略地點:京都
  • 攻略時間:1日以上
    是次消費:N/A
2人比"掂"
  • 林公子 於2014-09-18 02:28:02 留言
    同我一樣,專係去埋D 山卡啦地方,
    我12月先去坐小火車
    你有冇旅遊書借我XD
  • 舉報 回覆
  • No.1
  • 炯仔的天空 於2014-09-18 11:29:31 留言
    原文由 林公子 於 2014-09-18 02:28:02 發表
    同我一樣,專係去埋D 山卡啦地方,
    我12月先去坐小火車
    你有冇旅遊書借我XD
    山卡啦地方
  • 舉報 回覆
  • No.4
  • MIKOB 於2014-09-18 16:15:12 留言
    我11月尾去大阪呀, 呢度好正呀!!
    不過好似好遙遠~~~~~
    BTW, 我超級怕凍
  • 舉報 回覆
  • No.5
  • 平凡人 於2014-09-18 23:37:24 留言
    原文由 林公子 於 2014-09-18 02:28:02 發表
    同我一樣,專係去埋D 山卡啦地方,
    我12月先去坐小火車
    你有冇旅遊書借我XD
    哈哈,我既旅遊書都係去圖書館借咋師兄你咁有旅遊經驗唔洗旅遊書都冇問題啦預祝你有個愉快旅程
  • 舉報 回覆
  • No.6
  • 平凡人 於2014-09-18 23:39:55 留言
    原文由 stellaluk 於 2014-09-18 07:46:46 發表
    那一大片竹林看得令人舒服呢!
    我都覺得好舒服個道有個名字叫竹林步道,全都係好高好高既竹,感覺好正架
  • 舉報 回覆
  • No.7
  • 平凡人 於2014-09-18 23:41:15 留言
    原文由 EEChan 於 2014-09-18 11:05:32 發表
    呢D地方好吸引
    真係又靚又吸引,環境一流
  • 舉報 回覆
  • No.8
  • 平凡人 於2014-09-18 23:49:26 留言
    原文由 炯仔的天空 於 2014-09-18 11:29:31 發表
    山卡啦地方
    山卡啦先有原始靚景
  • 舉報 回覆
  • No.9
  • 平凡人 於2014-09-19 00:13:23 留言
    原文由 MIKOB 於 2014-09-18 16:15:12 發表
    我11月尾去大阪呀, 呢度好正呀!!
    不過好似好遙遠~~~~~
    BTW, 我超級怕凍
    呢道唔算遠,係京都站坐JR就可以到達,有時間去下啦著多件衫就唔怕凍11月尾紅葉應該好靚,玩得開心啲啦
  • 舉報 回覆
  • No.10

最多能輸入300字

累積瀏覽 112340

全部攻略 126

全部回應 1394