日期：08年5月21日
地點：紐約（Coney Island）
嚟咗紐約兩日，總是下雨，唔通連個天都唔鍾意我？梗係唔係啦，到咗第三日，天色開始放晴，跟住到我離開美國，一滴雨都冇，真係天公造美（點知一返嚟香港，就日日落雨）。
難得好天，即刻到超市買麵包飲品，坐喺 J 家之前園食早餐，雖然面對馬路，但基本上冇乜車行過，我同史提芬就一邊歎早餐一邊看藍天，這麼悠閒的生活，好似好耐冇試過！
坐在前園，曬住太陽歎早餐，講真喺香港未試過！
難得好天，冇理由仲行商場啫！於是我們向Coney Island進發，雖說是「Island」，卻並非島嶼，坐地鐵亦可直達，不過位於布魯克林區（個名係咪好熟？碧咸個仔咪叫布魯克林囉）的盡頭，要坐足個幾鐘，坐到人都癲！
我們先由 J 家坐巴士去地鐵站，這裏的巴士多是單層，假如有地鐵套票的話，不用另外付錢，不過落車時後門不會自動打開，要自己推門！
坐足個幾鐘地鐵，都幾惡頂，好彩架車冇乜人，又夠新淨，而且到咗布魯克林就係架空，感覺舒服好多！
終於來到Conely Island了，這裏是紐約市最近的海灘，面向大西洋，以前紐約人一到假日就會嚟玩，所以呢度有行人步道，好多人鍾意嚟放狗、踏單車、跑步，仲有個機動遊樂場，不過啲機動遊戲全屬「幼稚園」級數。其實近年Coney Island已經開始衰落，不過我反而鍾意呢種悠悠閒閒，舊舊地的氣氛，就好似荔園加赤柱的混合體！
一出地鐵站，即見一幅壁畫，好有幾米Feel，其實紐約大街小巷，經常都見到一啲好靚既壁畫或塗鴉。
呢座紅色塔係Coney Island地標，喺藍天之下特別搶眼。
沙灘上有好多海鷗，唔係好怕人，任你影。
當日海灘未開（所以見唔到三點式美女，可惜），一對情侶就坐喺救生員的座位上看海，好溫馨。
仲有人喺海灘健身，好似洛奇上身咁。
呢個摩天輪亦係呢度的地標。
旋轉木馬呀！即刻令我諗起荔園。
仲有過山車添，不過係幼稚園級數，不玩也罷。
步道上有不少裝飾，呢條魚畀人分屍，好慘！
步道上設有枱櫈，畀大家休息！
海灘旁邊仲有涼亭，不過不設座位，要人齋企！
近年Coney Island最為人認識的，就係一年一度的鬥食熱狗比賽，亦即係小林尊年年橫掃嗰個比賽（近兩年終於輸咗）。主辦機構就是Coney Island著名熱狗店Nathan's，一隻熱狗都幾貴，要成US$2.99（即港幣廿幾蚊），通常紐約市內一隻熱狗都係一蚊左右咋，不過難得來到，一定要試試，我們點了熱狗同炸魚薯條，然後就在露天座位慢慢歎，咁好風味，梗係覺得滋味啦。
呢間就係Nathan's的元祖店，招牌仲好有舊日美國情調！
我們就在這些露天座位歎熱狗同炸魚，好有風味架，不過大風咗啲！
一件熱狗US$2.99，炸魚薯條US$5.99，貴咗少少！我們不是小林尊，基本上都夠食。
除咗Nathan's之外，沿住海灘仲有唔少食肆、紀念品店同「歡樂天地」！
臨走仲見到呢種黃色校巴，即係《花生漫畫》經常出現嗰種！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
