第14屆世界盃
年份：1990年6月8日至7月8日
地點：意大利
名次
1.西德
2.阿根廷
3.意大利
4.英格蘭
‧主辦國
意大利成為主辦國，加上那時意甲水準冠絕全球，意大利也一直成為大熱門，在賽事中，意大利表現不俗，前鋒卡沙拉基不斷入波，龍門辛格一直沒失波，點知準決賽失第一球，就要出局，難怪不少意大利人皆心傷透。
‧賽制
這屆賽制沿用上屆，每組首兩名出線加最好成績的四支第3名躋身16強，然後再採淘汰制。
‧主題曲
這屆大會主題曲是《Un'estate Italiana》，即是英文版的《To be No.one》無綫沿用此曲，改成《理想與和平》，由譚詠麟主唱，其中幾句「To be No 1，飛奔採晚星……」都幾搶耳，不過中文歌詞就老土咗啲！亞記仲勁，搵個唔識唱歌既曾志偉主唱《勝出是時候》，改編自《Lambada》（即《人生嘉年華》），其中一句「十九比九，十九比九，唔會夠，唔會夠」，又幾好笑。
‧吉祥物
這屆的吉祥物叫Ciao，唔係動物，好似扭計蛇，不過設計幾得意，我鍾意。
‧世界盃形勢
這屆其實沒有太多星味，我甚至連巴西隊一個球星的名字也記不起，第二輪被阿根廷送回家，雖有點無運，但也不算可惜；英格蘭可能是我看球以來最強的一隊，後面有施路頓，中場有華度、肥仔嘜加斯居尼加埋柏列，前面有連尼加，可惜還是與冠軍沒緣；意大利是大熱，門將辛格還破了不失球紀錄，前鋒卡沙拉基成為神射手，但都星味不足；阿根廷馬勒當拿爛船仍有三斤釘，但真正英雄是後備門將哥高查，呢條友專救十二碼，阿根廷靠互射十二碼過吓一關，過吓又一關，又畀佢入咗決賽，我記得一位台灣作家後嚟寫：「讓這種球隊奪得冠軍，大概沒有宗教可能導人向善了。」幸好最後還是敗於西德，證明天有眼，西德由初賽開始即顯現冠軍相，捧盃合理。
‧傳播媒介
這屆無記同亞記都有得播，我那時是捧無記的，不過睇見無記以何守信為首，評述陣容：潘宗明、何鑑江、鍾志光、陳譚新……以「專業」為號召，真係有啲唔開胃，初賽仲要拍咗段promo，影住班評述大頭懶型黑白相，簡直想嘔；至於亞記陣容其實勁好多，由黃霑自稱「執波仔」的外行做主持，仲有當時為亞視講德國波的林尚義，再加尹志強（這三位皆已離開大家，真係令人感慨）、曾志偉、陳炳安、李德能等，又搵嚟明星足球隊助陣（決賽特別請了「波霸」葉子楣贈興），既熱鬧又夠專業，林尚義捧西德，尹佬捧荷蘭，好好玩，基本上呢個製作方式影響至今，無記同有線都係行緊呢條路。
呢屆亞視也使出怪招，喺比賽時唔播廣告，開頭無記為咗廣告利益唔肯制，點知Miss咗幾個入波後，搞到收視大敗，最後都係要學亞記，收視最後才勉強拉成五五之比。我哋而家睇波無啲廣告阻住晒，都係多得亞記！
‧難忘一刻
--十六強之戰，南斯拉夫對西班牙，南斯拉夫好好波既史杜高域，有一球作勢凌空抽射，點知原來係黐個波落嚟，呃晒龍門，先至慢慢射，好波到吖！
--十六強之戰，英格蘭大戰比利時，戰至120分鐘，兩隊仍無紀錄，心諗要射十二碼，咁英格蘭就弊嘞！好彩最後一刻，柏列在右邊近底線窩利射入金球，即時放心晒！
--歐洲冠軍荷蘭今屆表現好差，搞到十六強就要對西德，比賽中列卡特仲向禾拉玩大吐口水，仲幼稚過細路仔！
--阿根廷對巴西一戰，阿根廷全場被對手壓住嚟踢，巴西又中柱又中楣，硬係入唔到，跟住阿根廷靠馬勒當拿一記妙傳搞掂，贏得有運！但賽後亞記評述何靜江即刻「馬後炮」大讚阿根廷踢得好，有人即反駁話「巴西中柱中楣，仲話阿根廷守得好？」何仲反駁話：「就係守得好，先迫到佢哋中柱中楣吖嘛！」真係你講晒！
--今屆第二輪真係幾多過癮場面，例如喀麥隆對哥倫比亞，哥國門牌希基達學人扭波，畀老鬼米拿倫走射入空門，真係大快人心，我記得一位評述即刻話：「大家都等咗呢一刻好耐咯。」
--喀麥隆淘汰哥倫比亞後，同英格蘭爭入四強，當時我心諗，對住非洲球隊，英格蘭贏硬啦，點知踢到中段，喀麥隆反而控制戰局，跟住仲反先，英格蘭落後下反撲無力，我心都實晒，緊張到熄咗電視唔敢睇，哈！忍唔住開番電視，英格蘭竟然有球十二碼（後來睇番，好似喀麥隆送既），我都唔敢望，好彩總算射入，跟住又多球十二碼，時已半夜，好興奮但唔敢嗌，真係忍得好辛苦！
--準決賽英德大戰，英格蘭踢出超水準，雖然先失波（呢球西德超幸運），但好快就追平，加時既時候，華度仲有球靚波中柱，真可惜，到咗射十二碼，西德果然係英格蘭既剋星，唉！
--到咗決賽，阿根廷對西德，上屆我捧阿隊，今屆梗係寧願揀西德贏啦！不過西德攻極唔入，真係有啲驚：「唔通又係互射十二碼，又畀哥高查表演？」好彩跟住阿根廷又輸十二碼又領紅，西德先至險勝，其實嗰球十二碼有點商榷，大概連球證都唔想阿根廷贏？
‧難忘人物
--肥仔嘜加斯居尼今屆異軍突起，成為英格蘭最搶眼的球星，也可能係近十幾廿年，英格蘭最具天分既球星，佢唔單只好波，仲好有真性情，睇佢對西德領黃，就算球隊入決賽都唔出得時，佢即係喊出嚟，真係得到好多同情！
--今屆最多人講既應該係希基達同米拿，一個係門將但鍾意扭波，一個四十歲仲打前鋒，今日既球壇，好似少咗呢啲咁有個性既員。
--今屆最佳球員，無疑係馬圖斯，喺中場又攔得又傳得又射得，不過我更加喜歡默默耕耘既布林美，特別係決賽，西德獲得十二碼，馬圖斯竟然騰雞，好彩布林美不負所托。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
