1

北京。天安門廣場﹑人民大會堂﹑故宮﹑景山公園

平凡人 於 2014-09-22 02:00:00 發表  |  累積瀏覽 592

分類:長線旅遊 特色景點 古蹟 攝影 ;地區:中國

< 北京﹑西安﹑成都﹑雲南23天遊 >


第三天

北京第一個早晨終於來到,但與其話係早晨,我覺得用凌晨更加貼切,因為半夜四點鐘就已經起身,好快就出門口lu;由於要趕住出門口,頸巾都趕唔切搵出來,諗起琴日都唔係太凍,又唔想阻大家時間,所以就唔搵住啦,只係著左底衫+t-shirt+風褸3件衫;五個人就係一個黑媽媽既晚上開住電筒出發


未天光地鐵已經開始營運,我地就坐地鐵向天安門廣場出發,我諗大家都估到我地幾個去做咩啦?不過呢啲咁辛苦既活動我只會去一次,一定唔會去第二次!出到天安門地鐵站有煎蛋餅早餐賣,買個食下先;大約六點半去到天安門廣場,已經有好多人等緊啦


為左霸頭位所以咁早出門口,一直等一直等,好唔容易咁等到天光,但仍然係等等等等等


好難得可以霸到頭位,但呢個頭位就慘啦,戇居居食足一個鐘西北風,而且面對人生以黎最凍既天氣,凍到震都算啦,凍到手指腳指已經冇咩知覺,我仲諗會唔會凍死係北京呢?!如果可以比我行來行去都唔會咁凍,最衰係要人企定定係道唔走得...真係會變雪條!


挨到七點半終於有人行出來;咁凍既環境我都懶拎相機出來,借用朋友影既相












好快就睇完升旗,襯仲未凍死就即刻走人;沿天安門廣場旁邊行,見到有一間餐廳就衝入去暖一下先再打算,順便食返個暖笠笠既早餐^^總算係挨過最艱難既時間;大家食飽早餐又可以繼續去玩啦,而我地幾個都分返開各自去自己想去既地方


我同朋友兩個再次進入天安門廣場;而家有少少陽光,而且我又不斷行緊郁動緊,已經冇剛才咁凍




好宏偉既正陽門,就算用現代眼光去睇正陽門都依然覺得宏偉,可想而知五百幾年前明成祖時期興建正陽門係幾大工程;正陽門係個時開始就一直屹立係北京城南北中軸線上,守護北京安全




正陽門南面不遠興建有同樣宏偉既箭樓;箭樓聽個名就知係用來射箭,加強北京防禦能力;以前箭樓同正陽門中間有一座大瓮城,由於城市發展瓮城已經係1915年被拆除,而家我地就只可以見到正陽門與箭樓孤單地聳立係中軸線上


天安門廣場真係好大,不過暫時唔行住啦先去其他地方參觀一下,之後再返來都未遲,而家先去人民大會堂參觀;遠睇人民大會堂真係好大


「人民大會堂坐西朝東,東西寬206米,南北長336米,高46.5米,佔地面積15萬平方米,建築面積17.18萬平方米。建築平面呈「山」字形,外部是淺黃色花崗岩牆面,上有黃綠相間的琉璃瓦屋檐,下有5米高的花崗岩基座,四周共有134根圓形廊柱。總建築面積比北京故宮的全部建築面積還大,是全世界最大的會堂式建築。」

買好門票就可以進入啦


首先去到大堂,一望就覺得好有舊式感覺,不竟人民大會堂係上世紀五十年代建築,當然保留住五十年代風格,以當時五十年代建築黎講人民大會堂係好豪華好宏偉


先行去南面;人民大會堂南面係以各省市命名既大廳,以下就係湖南廳






唔同地方既大廳都用當地特色佈置,分唔分得出邊個地方呢?










睇過好多唔同既廳,不過講真我就冇咩興趣啦,睇落又唔係好特別,叫做到此一遊


黎到人民大會堂最有興趣參觀就係呢道啦,位於中間既萬人大禮堂;真係好大好誇張,唔知係唔係真係可以坐到一萬人咁多?


三層高座位坐滿人真係唔講得笑,如果大家一齊拍手現場一定好震撼!雖然睇落好似有少少牙煙,但不得不佩服五十幾年前已經可以整到咁大場面,而且整個人民大會堂只係用左十個幾月時間興建,速度好快好快


不過座位望落就好似有少少硬,唔知坐落去舒唔舒服呢?(最衰個時冇去試下坐,我都唔知答案)


出返外面,前面就係人民大會堂北面一個好大既宴會廳,不過呢啲重要地方唔到我地平凡人入去架啦,有人守係門口,我都有自知之名唔行過去




隱約見到對面建築物應該係廚房,有廚師努力工作,可能呢個就係宴會廳既廚房都唔定?不過只係拎一拎起相機遠處已經有人大叫唔好影外面,幾驚影到國家機密就大獲,都係要快啲離開呢道




睇完人民大會堂,係門口影多張相留念,然後就過馬路去返對面天安門廣場


對面係「中國國家博物館」,呢次北京之旅時間緊迫無緣入去參觀;不過就算有時間都唔會去,因為有其他更有興趣既地方同博物館想參觀,哈哈^^




人民英雄紀念碑


天安門廣場真係好大,話晒都係全世界其中一個最大既城市廣場,呢道並唔係浪得虛名,如果叫我圍住廣場跑一圈,我諗會跑到頭暈


行完廣場,係時候要去一個期待已久既地方 -- 故宮博物院


天安門外既華表;華表多數用係宮殿、陵墓外道路兩旁;相傳係堯舜時期華表已經出現,係中國非常傳統既建築


「北京故宮,舊稱紫禁城,位於北京中軸線的中心,是明清兩個朝代二十四位皇帝的皇宮,佔地面積72萬平方米,建築面積約15萬平方米。明成祖朱棣永樂四年(1406年)開始營建,永樂十八年(1420年)落成。」

進入天安門後,前面就係端門


有皇帝係上面望住我丫!不過係假既


屋頂好有趣,好似有好多小動物企係道,不過我相信唔係小動物咁簡單,應該係代表吉祥既脊獸,最衰有近視睇唔清楚


穿過端門後面就係午門啦!唔會比人斬首掛!
「推出午門斬首」聽就聽得多,不過作為斬首刑場就難少少,事關午門對出一大個廣場係皇宮一個好重要既地方,用來頒發詔書﹑舉行典禮,咁重要既地方唔會拎來做刑場殺人掛?由端門行去午門雖然只係一道門距離,其實係好遠架


經過午門就要正式買門票,進入紫禁城;第一道見到既就係太和門,就好似平時係電影電視劇上見到既一樣咁霸氣;除左中間太和門,左邊有貞度門右邊有昭德門;而太和門對出個條小河係電視劇經常出現,睇起黎特別親切


太和門對出一啲裝飾




太和門之後就係太和殿;太和殿即係平時成日都聽到既金鑾殿,明清時期太和殿係全北京城最高建築,而且亦都係最深最大﹑屋頂最高既大殿;而皇帝遇到重大事件好似登基﹑大婚﹑冊立皇后等等都會係呢道進行儀式,太和殿就好似皇帝權力象徵一樣;不過起得高又唔一定好,太和殿試過比雷打中,咁就玩完lu


離遠睇都覺得好大好壯觀,古代建築真係好靚好有中國味道


太和殿廣場左邊有弘義閣


右邊有體仁閣;所有地方都有好有意思既名字


廣場地磚似乎經歷過好多風雨,凹凸不平,有種滄桑感覺


上去太和殿啦






太和殿裡面






紫禁城入面有好多大水缸,裝水用來救火,冬天時仲會用火煲住啲水防止結冰;紫禁城真係多火災,好多地方都曾經燒過


去左太和殿後面




太和殿之後係中和殿,皇帝舉行大典之前休息既地方




中和殿之後就係保和殿;明朝時,大典前皇帝會係呢就更衣;到清朝乾隆後,中和殿就變成考試場地,舉行殿試;太和殿、中和殿、保和殿合稱「三大殿」




好多大水缸


參觀完三大殿,左右兩邊有好多小宮殿參觀


不過我唔睇其他住,繼續向北行先參觀中軸線上既大宮殿;前面就係乾清宮,皇帝聽政既地方


乾清宮左右有內務府﹑軍機處


呢個地方電視見得多啦,皇帝同一班大臣就係道上朝,相議國家大事


乾清宮後面




呢個應該係交泰殿?已經唔太記得啦


終於去到「後三宮」入面最後既一間坤寧宮;坤寧宮係明清朝雍正帝之前既皇后寢宮




再向前行就會出到御花園




紫禁城真係好大好大,我只係行中軸線都已經行左幾個鐘,仲有左右兩旁無數既宮殿未參觀!天氣實在有點凍,而且睇得多都開始有少少悶,再加上出口出現係眼前,咁冇辦法啦我抵受唔住出口既誘惑就行左出去lu


抵達紫禁城北面神武門,紫禁城之旅係呢道結束啦


佢地玩得好開心bor?


護城河凍到結晒冰


由神武門離開紫禁城,再過條馬路就到景山公園


景山公園上既萬春亭,曾經係全北京城最高點;而家四圍雖然高樓大廈林立,但都不失為睇風景既好地方,由其係睇紫禁城




景山公園除左萬春亭,另外仲有四個亭,以下係其中一個




景山公園唔高,好快就上到萬春亭


「萬春亭位於景山正中最高峰頂,北京古城中軸線上。黃琉璃筒瓦頂,綠琉璃筒瓦剪邊,四角攢尖式,三層檐。一層檐重昂七踩斗栱,二層檐和三層檐重昂五踩斗栱。兩槽柱子,外層每面有六根,共有二十根;內層每面有四根,共有十二根。」



由萬春亭向下望可見紫禁城全景,真係好大好多建築好宏偉;可惜空氣好差睇得唔清楚


好大既一個建築群








向下望景山公園大門同神武門,成一條直線


遠處蛋形既就係國家大劇院,古代與現代建築和平共存


前面既湖應該係中南海


向北面望就係地安門大街,遠處可以見到鼓樓


四圍望下






有人玩扮皇帝影相


睇完風景lu,先坐車返去客棧,景山公園冇地鐵坐就只可以搭巴士;北京巴士真係超平,上車只係收一蚊,如果用一卡通(八達通)比錢更加有四折,只係四毫子一程,真係平到喊


景山公園去客棧路程好近,好快就返到去啦;返到客棧首先要買火車票,咁就唔洗再擔心交通問題;客棧自己就係火車票售賣點,買火車票超方便,係道成功買定西安去成都車票,仲有買左另一班北京去西安既車票,而下面之前買既車票就要拎返去火車站退票...原本一路都係想搭下面個班T27列車,因為佢行車時間最快最好,而且仲係最靚既青藏鐵路列車,設備靚好多,不過買完票先見到兩張車票竟然係唔同車箱,冇辦法啦唔想隔咁遠唯有買另一班車;個時唔知道車票有改簽呢回事,退票要收20%手續費,咁就冇左百幾蚊......


搞掂車票問題就可以繼續去玩啦!係附近買左頂帽同對手套,然後係客棧租左部單車,展開北京踩單車之旅!北京人多車又多,好多時都要踩出馬路同啲車並排行,開始時唔習慣咁樣踩單車都有啲驚,不過踩左唔夠半個鐘就已經融入左呢種環境,點踩都唔怕啦;踩左去前海,前海旁邊好多地方都係酒吧,可能時間尚早好多都未開門又冇咩顧客,好冷清


前海已經結冰變成冰湖,好多人玩冰上活動


冰上活動好得意,有冰單車,溜冰椅...我都係第一次見呢啲咁有趣既玩意


仲有好多人溜冰
我就真係唔敢係呢道溜冰啦,以前試過溜冰溜到要比人call白車送去醫院,如果係北京出事都唔知點算!


天氣雖然凍,我諗佢地一定好溫暖


踩住單車都冇點影相,踩踩下就去到南鑼鼓巷;平時睇人地影既相南鑼鼓巷好多人,而家冬天就冇咩人啦;其實南鑼鼓巷都冇咩特別好行,賣既係普通遊客區買到既野,不過踩住單車係南鑼鼓巷旁邊既小巷穿梭又係幾得意既體驗




踩踩下就踩到天黑,去到鼓樓


仲有鐘樓;今日係景山公園時已經望到好遙遠既鐘樓,而家終於去到佢身邊


踩單車沿途都有經過好多小食店,今日連午餐都未食當然要周圍搵食啦;呢間串燒檔好有趣,第一次見用呢個方法燒串燒


用風筒幫串燒加速,好快就燒好


已經踩到天黑,踩返去客棧附近搵地方食晚餐,由南鑼鼓巷個邊踩去客棧好近;今晚去左麥當勞嘆晚餐,哈哈^^每去到唔同地方都想食麥當勞,不過北京麥當勞比香港貴,都係唔好食太多


食完就返去客棧lu,夜晚冇野做可以睇電視傾計


今朝咁早起身,所以都要早啲訓啦;今日玩足一日行程非常豐富,最喜歡就係故宮,平時係電視上見得多,今日終於親身去到感受到故宮既宏偉,古代建築工藝真係高,每棟建築每部份都可以用巧奪天工去形容,絕對值得花時間參觀,入場門票仲好平tim(北京景點門票比起中國其他地方都平);不過如果皇帝同皇室成員住係皇宮唔出得街又係幾慘,四面城牆圍住同坐監冇咩分別,只係監倉比較大...我都係鐘意自由自在多啲;不過都唔關我事啦,我又唔係皇帝,哈哈^^



鐘意SeeWide的分享,給我們一個Like吧!
  • 攻略日期:N/A
    攻略地點:中國
  • 攻略時間:N/A
    是次消費:N/A
1人比"掂"
  • 特搜總編E 於2014-09-22 16:49:41 留言
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
  • 舉報 回覆
  • No.1
  • 平凡人 於2014-09-23 01:29:50 留言
    原文由 特搜總編E 於 2014-09-22 16:49:41 發表
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
    Thanks
  • 舉報 回覆
  • No.3
  • 平凡人 於2014-09-23 01:30:44 留言
    原文由 炯仔的天空 於 2014-09-22 20:45:28 發表
    NICE TRIP
    多謝
  • 舉報 回覆
  • No.4
  • 1874飛飛 於2014-09-23 23:55:38 留言
    升旗, 係點都要睇一次既! 感故宮很值得遊, 但行得很辛苦
  • 舉報 回覆
  • No.6
  • 平凡人 於2014-09-24 00:57:42 留言
    原文由 stellaluk 於 2014-09-23 07:49:24 發表
    真令人目不暇給
    北京好多地方值得參觀,真係目不暇給
  • 舉報 回覆
  • No.7
  • 平凡人 於2014-09-24 01:01:35 留言
    原文由 1874飛飛 於 2014-09-23 23:55:38 發表
    升旗, 係點都要睇一次既! 感故宮很值得遊, 但行得很辛苦
    故宮真係超大,行足一日都得但天氣太凍我好快就走行啦
  • 舉報 回覆
  • No.8

最多能輸入300字

累積瀏覽 112277

全部攻略 126

全部回應 1394