April 12, 2008 (星期日)
今朝我地8點鐘就起身，因為要先食少少野然後落下面泳池游水。不過其實我係唔識游水架，仲衰過盈盈，佢識游自由式、背泳、超人式，宜家就學緊蛙式。但係佢話個兒童池啲水淺得滯，游唔倒。
呢兩個小朋友好得意，所以我偷影左佢地，係兩姊弟黎架。
之後我地就去左牛車水 (唐人街) 買手信同食午飯。
買完手信，我地去左Maxwell Market食“天天海南雞飯”同“金華魚頭米粉”。
你地睇下排海南雞飯條龍幾長！
不過排咁耐都值嘅，因為真係好好味。至於個魚頭米粉，我覺得仲好味，不枉亞妹排左咁耐 (我地一人負責排一樣，盈盈就負責霸枱)。
回程再影多次街頭相，大家留意下右下角嗰幅。呢間舖頭啲model個個都唔同樣仲超搞野，忍唔住影左落黎。搭MRT見到對面呢班小朋友咁得意，同上面廣告啲洗頭水好襯，又影一餐。
食完午飯就攞啲手信番酒店，順便眠番半個鐘。
訓醒覺就去武吉士 (Bugis) 搵榴槤食，事緣亞妹排魚頭米嗰陣有個新加坡人介紹佢去呢度食榴槤，我地搵到差唔多要放棄嗰陣終於見到。啲榴槤真係比澳門嘅甜，因為澳門嗰啲黎自泰國，而新加坡嗰啲就黎自馬來西亞，係樹上熟嘅所以特別甜。不過我地食嗰個甜就甜喇，但係啲核就超大粒。盈盈聞到我地食已經彈到九里咁遠，佢試左少少都話頂唔順，真係唔識貨。
食完榴槤就去酒店附近嘅家樂福 (Carrefour) 超市買班蘭蛋糕，點知去到已經賣哂，唯有睇下聽日喺機場買唔買倒啦。之後我地買左七彩益力多、杯麵 (聽日早餐)、蒸餾水。
呢個係我地住嗰間酒店嘅外貌…
喺家樂福買完野又要先番酒店擺低啲野先，執左部份行李，跟住要趕住搭MRT同巴士去Night Safari，因為已經比我地原定嘅時間晏左好多。去到MRT先發覺我地張儲值咭剩番兩個幾坡紙，要再增值，咁梗係唔加錢啦因為我地聽日都走咯。於是去票務處退左張咭同埋攞番剩低嘅錢，跟住就去買單程票。講到呢度真係不得不讚一讚MRT，佢地為左要令乘客用完張單程咭後退番俾佢地循環再用，喺買票嗰陣多收一蚊坡紙，咁到你用完張咭，就要去售票機度退左張咭先可以攞番嗰一蚊 (註：佢地張單程咭係“嘟”咭唔係 “入”咭架。)
講開搭MRT，喺呢度要講番個笑話。話說有日我地搭MRT，當我同亞妹都入哂閘之後發覺唔見左盈盈，原來佢張咭“嘟”唔倒，我地行埋去睇真啲，先知亞妹擺烏龍俾左張酒店房咭俾盈盈，當堂笑到我地肚都攣埋。盈盈仲話呢個亞媽真失敗…
我地搭左差唔多20分鐘MRT，再搭30分鐘巴士先至到動物園。去到已經8點幾，但係嗰度仲係好多人好熱鬧，大部份都係外籍人士。
我地去到就買飛搭tram睇動物，因為實在好多人，都要排好一陣隊先上到車。繞住個動物園行一圈要成45分鐘，期間都見到好多動物，不過睇得唔係太清因為實在太黑喇。
睇完動物已經9.45分，又要趕住搭巴士同MRT番酒店，因為我地都仲未食晚飯。番到去已經差唔多11點，啲餐廳都閂哂門唯有去買麥當當。
番到酒店仲要食野、執行李、梳洗，上床嗰陣已經係12點幾喇，聽朝仲要7點半起身，因為預左9點check-out出機場搭11.30分班機番澳門。
感謝 「毛爸毛媽毛毛豬 」 提供以上資料
個人日誌: http://mobamomamomo.blogspot.com
