0

2008東京.箱根之旅 – Day 1

Momo毛毛 於 2008-11-08 11:36:05 發表  |  累積瀏覽 445

分類:長線旅遊 ;地區:日本

20081026日.星期日


尋日將手上啲工作交俾個助手,安排好公司嘅工作就收工。今日開始放假,尋晚7點幾就返左屋企食飯。阿Mi打電話黎話銅銅要上黎屋企睇毛毛,由於要執行李同聽日一早起身,太太又黑面,最後都推左令銅銅失望,我有啲唔開心。


凌晨地盤啲狗狗吠到好嘈(唔知點解),毛毛梗係踴躍參加啦,搞到我同太太成晚都瞓得唔好。


好快鬧鐘就响,起身梳洗準備出發。又遇到問題,毛毛好似知道我地出門,個樣好down,我同太太抱左毛毛一陣就鎖番佢入籠。毛毛安靜番,反而我有啲唔捨得,太太話呢啲叫“分離焦慮症”喎原來人都會架。


拜拜喇毛毛你要乖啲


我地出發,宜家先知咁早截的士係好難架。去到碼頭(搭6點鐘班船),入閘啲人排長龍好少見。到香港,我地由碼頭拖住啲行李行天橋去香港站搭機鐵,太太編排喺中環站check in再去機場,過程輕輕鬆鬆。


我地喺機場“恒香棧”食早餐,太太叫左個set+腸粉,我個係雪菜肉絲米+雙蛋。個早餐好貴,成一佰蚊港紙,好彩啲野幾好食。太太仲喺書店買左本書喺飛機度睇。


我地喺68號閘登機,由海關檢查再搭無人駕駛地鐵去到登機閘要成半粒鐘架。太太一早計劃好,時間啱啱好,10點上機1020分飛機滑行到起飛點,飛機1030分高速滑行爬升


喺機上服務我地嘅日本空姐好好人架,個髮形好in,個樣睇落好似蔡少芬。我喺機上睇左套戲「水晶骷髏國」,食左個魚飯咁就到左日本。




到達成田機場係當地時間3點25分,過日本海關要成40分鐘。出到機場啱啱趕到4點25分班機場巴士(車程要個半鐘)。今日我地足足花左十二個鐘搭車、船、地鐵、飛機、巴士,攰死。




喺東京個天5點鐘就黑晒,太太同我第一時間check in、放低行李、換衫出去行街食野。我地行左去池袋Tokyo Hands頂樓寵物店,買左好多野俾毛毛,自己就買左特別版嘅迷你透明puzzle。




我地喺Sunshine Cinty Prince商場入面嗰間製龟食烏冬,要霸位架。太太就出去叫野食,過同啲服務員溝通唔到,唯有我出馬啦。指吓嗰啲呢啲就叫左兩客烏冬(用個木筒裝架)加温泉蛋、洋葱、茄子天婦羅,太太出去加叫蛋同番薯天婦羅。呢度食完野要自己分好啲碟同碗筷,攞出去指定嘅地方擺架,啲野好抵食好好味。




跟住行番出隔離舖頭買可麗餅食,份餅整到好靚好有特色,仲有好多人排隊買。食完餅就行過隔離間大藥房買藥,太太用晒身體語言指手劃腳,個店員先get 到佢想買龍角散。太太好豪咁每隻味買10盒,個店員都伸晒脷…“豪”。


另外太太喺間Uniqlo用“超抵”價錢買左件限量版嘅黑色抓毛外套。呢到大部份啲鋪頭8點鐘就閂門,我地都返洒店。經過便利店買左杯麵、啫哩、雞蛋布甸做宵夜,喺書店幫小西買左啲雜誌。由於要買生果,我地兜左好多路先揾到間24小時營業嘅超市Seiyu,揀左蘋果(係特別版好甜架)、水晶梨、無花果(係有機架,一盒6個好好食,為到港紙40蚊,喺澳門買要成18蚊一個架),好平…


返到酒店太太又忙住安排聽日嘅行程,我就梳洗、整宵夜食。時間唔經唔覺已經深夜12點,要瞓覺喇…





感謝 「毛爸毛媽毛毛豬 」 提供以上資料

個人日誌: http://mobamomamomo.blogspot.com
鐘意SeeWide的分享,給我們一個Like吧!
  • 攻略日期:N/A
    攻略地點:日本
  • 攻略時間:N/A
    是次消費:N/A
0人比"掂"

最多能輸入300字

累積瀏覽 134379

全部攻略 305

全部回應 2