DAY4~『北海道』札幌→函館 (Bay Area)→『青森縣』大間 (大間町)
札幌
唔知係唔係尋晚啲燒肉太正，早餐去到松屋都要整番個燒カルビ定食。去到札幌站間Esta，諗咗好耐終於都係買咗盒六花亭嘅マルセイバタ，希望佢唔會咁容易變壞，去到東京媽咪同阿斐仲有得食。 上咗去函館果架 Super 北斗列車，都幾爆，好彩隔離位冇人，又可以鬆吓。開咗 iphone 聽歌，點知一嚟就 shuffle 出成吉思汗電視劇果首主題曲，真應景！
函館
去到函館，仲有兩粒鐘行吓，為咗留肚應付今晚啲大間マグロ，都係唔食魚生飯，走去食拉麵。
![]() |
▲令人懷念的函館市電
|
![]() |
▲邊看邊逛，就來到了金森倉庫，還買了一些手信
|
麵廚房あじさい
麵廚房あじさい嘅拉麵仲係好正，嗰碗麵十足料，又大蔥、又叉燒、又肉碎、又背脂，食咗好耐先搵到啲麵，最後當然嚟個碗底朝天，完成咗北海道三大拉麵制霸！
![]() |
▲麵廚房あじさい嘅背脂炸肉拉麵非常豐富
|
函館 Ferry Terminal
走去金森倉庫行咗陣，有少少雨，就坐函館市電返車站等 Shuttle Bus 去碼頭。個碼頭好新，架船幾舊(去大間嗰艘)，見冇乜人等船，正諗緊呢啲冷門航線點維皮，上船果陣終於明白，原來有好多車排住隊上船，仲多過人咁滯。
![]() |
▲人和車都使用同一入口，於船頭上船，船尾落船
|
大間
船艙又係好似去利尻島果隻格局，不果呢度仲好，有枕頭，即刻搵個地方又試眠一眠。未落船已經見到間酒店，但原來都要行成 10 分鐘，行吓行吓至發覺只得我一個人行路，其他唔係自已揸車就係有人開車接。
浜寿司
揼低行李就匆匆忙忙向住第一目標浜寿司出發，大間町呢度入夜後烏燈黑火，人都唔多見，好彩 Ellen 一早幫我訂咗位，唔係都唔知行唔行去好。去到後，發現原來訂坐吧枱位，對正大師傅伊藤ちゃん。先叫咗個マグロ set，有 4 件赤身、2 件中トロ、2 件大トロ同埋鉄火卷。赤身同中トロ真係冇得頂，一入口就完全感受到嗰份新鮮魚肉嘅彈性同鮮味，果然名不虛傳。可惜嘅就係個大トロ就一般，係有啲筋嗰種，並非驚為天人。
![]() |
▲マグロ set 由於採用當地捕獲的大間マグロ，十足新鮮，於其他地方難以媲美
|
食完第一輪，當然未夠喉，再嚟赤身、中トロ同アワビ後，師傅開始得閑，問我識唔識日文，我鬼識咩，嚟嚟去去都係嗰一兩句。佢忽然間問我去過東京邊間壽司舖，好彩仲有一間我識得講佢個名，佢又一定會識嘅久兵衛，不過佢之後問我坐幾樓我就以為問我去過幾多次。坐吓講吓，佢見我好似仲食得又話去過久兵衛，就叫我試吓嗰舊滿佈雪花嘅真正大トロ，講真我都留意咗佢好耐㗎啦，點知佢仲使出壓箱底本領，話一件做普通壽司，一件用火炙，我唯有捨錢陪君子。嗰種一放落口即溶既感覺，令我概嘆咁至係真正嘅大間マグロ，尤其係嗰件用火炙過嘅，嗰陣微燶嘅香味更令美味層次昇華，難怪師傅都陰陰嘴笑住問我邊件正啲。最後叫多件蔥吞拿魚手卷，埋單一萬三千幾円，走嗰陣師傅都走出嚟同我講聲「多謝」。
![]() |
▲以氣體爐火炙，比香港的壽司店用噴槍火力更猛、更均勻
|
![]() |
▲就是這件火炙マグロ，為今次大間マグロ之行寫上完美句號
|
《2010 北海道の旅》
2010 北海道の旅(一)~北斗星寢台列車
2010 北海道の旅(二)~東京到稚內的火車長征
2010 北海道の旅(三)~利尻島蝦夷馬糞海膽
2010 北海道の旅(四)~大間吞拿魚
2010 北海道の旅(五)~下北半島
2010 北海道の旅(最終回)~踏上歸途
============================================
感謝 關門這一家 提供以上資料
關門這一家的網誌: http://kwansh01.blogspot.hk/
============================================
