1

北京。頤和園﹑北京大學﹑清華大學﹑王府井大街

平凡人 於 2014-09-23 01:45:00 發表  |  累積瀏覽 1931

分類:長線旅遊 其他 特色景點 古蹟 ;地區:中國

 < 北京﹑西安﹑成都﹑雲南23天遊 >


第四天

今日終於可以訓到天光,唔洗半夜爬起身啦^^今日行程好豐富,有好多地方想去,當中最重要就係去頤和園,話晒清朝時頤和園係皇家園林,我相信呢道一定好靚


未去頤和園之前有好多野要先處理,首先要到「北京北站」買定第二日去長城火車票,順便將之前買多既西安火車票退票;搞掂火車票問題後就要再坐地鐵去「動物園站」搵銀行入數;動物園站佈置得又真係幾有動物園feel;完成埋入數先可以正式出發去頤和園




離開動物園站繼續坐地鐵去到「西苑站」:出左站環境真係好荒涼,除左幾間屋仔之外附近咩都冇


睇左陣先搵到路行去頤和園,大約需要行10分鐘;沿路店鋪都冇間


好快就行到頤和園


「頤和園位於中國北京市海淀區西北,佔地290公頃(合4400畝),是一座巨大的皇家園林和清朝的行宮。修建於清朝乾隆年間、重建於光緒年間,曾屬於清朝北京西郊三山五園之一。頤和園素以人工建築與自然山水巧妙結合的造園手法著稱於世,是中國園林藝術頂峰時期的代表,1998年被評為世界文化遺產。」



租部自動講解機玩下,每去到有介紹既地方部機就會自動介紹,唔需要禁制,用落又幾方便仲可以當地圖用;租機時見到寫住有廣東話,去到又話冇晒,都唔知啲廣東話機去晒邊


一入去就見到位於東宮門內既「仁壽殿」;仁壽殿係坐朝聽政既地方






「樂壽堂」門前有銅龍﹑銅鹿、銅鶴等裝飾;樂壽堂係慈禧太后居住既地方


又有大水缸


琴日係故宮睇得太多建築,今日就唔睇咁多啦,去睇下風景仲有興建;沿「昆明湖」邊行




昆明湖好大,如果唔係冬天可以坐船遊湖,又可以坐船去唔同碼頭;不過而家冬天湖面大部份地方都結冰,行唔到船






頤和園真係好大,遠處望見既橋﹑塔都係頤和園之內,大到行唔晒




沿湖邊行去「南湖島」,條路好空曠又大風又凍,如果冇包實個人真係凍到行唔到過去,所以呢邊人影都唔多個


由昆明湖邊望去位於萬壽山前山正中間既「佛香閣」;佛香閣係八角形三層高木建築,高41米,係頤和園內最大建築




萬壽山除左佛香閣,仲有好多建築


冬天感覺真係好荒涼




前面就係「十七孔橋」,因為有十七個橋洞而得名;據說十七孔橋有蘇州寶帶橋同北京盧溝橋既特點,不過呢兩個地方都未去過唔知係唔係真呢?


有隻銅牛面向十七孔橋;銅牛鑄於1755年,牛背上面刻有「金牛銘」敘述鑄造意義;隻牛就係咁對住條橋二百幾年......




銅牛旁邊有「廓如亭」,重檐八角攢尖頂,佔地130平方米,由內外三層24條圓柱同16條方柱支撐,係中國園林中最大既園亭


去到十七孔橋啦;橋長150米,寬8米,配合藍天又真係幾靚,好彩今日遇到好天氣;有小販係橋上擺賣,但天氣又凍又少人,生意真難做


十七孔橋上有石獅544隻,全部都有唔同神態,數都數唔晒




通過十七孔橋去到南湖島










島上有建築物,但唔太清楚係甚麼東東








太陽光線照射係冰面上,閃閃發光








差唔多成個昆明湖都被冰覆蓋,夠膽既話可以行到去對面岸


但見到啲冰好似溶溶地我就唔夠膽玩命啦


有幾位勇士行左出去


由南湖島望向十七孔橋,可以見到巨型既廓如亭,仲有我最愛既藍天




南湖島唔大,好快就參觀完,又要食住西北風行返去入口個邊;今次相都唔影啦一支箭衝返去




又再返到樂壽堂


樂壽堂東面有「永壽堂」;永壽堂就係太監總管李蓮英住既地方


西面有假山,但我覺得呢舊野好奇怪


我諗夏天有啲樹葉會靚啲


離開樂壽堂就到頤和園其中一個最有特色既地方 -- 長廊


「長廊東起樂壽堂西院,西至石丈亭。長廊長達728米,共273間,其間點綴以留佳、寄瀾、秋水、清遙四座亭子,以及魚藻軒、對鷗舫兩座對稱的點景建築。長廊背山面水,平面呈展翅蝙蝠形狀(取福字諧音),不僅把各處景點有機地串聯起來,本身也是頤和園中一處最有名的景觀,長廊上有西遊記、三國演義、紅樓夢、西湖風景、二十四孝、中國古代詩歌和神話故事(如張敞畫眉、牛郎織女、張良納履等)、山水花鳥等圖畫,共計一萬七千餘幅。」



長廊上每一幅畫都唔同,仲有萬幾幅咁多,都唔知要用幾多人力物力先可以造出來


長廊外就係昆明湖


湖邊四周圍都好凍,係呢道買左條熱辣辣既粟米暖一下;唔洗幾分鐘一條熱粟米就變成凍粟米,仲要好硬,唔似平時食開又軟又甜既粟米


啲雀仔唔怕凍既咩?


「排雲門」


由排雲門向上望就係佛香閣






由佛香閣向下望風景一定好靚,但天氣咁凍唔想上去做雪條,由下面望望算數


繼續沿長廊前進,長廊真係好長,需要一啲時間先可以行完






「石舫名清宴舫,是一半入水的兩層石舫,長96米,上原有中式艙樓,1860年被焚,光緒重建時改為木製仿西洋大理石艙樓,並在石舫兩側加造明輪。石舫西北為小島,島上原有西所買賣街,兩岸仿揚州瘦西湖景色。」

而家見到既石舫已經唔似以前咁大,但依然好有外國色彩




石舫旁邊有個廁所,門口寫住四星級廁所,仲諗住呢個廁所會比較乾淨,但比會呃左啦,四星級廁所一樣係好臭,下次要搵個五星級廁所出來先得




呢邊既湖水河水都係一樣結晒冰,可以想像當時真係好凍好凍




再向前行就到北如意門,又再次抵受唔住出口既誘惑而出左去


就係咁要同頤和園講再見啦!頤和園真係好大,仲有好多地方未去,由其係蘇州街個邊完全冇去過,不過出左去就冇辦法啦,唯有睇下其他去過既朋友係蘇州街影既相一睹蘇州街風彩!

出到頤和園就見到我至愛麥當勞!琴日食左今日暫時唔會住


麥當勞同頤和園始終有點格格不入


行去巴士總站就上巴士去下個目的地;北京好多呢種前後兩節既巴士,由中門上車前後門落車,平時少見呢種巴士覺得特別得意


去到北京大學啦!難得去到北京,除左一般旅遊景點外就係想去北京大學望望,話晒北京大學係中國最高學府,又係中國第一間大學,去八卦一下都應該幾有趣;而且北京大學出名又大又靚,咁就一於去參觀一下


想扮學生偷偷地入去,但失敗被發現,哈哈^^其實只要登記證件就可以入去


又有呢支華表出現


除左我地之外都仲有好多人來到參觀,因為環境真係好靚


一入門口就已經見到咁靚既建築同風景,好有中國感覺;中間呢座係北京大學辦公大樓


呢道係外語學院




繼續行入校內,入面有好多個湖;比起昆明湖,呢道既湖當然細得多


所有湖水都已經結冰




遠處有座塔,唔知係咩塔呢?


塔下湖上有個溜冰場,好多人係道溜冰;其實呢啲冰湖硬唔硬淨架?以前未去過咁凍既地方未見過冰湖,成日都覺得如果啲冰裂開咁點算?




原來呢個湖叫「未名湖」?


既然大家都唔怕,我都行出去睇下先,放輕腳步行出去應該冇問題;冰層好厚裂開就唔會,但踩上去好滑就真,要打醒十二分精神,一唔小心patpat受罪就唔好啦,好彩最後都平安無事


除左好多人係湖上溜冰,其他地方都係冇咩人






行去另一邊由新聞學院呢邊出去lu;北京大學而家呢個咁靚既校址以前其實唔係北京大學,原本係燕京大學;1952年時燕京大學被分拆,文理科併入北京大學,學校地方都併入北京大學,燕京大學就咁冇左lu


由地圖上睇到,北京大學旁邊就係清華大學,咁不如去睇下啦;但行左超過半個鐘都好似一直圍住清華大學外圍行而入唔到去,都唔知個入口係邊......


行左一餐終於順利入到去,呢道唔洗登記證件就入得


見到有建築物,成功係入面搵到廁所,哈哈


校園入面唔係大得咁誇張掛,咁大條馬路行車


四圍都好大,再睇返香港cityu,蚊同牛比


行到應該係正門中軸線位置,有個好大既廣場


望向後面跟本就望唔到盡頭


呢道真係太大,連風都特別大,大風到單車變成咁


係入面大到要坐車,就咁行都唔知要行幾耐;清華大學好多都係新式建築,睇落冇北京大學傳統建築咁靚






天開始黑,學生們都夠鐘將國旗降下,而我地都係時候走人lu


我地唔係學生冇車搭就唯有行路離開;頭先北京大學都已經覺得大,呢道清華大學就更加大,而且仲大得離譜,我諗我都未必習慣係咁大既學校返學,不過大小小總好過香港個啲大學咁細既


出左清華大學就行去地鐵站;咁岩係地鐵站邊見到有間KFC,諗落午餐都未食就係道食野啦,呢個時間都唔知叫下午茶定晚餐好;KFC消費唔平,隨時仲貴過香港,但佢咁好食都冇辦法啦要幫襯一下


搭地鐵去王府井;北京地鐵轉線真係有難度,由其係西直門站,轉車仲遠過中環美孚,又上又落又出地面又落地底,行一大餐先轉到車


晚上去到王府井小食街




王府井小食街最出名既小食我諗就係呢啲啦


每次見人去王府井都影呢啲奇怪小食,但從來都冇見過有人食,唔知多唔多勇士敢挑戰呢




我就唔敢做勇士,都係食返啲正常串燒比較好




北京都有章魚小丸子


王府井除左小食街,仲有商店街,有好多北京特色野賣,睇落都幾得意;不過唔好話講價,我連問價錢都唔係太敢,呢啲地方都係唔太適合我買野......




王府井入面有間遊戲機中心,朋友一向都係籃球機高手就入去露兩手;果然玩到勁高分,後面好多人圍觀睇佢表演,哈哈!但此地不宜久留,玩完都係即刻閃人


出返去小食街,原來仲有好多餐廳小食店選擇,但呢道冇咩人氣;難得來到王府井,都買左唔同小食試試,不過一定唔敢試蠍子海星個啲奇怪野


行完小食街出返去王府井大街,呢道就冷清好多;我都係覺得入面小食街有特色啲,有野食有野買好過行呢啲大商場


大商場都有個好既地方,就係方便搵廁所,仲有廁所應該比起外面公廁乾淨


係唔係好似APM呢?呢道就係北京APM,同觀塘APM有八成相似,我諗兩道APM最大分別既地方就係廁所,北京APM廁所入到去始終都係有一陣臭味,如果可以清潔得乾淨少少就好啦


滿記好多城市都有,咁受歡迎既?不過香港又好似唔係有好多分店,而且又賣得咁貴都唔太捨得食...好掛住榴槤飄香......


又玩到夜,坐地鐵返去客棧lu


客棧位置就係民居胡同之中,每次返客棧都好似返屋企一樣,係北京住胡同感覺特別有北京味道


胡同之中仲可以發現好多北京特色小食,就好似呢個唔知咩小食,望落去紅色有點恐怖,但睇睇下又幾得意;第一次見呢種串燒當然要試試,而且係冰天但冇雪地之下食到熱騰騰串燒都係一件好幸福既事




串燒檔就係客棧對面,買好野行十秒鐘就可以返到客棧;大家五個人一齊食下野,分享下去邊玩,就係咁又過左愉快既一日




鐘意SeeWide的分享,給我們一個Like吧!
  • 攻略日期:N/A
    攻略地點:中國
  • 攻略時間:1日以上
    是次消費:N/A
1人比"掂"
  • 特搜總編E 於2014-09-23 12:12:15 留言
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
  • 舉報 回覆
  • No.2
  • 小龍 於2014-09-23 19:05:15 留言
    好羨慕呀,可以去23日旅行
  • 舉報 回覆
  • No.3
  • 有姐之日誌 於2014-09-23 20:19:46 留言
    引用自 '平凡人' 的相片:

    回覆:哈哈...這是海星,我多是用來煲湯,可以這樣吃的嗎?海星是貝殼類,點食呀..
  • 舉報 回覆
  • No.4
  • 有姐之日誌 於2014-09-23 20:23:48 留言
    哈哈..你的北京﹑西安﹑成都﹑雲南23天遊..好寫意呀... 我去過..西安﹑成都﹑雲南..未去過北京..我好想去呀..
  • 舉報 回覆
  • No.5
  • 平凡人 於2014-09-24 01:09:31 留言
    原文由 炯仔的天空 於 2014-09-23 10:34:50 發表
    thanks for sharing
    多謝支持
  • 舉報 回覆
  • No.6
  • 平凡人 於2014-09-24 01:10:05 留言
    原文由 特搜總編E 於 2014-09-23 12:12:15 發表
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
    Thanks
  • 舉報 回覆
  • No.7
  • 平凡人 於2014-09-24 01:12:05 留言
    原文由 小龍 於 2014-09-23 19:05:15 發表
    好羨慕呀,可以去23日旅行
    都係以前既事啦,而家好難行開咁耐
  • 舉報 回覆
  • No.8
  • 平凡人 於2014-09-24 01:14:50 留言
    原文由 有姐之日誌 於 2014-09-23 20:19:46 發表
    引用自 '平凡人' 的相片:

    回覆:哈哈...這是海星,我多是用來煲湯,可以這樣吃的嗎?海星是貝殼類,點食呀..
    唔知可以點食呢,我見到呢啲古怪野唔敢試
  • 舉報 回覆
  • No.9
  • 平凡人 於2014-09-24 01:20:00 留言
    原文由 有姐之日誌 於 2014-09-23 20:23:48 發表
    哈哈..你的北京﹑西安﹑成都﹑雲南23天遊..好寫意呀... 我去過..西安﹑成都﹑雲南..未去過北京..我好想去呀..
    Thanks去北京比去其他地方更方便啦,我相信一定有機會去
  • 舉報 回覆
  • No.10

最多能輸入300字

累積瀏覽 87744

全部攻略 126

全部回應 1394