今日係我既生日，就等我俾一份我收過既，最珍貴既禮物你地睇下啦！
Bibi係我既雞絲，我梗係覺得佢最可愛啦！
佢自細就同其他小朋友諗既野唔同，可能都要怪我自己，事關我都係古靈精怪既．．．仲成日講埋ｄ老作既故事俾佢聽．
佢亦會有樣學樣，幾歲果陣，講故仔既時候，如果形容一個公主好靚，佢會話：人見人愛，馬車見，馬車載．
由幼稚園開始，我每年中秋節都會親手為佢做一盞花燈，所以，佢拎既花燈係同人地果ｄ好唔同既．呢一年，我做咗星星花燈．呢兩個小朋友，係在平台遇到既街坊黎，我其實唔識佢地架．
仲有呀，佢個頭係我剪既，由BB到小學，我一路都有幫佢剪頭髮架，直到中學後，先同佢出去髮型屋剪既．
呢張，係佢送俾我既母親節禮物，亦都係佢出自真心咁為我而做既唯一一份母親節禮物！
當年，佢八九歲掛．因為卡上有小貓阿古既樣，而呢個手指玩偶，係二千年先黎我地屋企既．呢幅十字繡，亦都係佢既第一件十字繡成品．
呢張卡特別之處，係佢係面頭開咗隻窗，鑲咗呢個十字繡小咕臣係上面（見唔見背面仲有字架：I love U Mama）．而且係不經我手，自己一手一腳做好既．
最難度高既，係佢全程都冇係我面前做過；要避過我既法眼，真係唔容易架．我話就話要返工唧，但係佢一放咗學，食完午餐就要即刻午睡，直至四點；起身後又要自己做好晒ｄ功課，先可以自由活動架．而我返到屋企，係會全程陪住佢既，咁佢邊有時間做野呢？
過後幾年，佢講返俾我聽，ｄ十字繡佢係偷偷地係上堂既時候做架！嘩！得死咯！好彩冇俾老師發現唧，唔係又要見家長架啦．
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
