Bibi有日同我講：我想買對高跟鞋過聖誕呀，得唔得呀？
嗄～，我唔係冇帶你去買架喎，係你自己揀唔啱咋喎，你自己搵到時間去買至得架．
好努力咁預做多ｄ功課，溫多ｄ習，咁申請成人身份證果日，咪可以順便shopping咯．
4/12，預約咗十點，入到元朗，食埋早餐就剛剛好．搞完晒手續，ｄ店鋪都差不多開啦．
事先我已經同佢講明，買鞋最緊要舒服，唔好為咗貪靚，買咗對令自己受苦既鞋，到時就唔願著架啦．
行咗好幾間鞋店，大部份既鞋都唔適合，一唔係佢接受唔到ｄ款式，就係冇佢尺碼．事關佢對腳太瘦，著咗合長度既鞋，鞋頭趾位又太多虛位．
見佢試咗咁多對，如果唔幫襯，我都覺得對果位咁有耐性既店員姐姐唔住，於是我都試下鞋啦．我對腳相當標準，5-6號既鞋都啱著，好易買．我要求款式簡單，著上腳舒服就得啦，所以我揀咗對有少少氣墊既啡色猄皮鞋，一著上腳就話ｏｋ啦．
順手試埋黑色，咦，點解咁介既？唔掂喎．店員話要我等一陣，佢去調兩對同碼既返黎俾我試．因為爸爸追魂call，我就落咗少少訂，想跑多幾間鞋店，轉頭返黎先買．
Bibi揀咗呢對，但又唔甘心冇睇過其他鞋店就做決定，於是我就俾機會佢去第二度睇下．其實都揀到一對啱心意既，可惜冇佢尺碼，最後都要返轉頭買返呢對．
係呀，因為對腳冇肉，所以著魷魚鞋較為適合，貼腳ｄ．
羊仔皮，非常柔軟，$599減到$335．
鞋頭都唔算誇，不過佢唔要黑色，揀咗墨綠色．
我返轉頭，個店員姐姐即刻拎咗四對同尺碼嫌同款黑色鞋俾我試，仲話我可以隨便調轉組合，左右腳任配，著到舒服為止．
你話，今時今日咁既服務態度，係咪抵讚佢呢！二話不說，即試即卜鎚，兩隻色都買晒．$499減至$349．
又咁好彩，跟手俾Bibi搵到對斷碼灰鞋，得一對既，真係三折，百五蚊咋！
竟然啱著，都係魷魚鞋黎，不過，鞋頭都幾誇．
總數$1,183，因為超過一千蚊，有$100超市禮券送，仲可以開多張會員卡（我其實已經有一張），有迎新禮物，九分褲一條，Bibi又用得著．
呢次shopping，算好成功啦！
P.S. 唉~~~Bibi廿二號果日去行街黎，見到ｄ鞋仲平呀！
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
