探險家攻略  >  興趣體驗  >  手工藝  >  口金
0

口金

May姨blog 於 2011-10-24 00:00:00 發表  |  累積瀏覽 582

分類:手工藝

原來口金包都唔難做架,呢個,係我第一個製成品,因為d布比較硬,縫得比較困難.



有咗經驗之後,以我既懶人性格,實偷工減料都得啦!

呢一篇並不是口金教學,點可以搵一個只係做過一個口金咁大把既人去教你地呢?

孟子話:人之患,在好為人師.千其咪識少少,扮代表呀!

但係為咗方便我d同事參考我既懶人大法,先係度為佢地介紹下.見到佢地做得咁高興,我都好開心唧.呢d就叫分享既喜悅啦,獨樂樂,不若與眾樂樂呀!

首先,多謝d姊妹醒我紙樣:




跟住呢,有紙口果張分別裁出兩塊面布同兩塊裡布,合共四片,冇紙口果塊紙樣就用黎裁出兩片單面膠棉.




裡布面對面疊好



用回針步(back stitch)將下面既U型位縫好,睇清楚d喎,底部中間位冇縫到架,我留咗成寸幾冇縫到既(若然你地用既布比較挺身,或者塊棉較厚,咁個缺口就要留大段d啦),呢個缺口留返最後反身用既.

冇經驗既小朋友,乖乖地畫條線跟住紙口位去縫啦,May姨就有幾十年渣針經驗,紙口位早在心中架啦.記住喎,唔夠醒既話就用條線係咁意碼實兩塊布,等佢唔易走位.(可參考下面縫面布時的相片)



OK,仲係有小朋友唔明白呀?好,示範下:

即係放果塊冇紙口既紙樣上裡布既布底上面,用筆畫返條線咯.記住呀,我只畫咗一塊裡布架咋!



跟住照樣縫埋佢,預留缺口.




好啦,講返我果塊啦:
沿角位剪幾下,咪剪得太貼喎,咁反起黎就會順d架啦.



反身先!



然後呢...呢個步驟就相當重要啦,事關我第一次做果陣衰過黎架!

睇清楚塊棉,邊一面有膠點既,就將佢貼住面布既反面黎用喎.
咁點將塊棉粘實面布呢?

將冇膠點果面掂住熨衫板,放面布上去,記住有膠點果面係掂住面布既底喎.
用個比較暖既熨斗係面布上輕輕熨下(小心d咪走位喎,要keep住塊膠棉係中間),塊棉就會粘實架啦.如果仲未粘實,就加熱少少添啦.重覆整晒兩份喎.




跟住就面對面咁疊埋




我咁懶,你唔駛慌我會畫線係上面喎!我亦唔喜歡用大頭針,容乜易吉吉架?
但有樣野係唔少得既,就係用線以走針(running stitch)將兩組面布略為縫合,咁到你正式縫果陣就唔會咁易走位啦.

 



用回針步(back stitch)將下面既U型位縫好




一樣沿住圓角轉彎位剪幾下




再同佢纖體




將裡布好似著襪咁套入去面布呢個袋袋入面,記住呀,係right side facing right side呀.






用線以走針法(running stitch)氹氹框將口金既開口位能住.記住呀,唔係四塊布釘埋一齊呀,係面布同裡布釘埋咋.




貼住塊棉條邊用回針縫好




再拎走條黑線,想貼服d既,就一樣係彎位剪幾下,因為呢條邊會藏係口金框入面,唔駛見人既,所以條邊修唔修幼都影響唔大既,除非你d布好厚既唧.





拿,裡布果個缺口就係用黎反身架啦,反身之後,裡布既正面就係銀包仔袋錢既位啦.咁個窿點?最後先縫埋佢都唔遲既.




而面布呢,反身之後就係咁既,咁就差唔多成型架啦:




先要搵返頂部既中間位喎,用筆點一下啦,我咁懶呢,就用眼記住算啦,不過你都可以用大頭針吉住去記位既.

打雙線,將末端轉角位當成線尾,將線由裡布果一邊穿出去面布果一頭(貼士:條線最好就夠長,一口氣可以縫晒一邊既口金框)



做乜咁整?我唔喜歡成日打結既,我係舊式人,係唔慣見到打結同線頭位既.所以呢,就咁樣縫法,只要枝針再返轉頭果陣,穿過呢個末端既圈仔,索實就可以開始縫啦.



即係咁啦,係咪好方便呢?呢個辦法冇人教我既,我自己覺得咁幾好咪咁做咯.不過,我唔排除可能早就有人用緊架啦,天下懶人多吖麻.



再將針穿返出面布



數下個口金框邊點係中間位喎,再穿過口金框既最正中既窿仔.(如果布厚,有d人會用個錐仔推d布入去口金框度先縫既,但我呢d布咁薄,朗朗下既,又點駛咁做吖.)



用走針縫到尾



再由尾縫返轉頭



去到中間位就繼續縫埋另外一半既窿仔,又係去到尾再返轉頭,去返中間.

完成一次都未夠實淨架,要重覆做多一次,咁個口金就釘得夠實啦.



如是者,做埋另一邊既金屬框.

記住呀,就算冇人見到,都應該盡量縫得企理d,就算個底唔駛見人,都盡量keep住d針部平均呀.等我俾呀口金妹妹既私隱你地睇下啦:



如果你地唔係刻意咁裝入去睇既話,底線係應該唔多覺眼既.



唔好唔記得你入面層裡布仲有個缺口喎,用挑針(hemming stitch) 既方法縫埋個口啦.記住喎,人地正統係用藏針法既,只係我自己興咁縫唧.

點解要安排呢個時候先做?點解唔早d係上口金框之前做?其實兩個階段做都得架,隨得你地啦.


 













套返好塊裡布入去,個口金就大功告成啦!

 


係咪兩面都咁省鏡呢?



我係知咁多架咋.

 


============================================

感謝 May姨Blog 提供以上資料

May姨Blog的網誌: http://maylibibi.blogspot.hk/


============================================

鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"
  • 特搜總編E 於2014-12-17 10:30:37 留言
    恭喜!經過「SeeWide評審團」一致通過,你的發佈已被選為推薦攻略!你將獲得200經驗值作獎勵!
  • 舉報 回覆
  • No.1

最多能輸入300字

累積瀏覽 682843

全部攻略 2186

全部回應 115