約咗好幾次都改期,終於去到灣仔金源小館啦。
我地叫左山東燒雞,其實佢係冷盆手撕雞黎既(比起係超市買既手撕雞,將D拆出黎既骨墊係底真材實料得多),上檯時係上面再淋上好多加咗拍蒜既醋汁。呢度半隻架咋,真係好足料,下面墊咗好幾塊素雞,都好好味既。
蝦子山根豆腐,都算OK,唔會太咸,豆腐都熱到透既。
油浸筍殼魚,我貪心,要咗大條既($128),炸到外皮脆卜卜,我食咗好多。
啫啫油麥菜,又係好夠熱度既,唔係點叫啫啫唧? 果D粒粒係蝦米碎同墨魚鬚粒黎。
香醋骨,呢碟應該叫啦,真係幾好食,酸甜度都好平衡。
潮州凍蟹(二百幾蚊),其實我地食飽架啦,但其中一個一開始就話要食蟹。我地就同佢講: 食晒D熱野先啦,唔係食得蟹黎,D餸就凍晒啦。咁佢真係食完又話要食蟹喎(估唔到佢真係仲要食,今次呃唔到細路添),是但啦,叫一隻陪佢食下啦。
南瓜露同豆腐花都係送既,我其實唔好甜品既,佢地四個都食熱既南瓜露,入面有海底椰既,佢地話唔錯喎。
呢碗凍豆腐花係我既配給黎,係其中一位話甜品係佢強項既朋友點埋既,佢話想食埋喎,咁就唔好晒,叫埋呢碗俾佢食。
再加埋三碗白飯,同埋一個木糠布丁(打包返去俾Bibi食),只係$777咋!
其實唔食蟹,都夠架啦,仲平呀。
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================