琴日都唔知搞乜,咁有食神既.
一早就有朋友打黎問我:一陣得唔得閒去間米芝蓮食店試菜呀?
你地都知我係路盲黎架啦....
邊度先?
灣仔,你會唔會太趕呀?
ok!
就係咁,我地兩個女子就食咗海蜇,燻蛋,蜜汁烤雙方,蔥油餅,雜菌翡翠苗,棗泥糕,仲有飯後果:西瓜盆.
咩叫大食冇痴牙呢?可能就係咁啦.
至於公司個嬸嬸,早上一見到我,就問:你食唔食海蜇架?
梗係食啦!
佢細心到考慮埋我唔食咁多蒜頭,專登再調配過一份汁俾我.
至於我阿仔個鐘點嬸嬸呢,仲勁!
佢拎咗d自家種荔枝黎,雖然只係細細粒既桂味,但真係好味到唔信呀!
晶瑩剔透
清甜味足,香氣撲鼻,連d核都細過人.
乜唔係糯米糍先會咁細粒核架咩?順帶提埋食荔枝小貼士,最佳進食時段係中午,據聞正午食荔枝係有補益作用既,而晚間食呢,就會燥火啦.亦有人話,只要用鹽水浸過荔枝一輪,就會唔燥啦.計我話呢,只要唔好貪心狂食,食幾粒應該冇問題既.
唔止咁呀,佢仲採收咗辣椒,白豆角黎俾我,仲有半隻雞,半隻鴨,煮好晒咁拎黎,佢叫賓賓斬開一半既時候,個賓賓仲偷食:婆婆,乜咁好味既?
再拎埋兩粒佢親家奶奶果邊既自家蒜頭黎,真係多謝晒呀~~~
你叫我點可以唔錫佢地呀?
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================