都會海逸Promenade

昨日放工約咗爸爸既親戚係紅磡食自助餐，原本叫咗Bibi自己去，爸爸又話要接佢去，變咗佢少咗個練習獨立去街既機會。

Bibi進入餐廳果陣，見到瑪莉諾中七學生係度搞謝師宴，見到人家著靚靚，開開心心咁，心裏很不是味兒，事關佢將會因要出席太陽計劃個camp，冇得參加自己學校搞果個謝師宴。

Promenade既自助餐真係幾正，食物豐富，而且添補頻密，乾淨企理。雖然我唔多食果d生野，但見有好多蠔、青口、蝦、蟶子、翡翠螺、長腳蟹等等海鮮，源源不絕咁供應，又有天婦羅、魚生、壽司、燒味、片皮鴨、上湯焗龍蝦伊麵、花膠海參鴨掌、粥檔、麵檔、咖哩、各款熱盆、大量沙律、芝士、凍肉等等。

ｄ螺真係好大隻架，蟹都幾正既，不過咁麻煩，我冇食到．

姑姐都食咗成七隻，大伯睇怕都食咗兩打掛．

即做天使麵

聽講天婦羅同焗蠔都唔差

呢碟係Bibi既

我就食呢碟

Bibi話未食過鵝肝，要試下

我既片皮鴨，田雞腿，雞，菜，蒸魚

又熱又好味既翅湯

最精彩都係甜品，雖然我食得唔多，但睇見都開心啦。梳芙厘、pancake、杏汁燕窩、蛋白燉燕窩、Hagandaz雪糕等等，其他的的式式既小杯甜品都好得人歡喜，夠細杯，款式又多，真係正。兩款翅同燉湯都係一盅盅既，又夠熱，味道又好。

呢ｄ咁靚既甜品，我冇拎過

呢三杯仔甜品，我每杯都食咗一粒黃豆咁多既份量，其餘既係Bibi食晒．

呢粒朱古力梗係好味啦，Bibi食咗兩

呢個梳芙厘夠清，唔太甜

杏汁夠熱又滋味，同杏仁霜開出黎果ｄ冇得比

我至愛既HG雪糕，不過桑梅味有Ｄ酸

我食咗三盅翅(又熱又好味)、兩份杏汁燕窩(份量少但夠香又夠熱)、一份蛋白燉燕窩、燕窩帶子粥(帶子好新鮮)、一碗灼菜、幾塊片皮鴨(一只只拎出黎切，好新鮮)、兩件龍蝦(d殼好薄，好易食)、花膠海參鴨掌、蒸魚(係石斑黎，肉質唔差)、兩杯梳芙厘、一只田雞髀、魚生、一只蜆、忍唔住食咗只翡翠螺（幾好味）、一件鮑片、西蘭花棷菜花芥蘭娃娃菜、一件炸子雞、雪糕、試咗少少Bibi拎返黎既甜品，已經好飽。我地九點半走人，坐爸爸既的士返屋企。

臨訓果陣，Bibi話：「剛才見到人地係度謝師宴，個心唔知點咁。」「個心好翕哩。」「我由F.1開始期待住呢個謝師宴，點知買晒衫先話冇得去。又見到人地咁開心，係度搞。」「不是味兒哩。你今日食既野，一定好過晒你地個謝師宴架啦。」「我都知，其實唔係因為食物，係因為大家難得可以有個咁既機會，做一樣咁formal既野，真係好想去咯。唔通真係要中七先有得玩？」（其實到中七，已經唔係果班一齊過咗一年既同學啦！）「咁如果中七果陣，人地又收你，你仲參唔參加麥Sir同學會吖？咁到時咪又冇得去。」「如果人地仲收我，梗係去啦！但中七既謝師宴應該係會六月搞既，睇怕我應該會有得去既。」

大家都應該記得我地因為買佢呢件謝師宴衫 ，爭ｄ係旺角盪失路既事件啦，我地上星期連打底衫同透明帶都買埋啦，真係可憐豬呀！

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================