睇B女+美食嘉年華

今日係睇BB女既吉日，即係十二朝，我二家姐呢個新嫲嫲只係帶咗十個姨媽姑爹去踐場唧。

咁第一站梗係在酒樓集合最方便啦，我地雖然住得遠，都要跟大隊係銅鑼灣飲茶。今次我地去咗總統戲院側既喜悅。只係十個人，居然叫咗一窩火鴨絲窩米、羅漢齋炒麵、兩碟鳳爪、兩籠菜曲餃、兩碟鯪魚球、兩碟煎蘿蔔糕、叉燒腸、煎腸粉、千層馬拉糕、流沙奶皇包、咸水角、羅漢素餃。我地實在太厲害啦！

食飽飽就出發去青衣啦，我問係咪搭地鐵轉小巴？原來呢個新嫲嫲都唔係好熟路架咋！佢話坐地鐵轉巴士喎。好彩我呢個路盲一早就做定功課，我明明問過住青衣既同事，佢話一係就坐機鐵線去青衣，然後行十分鐘就到。一係就坐地鐵去到葵芳，係B出口坐88B小巴去到總站落車就啱啦。初時我二家姐都唔多信我呢個路盲架，但我話我隔離位都係住呢度架喎，照計佢唔會錯既，唔信你就打電話問呀仔啦。

好彩，大家商量之後，終於都跟我咁去一次。實在好方便，因為我地拎咗ｄ重野，唔想要行咁多路，所以就選擇咗係銅鑼灣坐地鐵，係中環轉荃灣線，一路有位坐到葵芳，出咗站即坐小巴去到青衣，係正門口落車。

呵呵，終於見到今日既主角啦！Hayley，你好嗎？我自然帶咗禮物俾佢啦，除咗之前整果個蛋糕外，仲有衫仔、牛牛印仔同埋利是添。

佢一肚餓就會醒，一食飽又訓過，算係乖B黎．

睇返Hayley老豆細個果陣抱住Bibi既look哩：

散band之後，順便係葵芳行下美食嘉年華。雖然地方唔大，要買既野都買到啦：乖乖、蘋果片、菜脯、朱古力、肉燥、湯河、生麵皇、拉麵、粉絲、黑珍珠花生。

呢只花生好特別，剝開裏面既花生既外皮係黑色既，但都幾貴，成$40磅。我就唔覺得佢有幾好食，但爸爸就話佢好正。

============================================

感謝 May姨Blog 提供以上資料

May姨Blog的網誌: http://maylibibi.blogspot.hk/

============================================