跟住學既，係繡球同富貴子（即係霧冬青）。好衰唔衰，第一次沾手學麵粉花就係學迷你版既繡球（果陣我係專程每星期放半日假去學架）。當時半條粘土都夠玩啦，我仲買咗包Designer，一次過做咗好幾倍既既功課來練習添。
我覺得學麵粉花除咗悟性之外, 基本功都係好重要既。
依家！大件事！要做實物原大。
都要做架，一做就一百八十朵花，而且有咩瑕疵都會俾人睇到，唔可以洽人老花胡混過去。真係做到有少少反肚。
咁就要打醒十二分精神，先要仔細地做好十字形既細花蕊，唔可以求其架，然後開花瓣，又唔係朵朵花都開盡架，所以要有不同形態。我自己一邊學，一邊會想到身為學員會有咩難題，做花時又有咩要注意，日後有機會同小朋友一齊玩，都知點樣講先會令人明白。
乾咗之後又再碰到我既死穴 – 又要用tape帶！
到上色啦，一朵花都要油三種顏色，做出漸變效果。
工程浩大, 油到地老天荒先油完。
葉都唔算太多既，因為想茂盛d，我仲比規格所需多做了一些葉！
我既秘訣就係 - 拎塊真既葉去影印，然後再縮印，整個細少少既版本，裁出唔同既膠片去製作，咁就可以做到更加像真既葉啦。所以，我既製成品係同人地果d唔同既。
set埋盆，都幾好喎。但係，冇陰功咯，又係巨人版黎，都唔知柄埋佢去邊好。咁啱大佬新居入伙，一於靠害，送咗呢份「大禮」俾佢！
俾埋個背脊大家睇，乜多咗一小球花既? 係呀, 係有三球大, 一球細既。
弊！冇幫佢擺好ｄ個post添！
功德完滿，終於同盆繡球搵到一主好人家啦。
============================================
感謝 May姨Blog 提供以上資料
May姨Blog的網誌: http://maylibibi.blogspot.hk/
============================================
