北京。八達嶺長城﹑天壇﹑水立方﹑軍事博物館

第五天

又一日新開始，今日係留係北京既最後一個全日，行程同之前一樣咁豐富；上午要到長城，下午想到天壇，夜晚如果有時間想到鳥巢望望；嘩...今日又有排玩啦，Yeah！

琴日已經買好左到八達嶺既火車票，八點幾就開車所以又要早起身（而家去八達嶺部火車已經唔洗買飛，好似地鐵咁拍卡就上得）；見有時間就係客棧附近食早餐，但等左呢兩個包半個鐘先到，本來有時間都變成好趕，拎住個包地鐵都唔敢坐跑去最近既巴士站等巴士


等左好耐車，好心急咁坐完巴士，落車就要即刻跑向北京北站；巴士站去火車站有幾百米距離，咩都唔理就跑過去；好彩北京北站好細只得一層，閘口同月台都係地面，好快就可以跑到月台，成功上車後唔夠兩分鐘就開車lu；追火車追到係零下十度都出晒汗真係可憐，好彩總算岩岩好趕到；今次想坐得舒服啲所以買左一等座，真係好舒服，不過車上乘客唔多可以點坐都得，可能冬天少人去長城，呢個車箱十個乘客都唔夠


去八達嶺途中路過居庸關，會見到居庸關長城








除左呢啲比較完整既長城，仲見到好多已經日久失修既長城，睇上去有點滄桑；之前都有諗過去司馬台﹑慕田峪呢啲野長城參觀，會更原汁原味，但交通實在太唔方便，冬天未必有巴士會去，所以最後都係選擇去最方便既八達嶺，舒舒服服坐火車仲開心


個零鐘車程去到「八達嶺站」；上車時趕唔切影相，落車影返張相先




北京北站到八達嶺站呢段鐵路好有歷史，清朝1909年已經通車，由當時最出名既鐵路設計師詹天佑設計，係京張鐵路其中一段


左都督戚繼光；而家見到既長城大多數都係明朝時戚繼光負責興建或重修，冇佢就冇而家我地見到呢啲咁靚咁宏偉既長城




一路跟大隊向上行，唔洗十分鐘就到達八達嶺長城入口


買好門票就入得場；但入場時門票會收返，不如唔好比我丫笨


上長城做好漢




一入門口左右兩邊都有長城，左邊冇咩人行右邊比較多人，我都係跟大隊穩陣啲，就行右邊啦；相入面係冇人既左邊長城，今日又有藍天！


開始上山


沿右邊長城上山


冬天長城人唔多，如果係假期去長城就大獲，見到既所有地方都係人頭，迫到行都行唔到；而家人少少都不知幾好行，想行又得睇風景又得


長城有啲地方好斜好斜，就好似平時行山咁辛苦；真係唔可以唔佩服古代人竟然可以起到萬裡長城出來，萬裡長城經過既地方都係荒山野嶺，冇機器幫助運輸只係靠人力都唔知點可以將咁多建築材料運去山上






望向北京方向可以見到一大片平原；而家已經離開左北京市幾十公里，而且更北更凍更大風；係長城上唔小心對住相機鏡頭輕輕吹左一下，塊玻璃即時結冰...


另一邊就有好多山


山上仲有好多長城


不過都係算啦唔上去lu...仲以為琴日頤和園已經叫大風，今日係長城更大風，就好似八號風球咁企都企唔穩，有時大風到要喱係城牆之後，一格一格牆咁行，所以都係返落去算...上到長城我已經好開心啦


長城每隔一小段就有一個烽火台，古代時日頭點煙夜晚點火就可以傳遞訊息，經過一個個烽火台可以將訊息傳到千里之外






繼續落山


好快就落到山，要同長城講再見啦




行返出去巴士站等車


最後影多張相就正左結束長城之旅


因為唔知會行幾耐所以冇買回程火車票，坐巴士走都好方便，搭919就可以返到北京市區，車費四折左只係4.6平靚正，當然巴士就冇火車咁舒服啦；不過如果係北京上919有好多黑車假車，上錯車就出事lu，最好都係坐火車，一定穩陣；巴士上好多人，開到來長城時都係得幾個位，要同好多人鬥快迫上車；車上有位外國人坐我旁邊，見佢睇住張細地圖睇得咁辛苦就開張大地圖比佢睇，半程車就係咁大家睇住張地圖篤篤下冇出過聲，因為佢係講俄文都唔知佢講咩既，哈哈

差唔多兩個鐘車程，順利返到德勝門，今日用左好多時間係交通之上；落左巴士再轉地鐵去天壇，咁岩去到天壇對出見有間吉野家，就先入去嘆返個午餐（其實已經去到下午茶時間），但呢間吉野家牛肉唔太好食，比起香港吉野家硬好多


食飽就去買門票，進入天壇公園；原本以為天壇就只係一座建築物，好快就可以參觀完，但我完全錯啦，進入天壇公園先知道天壇公園係非常非常之大，大既程度遠超想像，由公園入口係望唔到最出名既祈年殿


「北京天壇位於北京市東城區，是明清兩朝帝王祭天、祈穀和祈雨的場所。是現存中國古代規模最大、倫理等級最高的祭祀建築群。」

去到天壇太陽已經開始落山，陽光有黃昏既感覺，所以都唔敢慢慢行，要快啲趕路去參觀


好多老人家係道捉棋，天壇公園真係一個好適合佢地既地方，又大又舒適；政府對老人家又幾好，開放大部份地方比老人家免費進入，唔會浪費左個咁大既公園；而我地遊客當然要收費啦




冇時間睇佢地捉棋啦，我地要繼續趕路


行左咁耐終於去到啦，真係同睇相既一樣又高又大又圓丫；細個時已經覺得天壇祈年殿好得意，圓圓地一座野好可愛，而家我終於見到真面目啦，真係好可愛！

「祈年殿是一座直徑32.72米的圓形建築，鎏金寶頂藍瓦三重檐攢尖頂，層層收進，總高38米。祈年殿的內部結構比較獨特，不用大梁和長檁，僅用楠木柱和枋桷相互銜接支撐屋頂。殿內有楠木柱二十八根，數目排列切合天象：中央4根龍柱高19.2米、直徑1.2米，象徵四季，中圈12根金柱象徵一年十二個月，外層12根巨柱象徵一天十二個時辰，中層和外層相加象徵二十四節氣，三層柱總共28根象徵二十八宿。殿內地板的正中是一塊圓形大理石，帶有天然的龍鳳花紋，與殿頂的蟠龍藻井和四周彩繪金描的龍鳳和璽圖案相互呼應，使整座殿堂顯得十分富麗堂皇。」



祈年殿本身已經高，再加多三層六米高基座，真係好霸氣


祈年殿入面好高好宏偉


裝飾好講究，牆身同柱上都畫滿圖案，細緻到我都唔係好睇得清有咩畫左係上面






地下凹凹凸凸既？




祈年殿北面旁邊有皇乾殿






基座上有唔同設備，唔知道有咩用呢？




呢啲應該係去水口，設計得好有特色


睇到呢道要同祈年殿講再見啦，可以睇到咁靚既祈年殿總算不枉咁遠趕來


祈年殿旁邊仲有好多設施


八座「燎爐」用來燒松柏枝﹑松花﹑松塔等等；燒個時會發出「霹啪」聲同香味，據說可以「避邪」，又可以將香味送上天庭，係真唔係丫？




「燔柴爐」用來燒牛，有歡迎天神意思




「瘞坎」就恐怖啦，用來放牛血




真係要同祈年殿講再見啦


出左祈年殿範圍就要一直向前走，前面仲有好長路




路過「具服台」，儀式前後皇帝就係呢道換衫


遠離祈年殿




已經五百幾歲既柏樹


前面就係「皇穹宇」


「皇穹宇直徑15.6米，高19.02米，由八根金柱和八根檐柱共同支撐起巨大的殿頂，三層天花藻井層層收進，祭天時使用的祭祀神牌都存放在這裡。」



「皇穹宇」就好似祈年殿一樣咁得意，而且圓碌碌細細座，就好似迷你版既祈年殿，我都係一樣咁鐘意


行近啲望下先






入面一樣係畫滿圖案花紋，好精緻




皇穹宇正殿同配殿被一幅圓形圍牆環繞，就係傳說中既「回音壁」，不過太多人唔敢試回音壁係唔係真係有回音功效，見到好多人都對回音壁好有興趣，不停大叫......




皇穹宇旁邊有「東配殿」




有「東配殿」當然仲有「西配殿」，兩殿都係差唔多


離開皇穹宇就去到天壇最後一個重要地方 -- 圜丘


圜丘係皇帝舉行祭天大禮既地方；圜丘上面其實冇咩野，係中間有粒天心石，傳聞企上去大叫會有回音，我當然唔會去試~


圜丘都係冇咩特別，好快就睇完走lu




圜丘旁邊一樣有燔柴爐、瘞坎、燎爐同具服台


仲有「望燈」高柱；呢枝高柱就係用來掛望燈用


望燈台原本有三座，但被袁世凱推跌左兩座，所以就得返見到既呢一座咋






具服台？皇帝係呢道換衫？點睇都唔似啦？其實會先搭起帳篷再比皇帝換衫，而且地下有供暖設備，好先進




行晒天壇所有重要地方啦，又係時候離開；張相可以睇到天壇真係好大好大




天壇再見
天壇又大又舒服，而且可以見到咁得意又特別既圓形建築，係其他地方好少見，我覺得真係好值得到天壇參觀；而且今日又有好天氣，望見一個靚靚藍天，行起來都特別開心，呢個藍天對北京來講真係好難得


由南門出左天壇，因為行去地鐵站有小小遠，所以就睇下有冇巴士岩搭，順便沿途欣賞京城風光；上左一架疑似岩路去鳥巢既雙層巴士，上去上層揀個靚位慢慢坐慢慢睇


路過「前門」；今次冇機會去前門大街，下次有機會再去；巴士入到市中心既橫街就大獲啦！塞車！只係0.6蚊車費足足坐左兩個鐘！北京塞車嚴重已經一早知道，今次真係自己攞黎衰...車上望住地圖一路留意住係邊個站落車，過左兩個鐘終於去到差唔多既地方，其實都唔知岩唔岩，不過都係落左車先再打算，坐得太耐車坐到好悶lu


落左車睇住地圖，又走去問路，行左成個鐘終於望到目的地


北京路面真係好塞車，地鐵雖然係迫人，但起碼唔會塞車塞幾個鐘......


行近睇鳥巢真係好大，而且外型好特別，唔知既話都冇可能估唔到鳥巢係一個運動場




紅黃色燈光好靚，感覺就好似一團火燃燒，同旁邊水立方一藍一紅，顏色配搭鮮艷分明，黑夜中最搶眼就係佢地兩個啦，就算係好遠都可以清楚見到


以前既新聞中心，而家唔知有咩用呢？


新年快樂


睇完鳥巢就到水立方；水立方外型又係好特別，真係好似一個個氣泡，好襯游水呢個主題


鳥巢一早已經關左門，水立方夜晚仲係開門，咁就入水立方睇睇


入到水立方入面，嘩...原來係個水上樂園，好多野玩丫！完全冇諗過水立方會係一個遊樂場，一向都只係以為水立方係一個泳池，原來入面咁多野玩










唔少人係道游水；可以係水立方游水我相信係一件令人興奮既事，發夢都冇諗過；不過我諗我點都唔會係呢就游水，因為...咁多遊客望住又影相，好似好奇怪咁bor，游都游得唔開心啦


有人造浪玩，好耐都冇玩過啦


唔小心影到位外國人玩滑梯，哈哈^^所以呢道都係唔岩我玩


有個標準池可以游水


出面睇唔多覺，原來水立方入面好大好多層


見到水立方既主池啦！當年奧運就係呢道舉行！


入到去睇，同當年電視上見到既一樣，好靚丫；最衰當年唔識得來北京睇奧運，可能當時太細個連諗都冇諗過，每日就只係坐係電視前睇，如果可以去到現場睇氣氛一定好一百萬倍


有好多世界紀錄就係呢個泳池誕生




仲有好靚既跳水池，跳水比賽都好好睇




座位都係好靚，用藍白色配搭睇落去好舒服，又襯泳池環境，超正！




泳池出面有記念品店，呢啲貴野都係唔岩我架啦


記念品店唔岩，餐廳岩我啦
玩到咁夜已經到左晚餐時間，見水立方入面餐廳仲未關門就係道食啦，事關出到去咩都冇有排都未有得食；我叫左好鐘意食既烏冬，又真係幾好食，但諗諗下都覺得奇怪，點解會係北京食韓國野既？仲要係水立方食野唔平，唔似我風格，哈哈


朋友食既石頭鍋飯；今次係北京食既野都係好奇怪，除左今餐之外，仲有麥當勞﹑肯得基﹑吉野家...好似仲有港式茶餐廳，好多香港成日食既野都比我地係北京食齊，反而冇點食北京地道美食，如果問我北京有咩美食推介，我諗除左烤鴨之外都答唔到第二樣，冇理由答麥當勞既？？！




出左水立方，外面都係一啲運動相關設施，不過唔太特別




附近都冇咩地方好行，行去地鐵站又比較遠，所以就用最快最方便既方法返客棧--坐的士；夜晚街上車唔多，冇塞車好快就返到去，如果日頭就真係唔敢坐啦，試過有朋友係北京坐的士塞車塞左幾個鐘，行路仲快過坐車


最後一晚返到客棧，周圍都係一片寧靜，除左小食檔比較熱鬧


今晚試下另一檔，有唔少人幫襯


原來係鐵板燒，更加岩口味；嬸嬸用既工具好奇怪，佢唔係用鑊鏟呢啲正常煮食工具，而係用泥水裝修既工具，叫鏝刀同刮刀；用來裝修就見得多，煮野食真係第一次


好大塊肉餅，正！


食住野嘆蜂蜜酸奶，更正！呢種「老北京蜂蜜酸奶」好多地方都有得賣，造型仲好可愛，好多人都話又酸又好飲，不過我怕飲完唔舒服好少飲牛奶，所以都冇飲lu


又過左充實既一日；今日終於上左長城做好漢，又去左天壇，北京想去既地方基本上都去左lu，當然仲有好多地方想去，不過時間有限唔可以咁貪心，留返有機會再去啦，今晚要好好享受係北京既最後一個晚上，訓返個靚覺，因為明天又冇覺好訓啦！



第六天

今日唔需要再早起身，可以慢慢訓到夠，就係咁訓到十一點幾先起身，搞到夜晚訓唔著，哈哈^^今日幾個朋友都係一樣咁遲先身，好快大家就要分別啦，有人會返香港，有人去上海，而我就要繼續向西安出發；收拾好行李就起行啦，同大家&客棧小貓道別後，大家會繼續向各自目標前進！


出到去已經十二點幾，又到午餐時間，咁岩路口就有間吉野家，自自然就入左去lu；今次食香港冇既魯肉飯，不過呢個飯就好奇怪，唔岩口味，都係香港吉野家好食好多


路過護國寺小食街，好多都未開門，不過只係路過冇諗住係道食野；係呢道落地鐵站，坐地鐵去最近火車站既「軍事博物館站」


火車未有咁早開，仲有時間可以入去軍事博物館參觀，軍事野對男仔總係有一種解釋唔到既吸引力；門口可以免費寄存大背囊，拎埋免費門票就可以入場


博物館好多展品都好吸引，而且大多數展品都係真品唔係複製品，軍事迷好值得花時間慢慢欣賞；我一向係博物館都係睇多好少影相，隨意影左幾張
















有大型展品亦都有好多小型展品；展品實在太豐富，已經分唔到邊樣打邊樣，不過都感受到呢啲展品好真實﹑好厲害


展覽廳展示緊四川地震時既救援情況，又可以對地震有多啲了解




時候已經唔早，要離開博物館lu，向住北京西站前進；五日前係呢道來到北京，今日都係一樣係呢道離開，為北京之旅畫上完美句號


短短幾日北京之旅好快就結束，呢幾日都好開心好滿意去左好多唔同地方，全部地方都係自己選擇所以玩得特別開心；未到北京之前仲有好多地方想去，例如南山滑雪場﹑天津等等，最後都係因為唔夠時間所以要暫時放棄，唔緊要啦，去到故宮﹑頤和園﹑長城﹑天壇等等地方對我呢個歷史迷黎講已經好滿足，辛苦我朋友陪我玩左咁耐，明明佢已經去過兩次北京都要陪我去多次^^北京真係太大，太多有歷史意義既地方，就算比我留多一星期都一定睇唔晒，今次去唔到就唯有返屋企睇書上網，繼續認識北京；原來「讀萬卷書不如行萬里路」呢句說話係真架， 故宮﹑天壇﹑長城睇書真係由細睇到大，都唔知睇過幾多次，但當親身企係入面既時候，你會對佢有另一種體會，至於係咩體會就要自己去感受下啦！今次有少少美中不足既係睇唔到北京雪景，2011年撞正北京幾十年黎其中最乾旱既一年，要到2月10號先有第一場初雪，就係咁雪景同我無緣lu；算啦，天氣都係隨緣，今次有好天氣﹑有藍天已經好滿足！

北京再見啦！有緣的話總會再相見！而家我要變身做項少龍玩尋秦記，西安我黎啦！