經朋友介紹 上星期到大水坑村一個農地參觀‚ 朋友係果度租用一塊田種植已經有一年多‚ 見好似好好玩 心旭旭想試吓! 週圍八期間碰到一位伯伯‚ 佢塊田到下年9月先到期‚ 但今個月已經唔想再租啦! 如果小草接手 咁伯伯就唔使比人殺訂‚ 小草又可以用舊價租田 (月租 舊$300; 新$400-450)‚ 諗咗兩日 決定承接。
今日 (Sep 14, Sun) 正式掛上學神牌‚ 未到11:00就開工‚ 第一個任務 ~ 清場。開工一陣 已經汗如雨下, 好耐未試過咁樣流汗啦! 話咁快就個幾鐘, 初步清場完畢。
下一步 ~ 翻土, 因為伯伯已經停工一段時間, 之前又落過雨 啲泥土結埋晒, 要翻土都唔係咁易! 好在一路朋友都有出手相助, 唔係小草都唔知點攪, 相信用個鋤頭同鏟整幾吓已經手軟 :p
整鬆啲泥之後就施肥, 一邊散肥一邊整散啲泥再撈均佢, 另一個勞動任務! 最後洒上消毒粉。臨走前播咗啲菜種, 唔知會唔會發芽呢!? 第一課任務完成!
好彩呢項工程唔使經常做, 當時都唔多覺 返到屋企前臂開始痛囉! 全程都無落雨, 太陽伯伯雖然偶爾都會行開一陣, 但小草已經燒焦咗 >_< 下星期可能打風, 唔知塊田會變成點呢!?
============================================
感謝 小草河邊草 提供以上資料
小草河邊草的網誌: http://grassatriverside.wordpress.com/
============================================