兩母子迪士尼之旅

3 OCTOBER 2014(FRI)

今日係小小豬嘅學校假期(唔關停課事)，難得係平日放假，當然唔好浪費依個咁好機會，兩母子又嚟拍拖玩返日啦~

其實我之前都有考慮過係唔係真係入園玩，話晒都係十月黃金周，一定迫人得好恐佈。不過我係啲討論區見到話十月一日入園唔多人，仲要比平日嘅星期六日還要少人，加上今日天氣又好似幾好，所以最後都決定入去園轉，等小小豬開心吓。

我又嚟估計錯誤，因為今日真係勁勁勁多人，基本上每一個遊戲都要排45分鐘以上，就連平日完全唔洗排隊嘅3D劇場，今日都要排30分鐘，真係見啲等候時候都真係問你怕未。

不過，既然嚟到冇理由就咁走，所以就開始展開今日排隊多過玩嘅玩樂一天啦！雖然係用多左時候嚟排隊，不過小小豬係排隊時又出奇地合作，就算排一個鐘先可以玩到個遊戲，佢地好乖乖咁等，只係間唔中問我拎嘢食，所以小小豬嘅表現都令我覺得今日嘅排隊係值得呀！

入園第一時間就當然係換魔術師MICKEY影相啦，不過好好彩我地都只係排左半個鐘就影到。小小豬一見到MICKEY都不知幾開心，緊係啦....佢好耐都冇同MICKEY影相啦~

之後我就係向TOYSTORYLAND進發，平日唔多主動叫影相嘅小小豬，今日有少少一返常態，叫我幫佢係度幾個位置影相。不過，可能佢係見到其他小朋友影，所以佢先想去影。既然佢咁主動，我當然好樂意啦~

上次入嚟因為雷電關係，差唔多到我地就停左，所以就冇得玩彈弓狗，所以小小豬一入樂園第一個就係去玩彈弓狗啦~

努力排左一個鐘之後，終於到我地啦~

依個傻豬仔真係勁攪笑，上幾次玩嘅時候佢都完全唔驚，今次唔知係唔係聽到後面個小朋友嗌嘅關係，佢又跟風兼非常肉緊咁嗌埋一份。見到佢依個樣其實又真係好好笑呀~

之後就夠鐘睇巡遊，不過因為我地遲左去，所以搵唔到個好位置，我唯有全程抱住小小豬嚟睇啦。到左小朋友出去玩嗰部分，因為我地係企第二排，根本都係冇位置可以行到出去，不過有一位媽媽佢真係好好人，知道小小豬想出去玩，所以就主動讓左條路等小小豬可以出去跳舞呀~

睇完巡遊，小小豬就要去玩揸車車，其實依一刻都真係有啲驚，因為職員係預計要排90分鐘先可以去玩。見到咁都真係有啲想打退當鼓，不過小小豬好誠懇咁話：不如我地排隊啦！依一刻心軟了，所以又嚟排隊了~

最後我地排左一個鐘多少少就可以上車啦~

真係慶幸我有少少心軟，因為小小豬揸車真係玩得好興奮，原來所以男仔都係鐘意揸車車，睇嚟我之後每次入嚟都一定要俾小小豬揸返轉先得啦~

繼續玩巴斯光年，好彩唔洗半個鐘就玩到啦~

之後我就同小小豬去食晚餐，接下來我嘅救星就出現，因為大肥豬放工之後就入園JOIN埋我地一齊玩呀~

見小小豬揸住支光彩筆，就知我地準備睇光影匯啦！不過可能今日係銀咭人第一日可以睇依個SHOW，所以都真係迫滿晒人，好辛苦先搵到個叫做好少少嘅位置俾小小豬睇呀(今次到大肥豬抱住小小豬睇啦)！

今次都係小小豬第一次睇光影匯，不過佢真係睇得好投入，一邊揮揮光彩筆，一邊專心地睇~

由於今次位置唔多靚，同埋主力睇小小豬個反應，所以都比較少影啲花車。如果大家有興趣，可以去睇返我預演嗰日嘅情況呀(按此重溫)~

睇完光影匯，我地就去小小世界。慶幸中午時冇同小小豬嚟排依個，因為依一刻完全唔洗排隊，真係我覺得全日至正嘅遊戲呀~

最後我地就玩埋轉轉杯~

依一刻嘅小小豬已經冇晒能量，竟然主動同我地講話玩晒啲遊戲，可以返屋企。不過，佢之後講多左一句：我地下星期再入嚟玩過呀！我又要再睇夜晚巡遊呀！

哈哈哈...我當然好樂意再帶小小豬入嚟玩啦，但下次入嚟到應該要等11月嘅銀咭日！

MY FACEBOOK~


MY WEIBO~

 

MY E-MAIL~

 

 

其他博客區

※※ SINA ※※

※※ MyBB星級Blogger ※※

※※ She.com ※※

※※ WeShare ※※

※※ theZtyle ※※

※※ U-Blog ※※

※※ SeeWide ※※

※※ BlogSpot ※※

※※ BK Milk 親子語 ※※