1

麗江。冰雹下的麗江古城

平凡人 於 2014-10-12 01:30:00 發表  |  累積瀏覽 527

分類:長線旅遊 特色景點 古蹟 ;地區:中國

< 北京﹑西安﹑成都﹑雲南23天遊 > 


第十八天

今日天氣繼續唔多好,冇左之前見到既藍天白雲,但我又唔覺得有咩失望,係古城行下hea下,同狗仔玩下,出去食個飯又睇下電視,一日時間話咁快就過;諗諗下而家都唔似係旅行,似渡假多啲...旅行又好渡假又好總之開心就得啦;客棧係包早餐,之前日日都掛住去玩冇食到,今日終於有機會品嚐一下,簡單既豆漿油炸鬼,最重要係有兩隻得意小狗陪住一齊食


狗仔完全唔怕人,我去到邊佢就跟到邊,又會自己走入房搵我陪佢玩,咁識氹人開心抵你得人鐘意


到左下午係時候出去行下,都係冇目的隨意走走




四圍都可以聽到流水聲;河流有大有少,有大聲有細聲,無論大定小所有清澈流水都會發出清翠音樂,唔係好多地方可以體會到,來到古城就可以感受到啦^^






又行到去大水車廣場,都唔知到過呢道幾多次啦;今日係古城已經好少影相,想影既一早已經影左,所以可以專心用眼睛去欣賞呢個美麗古城


行多兩行就係路邊搵左間睇落企企理理既餐廳午餐;而家已經係三點半,應該係食下午茶先岩




今次玩食辣野,叫左碗好辣既酸辣粉,正!


仲有碗紅油抄手,越辣越開心


係差唔多食完既時候出面發生左奇怪既事,無啦啦有奇怪聲音發出


地上有啲一粒粒既野?




枱上都有?


嘩...原來係傳說中既冰雹,好彩係細細粒冇殺傷力!見到冰雹令人非常興奮,冰就見得多第一次見到由天上落下來既冰咋,即刻出去感受一下冰雹既感覺!


冰雹越落越大,大家都行到路兩旁避冰,係得啲傻仔會走出去比冰淋(我冇講過我係傻仔丫!)


冰雹落左唔知幾耐終於落完,除左地下濕左之外古城又回復原來樣子;日頭酒吧街人影都唔多個,如果唔講都未必估到呢條就係大名鼎鼎既酒吧街




冇人仲好,可以係道慢慢影相,唔洗比人嘈住晒,夜晚真係嘈到人都顛,去聽演唱會都冇咁大音樂聲




有咁多金魚既


行多兩行就天黑,都話左時間過得好快架啦


古城入面有一條小食街,客棧老闆娘叫我地千其唔好係道食野,因為啲小食唔乾淨;不過我將老闆娘既說話當成耳邊風,黎左呢道買野食,好彩食完冇事咋,不過如果而家比我揀多次我真係唔敢再食啦






天黑後古城再次變成一個五光十色既麗江古城




有酒吧美女開始出來拉客


都唔明點解咁多人都鐘意去酒吧?酒吧個個地方都有唔需要咁遠路去到古城掛?明明古城最靚一面係建築﹑文化,但偏偏最旺最熱鬧就係酒吧街,真係好奇怪?






時間尚早人流未算多,呢道吸引到我既就係一個個燈籠高掛係屋上,睇落係幾靚;可能燈籠係中國其中一個最特別既文化,突然諗起變形金剛係深水埗拍戲時都要掛幾串大紅燈籠係唐樓之下,好似驚冇人知呢道係邊道咁,如果外國人來到呢道見到咁多燈籠一定like到爆啦!不過外國人喜歡去大理好少來麗江......






今日中午都曾經來過呢道,夜晚係唔係更加靚呢?


呢條路唔知行左幾多次啦


行行下又出到去大水車出面


今晚大水車廣場好熱鬧,好多人跳舞,大家係冇人帶領之下都跳得好整齊好開心,路人有興趣的話可以隨時加入;呢啲旅行先開心ma,只係簡簡單單行下跳下大家就已經好開心啦,邊洗去酒吧呢啲高消費地方




望向山上一層層房屋,燈光之下真係好靚


再來到地標大水車影相


大水車對出有間「龍抄手」,當時覺得係假野冇食到;後來過左好耐先知道呢間龍抄手係真野黎架,係成都龍抄手其中一間分店,邊估到龍抄手會將分店開到來麗江!一直以黎我都好想食既龍抄手就係咁好多日都同我擦身而過,只可以話係有緣無份


大大個月亮升到半空,又係時候回程


路過今日下午食酸辣粉既小店,原來叫「川味人家」,唔怪得辣得咁過癮,心思思聽日又想來辣一下,哈哈^^


一路向客棧方向走去




又路過小食街,行左咁耐都未食晚餐,睇下呢道有冇野可以填飽肚都好






烏雞米線好似好出名,好多地方都可以見到,今次既然係呢道相遇一於試下啦


有好多人食緊味道應該唔會太差




雖然係大排檔形式,但旁邊就係一條小河,聽住流水聲再配上一個咁靚環境,無論視覺或者聽覺一樣係高享受




可惜米線味道麻麻,真心覺得唔好食...而且咁細碗食完同冇食過冇分別...


食完米線繼續試下其他小食,特別試左呢個自稱「雲南十八怪,豆腐包著豆漿賣」既豆腐,不過都係唔好食,豆腐又冇味又唔知點,食左少少就掉左...睇個樣紅色仲以為好辣


冇野好食啦,早啲返去客棧睇電視好過;呢幾日實在太無聊,係客棧睇電視變成左追劇,每晚夠鐘就會返去睇一套叫「我是特種兵」既電視劇,直到返左香港都繼續睇~


又係麗江過多一日,明天會去邊真係唔知,訓醒先再打算啦!既來之則安之^^



第十九天


今日起身繼續唔願出門口,寧願留多陣係客棧好過,順便幫客棧影下相(老闆娘開既木頭人客棧已經唔存在啦,可能生意太難做,我住既六晚都冇其他住客,就只有我住既呢間房租出,而且仲要係特價一百蚊,出糧比員工都未必夠,唉......)




客棧有兩間電視房,一間有xbox玩


另一間有wii玩


仲有最好玩既足球機,好多野玩


下午又係時候出去搵食,雖然麗江古城係靚,但對得耐真係好悶,已經冇意欲四圍行,出來都只係為左食野咋




有保護色既狗仔


第n次經過四方街


去返琴日食過既「川味人家」繼續食辣野,又係食酸辣粉


今日加餸叫多個水煮肉片,越辣越正
係四川食唔到水煮肉片,竟然係雲南食,諗落好似有少少奇怪,唔理咁多好食就得


食完野冇地方好去,返去客棧算啦;今日有好多野要處理,首先要報定明天去香格理拉既local tour,因為唔夠時間自己去所以報團比較好,咁就唔洗擔心買唔到巴士票,另外就係要買定後晚去昆明火車票;報團同買火車票都有專人上門處理,我只要乖乖地留係客棧就可以

轉過頭又到左夜晚,再次出去行行順便搵野食


古城有一個寧靜晚上




去到東巴紙紡,揀啲禮物送比自己,仲要買我最愛既明信片






今晚天氣好好,大大個月亮高掛,希望聽日一樣有好天氣!無論聽日係點都會離開麗江,可能會去香格里拉,又可能會去大理,睇下命運安排我去邊啦


買左晚餐返客棧一路睇電視一路食


食完野仲要忙住寫明信片
而家去旅行仲有寫明信片習慣,寄比自己又寄比朋友,去旅行唔太識買手信,只係識得寄下明信片咋,希望收到明信片既朋友會喜歡這份來自遠方既心意;而家去旅行就算冇時間都會堅持寫上一張張明信片,有時候係火車上寫,有時候係車站寫,有時候攤係床上寫...就算幾眼訓都繼續寫,哈哈^^希望我都可以收到朋友寄來既明信片啦!


晚上要執好行李準備明天一早出發


六日麗江之旅過埋呢晚就結束啦,雖然係麗江住到悶,不過我都係覺得麗江係一個好靚好值得去既地方;麗江除左古城仲有好多地方可以玩,玉龍雪山﹑白沙﹑瀘沽湖等等,呢啲靚地方都係好值得去,只可惜今次我無緣欣賞每一個靚景...唔緊要,將來仲有好多好地方等住我,明天就會去一個全新地方,期待明天會有驚喜啦



鐘意SeeWide的分享,給我們一個Like吧!
  • 攻略日期:N/A
    攻略地點:中國
  • 攻略時間:1日以上
    是次消費:N/A
1人比"掂"
  • 羊羊 於2014-10-12 21:02:18 留言
    你又搬左過來,認得我嗎麗江古城好商業化﹗
  • 舉報 回覆
  • No.3
  • 平凡人 於2014-10-13 01:43:30 留言
    原文由 stellaluk 於 2014-10-12 07:57:38 發表
    相信第一次感受冰雹雨都很難忘
    Ya~第一次見冰雹又新奇又有趣
  • 舉報 回覆
  • No.4
  • 平凡人 於2014-10-13 01:46:58 留言
    原文由 EEChan 於 2014-10-12 20:53:04 發表
    可以閒遊也是種享受
    麗江係一個市適合閒遊既好地方
  • 舉報 回覆
  • No.5
  • 平凡人 於2014-10-13 01:55:31 留言
    原文由 羊羊 於 2014-10-12 21:02:18 發表
    你又搬左過來,認得我嗎麗江古城好商業化﹗

    緊係認得啦,我有追看你既新加坡遊記架不過而家冇時間update blogspot,所以都懶上去留言,sorry夏天麗江古城會迫爆,超級商業化
  • 舉報 回覆
  • No.6

最多能輸入300字

累積瀏覽 112287

全部攻略 126

全部回應 1394