16 OCTOBER 2014(THU)
今日係小小豬學校嘅戶外學習日，成班同學仔一齊去鰂魚涌公園學習。我仲被老師邀請做義工家長，去幫手照顧小朋友，所以我有得跟埋一齊去啦~
其實今次雖然我有份跟埋一齊去，不過我係負責照顧另一組小朋友，唔係跟住小小豬。就係因為咁，依隻痴媽豬就開始發傻，一入到課室就開始扭計喊，真係失禮C人，好在最後老師都幫忙解釋，所以最後都可以順利出發。
雖然又真係失禮左啲啲，阿Q啲諗，其實小小豬都係鐘意跟住我，所以先會係咁扭計，我係應該開心先係，起碼到依一刻佢仲係鐘意痴住我嘛！不過，現實啲諗，都係時候要訓練一吓小小豬，佢都大個仔，要獨立吓唔好吓吓痴住我先得啦！
所以有時又真係好矛盾，既想豬仔可以痴多啲錫我多啲，但又其實係需要學習獨立，所以有時都真係好15/16。
好啦...順順利利出發，一去到公園，就影返張大合照先啦(今日啲相因為會影到其他同學仔，所以做左少少手腳呀)！~
之後小朋友就分組跟住老師同義工家長，沿住海濱走廊行，一邊留意吓四周嘅環境。由於我都氣中精神照顧我負責嘅小朋友，所以都冇乜時間睇小小豬。
當然，八卦的我在情況許可下，都有望向後面，睇吓小小豬做緊乜。好在我幾次望都見到佢有跟住老師一齊行，都尚算留心啦~
之後我地就去左參觀消防船~
鰂魚涌公園我地都成日嚟，今次都係第一次去參觀消防船。原來入面都幾多嘢睇，不過因為今日時間關係，所以都係行左一轉，睇得唔夠喉，搵日再帶小小豬嚟睇多次先得~
今日最後活動就係係公園旁玩吹泡泡，由於要照顧其他小朋友，所以都冇時間同小小豬影啲開心相添~
雖然都只係玩左五分鐘左右，不過見到成班小朋友一齊開心玩泡泡，自己都會被感染，心情都特別興奮呀！
隨住玩完山泡泡，今日小朋友嘅戶外學習就完成，我地一齊行去搭校車返學校啦！
今次亦都係我一次以家長義工身份外出幫手照顧小朋友，不過話時話，其實由答應嗰日開始，我都感受都有少少壓力，因為同啲小朋友又唔多熟，又唔太認得佢地，所以都真係驚好驚走失小朋友，好在一切順順利利，咁我就放心晒啦！
其他博客區
※※ SINA ※※
※※ MyBB星級Blogger ※※
※※ She.com ※※
※※ WeShare ※※
※※ theZtyle ※※
※※ U-Blog ※※
※※ SeeWide ※※
※※ BlogSpot ※※
※※ BK Milk 親子語 ※※
