7 PizzaExpress：親情不薄

由山區麵包王於 2014-09-20 00:00:00 發表 | 累積瀏覽 1369

分類：餐廳；地區：尖沙咀

是次消費：每人平均約HK$ 135.00

之前幫襯過PizzaExpress好幾次，印象一向唔錯，亦知屋企人都幾鍾意食吓薄餅，趁住細佬生日，就帶佢哋嚟試吓，品嚐吓PizzaHut、PizzaBox……等等以外嘅薄餅喺點。

一早透過官網嘅網上訂位系統，方便快捷，簡單易用。而K11分店喺第一次嚟，晌商場內一個死角位，都有少少難搵。近門口被「吊起」嘅「綿羊仔」，自然成為入門口嘅焦點，其實，估唔到店內原來幾大，枱椅又排得疏鬆，感覺闊落，並無用盡每吋空間，加上我哋嚟得早，人客未多，所以，坐落令人唔會太拘束。

由於星期六晚關係，無咗平常嘅4 / 6人套餐，唯有散叫，當然唔及食套餐划算。

翻餐牌期間，發現幾款頗具中國色彩嘅熱飲：「荔枝茉莉花茶」、「玫瑰洛神甜莓茶」、「玫瑰普洱奶茶」及「桂圓紅棗茶」，明顯喺針對國內遊客，特別為「人民幣」服務咁款。

菜式基本上分為頭盤、沙律、羅馬薄餅（餅底薄脆）、傳統薄餅（較羅馬薄餅厚少少）、輕盈薄餅（薄餅中間挖空加入新鮮火箭菜）、薄餅餃、意粉等，我記得以前仲有一類叫那波里薄餅，不過已經無賣喇。

串燒香草烤雞 $58

從餐牌所見，依個「小吃一口」頭盤喺新推出，一客賣$58，兩客則$98。烤雞肉切成一口一嚿，沾滿羅勒香草醬，焦香軟腍；而碗下放有西瓜及火箭菜，前者出奇咁超甜，後者有朕芝麻味，好濃但少少偏苦，不過，仍然值得推薦嘅小口餐前小食。

蟹肉香脆包 $75

頭盤除咗上述「小吃一口」之外，又有一類叫「頭盤分享」，即大份少少足夠幾個人享用，蟹肉香脆包喺其中之一。雖叫「香脆包」，查實以脆薄餅做底，加上蟹肉、青瓜粒、乾蔥粒，配以酸忌廉、刁草汁、橄欖油；餅底以為脆，但質感煙韌，蟹肉不少，夾埋一齊有口感，又惹味，唯美中不足喺橄欖油實在落得太多，雖然話橄欖油相對健康，但太多又未必喺好事，物極必反嘛。

北京烤鴨薄餅 $134

PizzaExpress嘅薄餅不時有新奇嘢，而烤鴨薄餅屬羅馬薄餅系列，不過已經唔喺咩新嘢嚟。薄餅一睇就知喺手拉，果然夠薄、夠脆，其實味道不俗，又有焦香邊位，不過賣相麻麻，而且食得出個師傅喺hea做，一來啲烤鴨醬搽得唔勻巡，所以，有啲位置OK，有啲會過鹹，就連啲烤鴨件亦放得好「求其」，起碼一眼就見到有件薄餅之上喺無烤鴨啦。

意式肉丸蝴蝶粉 $106

啲肉丸實在細粒，份量又少，幸好個蝴蝶粉煮得好食，蝴蝶粉薄薄一層沾滿忌廉醬汁，又帶有香草及芝士味，最睇佢唔出原來喺帶點點辣勁，令整體味道上複雜而更有層次。

肉醬千層寬麵 $108

外表睇落就平平無奇，不過，個千層麵做得有水準，寬麵、肉醬一層疊一層，焗得焦香，而蕃茄醬熬得酸香細緻，只喺稍嫌佢太稀，令到啲寬麵唔喺太掛汁。

食晒啲嘢後，大家都飽得七七八八，但仍有少許空間擺甜品。PizzaExpress亦有甜品嘅專用餐牌，不過，睇嚟睇去都喺唔太啱佢哋口味嘅嘢，所以，改為晌外面搵食甜品嘅地方，原本目標喺isquare嘅滿記，點知去到先發覺無咗，結果去咗isquare對面嘅許留山（樂道）。

今次所揀嘅幾道菜均頗有特色，個人心水喺串燒香草烤雞同蟹肉香脆包，就連壽星仔都覺得OK。雖然佢生日，只喺請食薄餅，但加埋封利是仔，有獎品，又有獎金，算喺咁啦！

個人評分
味道：7/10
環境：7/10
服務：8/10
抵食：7/10
平均每人消費：HK$135

餐廳資料：
PizzaExpress
尖沙咀河內道18號K11購物藝術館1樓107號舖
2317 7432

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================