探險家攻略 > 美食之旅 > 餐廳 > The News Room Diner：新聞客訪

8 The News Room Diner：新聞客訪

由山區麵包王於 2014-09-29 00:00:00 發表 | 累積瀏覽 1628

分類：餐廳；地區：鰂魚涌

是次消費：每人平均約HK$ 300.00

認識幾位相熟食友都喺住晌港島東，順應「民意」作為訪客嚟到太古坊嘅美式餐廳The News Room Diner，一同聚餐之餘，更順道為好姊妹慶生辰。若非如此，真喺一世人無乜幾多次會嚟到鰂魚涌、太古等地方搵食，又喺一次大鄉里出城嘅經歷。

太古坊無十年，都有八年無嚟過，就算嚟都只喺路經多。聽友人講，The News Room前身喺賣精緻嘅歐陸菜，最近先搖身一變供應美國菜，提供唔少熱狗、漢堡、奶昔……等等美式餐飲美食！

既然大賣美國菜，裝潢點都要有一致性，由於唔喺快餐式，所以，裝修唔馬虎。近入口嘅酒吧區，最啱三兩知己把酒談心，而入內嘅用餐區，燈光柔和，白仿磚牆，深啡木櫈襯墨綠雲石餐枱，加埋悠閒音樂，令人輕鬆自在。而當中最能代表美國文化就一定喺牆上嘅美式插畫。友人話依啲叫「普普藝術」，哈哈，小弟自認無乜文化，唔多識分，上網查完都唔太明，總之就覺得生鬼啦！

食物選擇上，除咗一份跟銀行合作嘅晚市餐套外，主要都喺枱面上A3大細做成餐枱紙嘅餐牌，色彩繽紛，包括類別有All Day Breakfast、Salads、Hot Dawgs、Sandwiches、Meat & Comfort、Burgers、Fingerlickin’s Special、Side Dishes、Sweet Endings及Milkshakes。此外，仲有一欄叫Celebrity Combos，以唔同嘅餐湯、沙律、頭盤、主菜、甜點及飲品作配搭嘅套餐，定價都喺$135-$195，較散點划算，初時無為意，原來都喺以荷里活巨星命名。

Crab Salad $90

沙律類共有4款，定價$88-$105，睇中蟹肉沙律都喺因為平時少食。放滿沙律菜、車厘茄、青瓜、甜粟嘅沙律底，色彩鮮麗，簡單油醋調味，清爽健康，再配以絲絲清甜蟹肉，令個田園沙律立時變得唔單調。

小食類名為Fingerlickin’s Special，8款小食由$65-$120，香口嘢唔少得，水牛城雞翼又唔少得，加埋店方推介嘅墨西哥夾餅，已喺成為一個滋味前奏。

Quesadilla with Pollo $80
睇名真喺唔多知喺咩，原來喺以墨西哥薄餅做成一道小食，烤烘後嘅墨西哥薄餅暖烘烘，睇落平平無奇，原來已加入蕃茄醬、洋蔥粒、雞肉等等做成夾餅，薄餅口感煙韌，因為已有肉餡，淨食已經不錯；更可按自己喜好，佐以酸忌廉、蕃茄莎莎或牛油果醬，各有風味，的確喺一道好有特色嘅小食。

Fried Crispy Prawns $72、Sweet Potato Fries $35

前者喺小食嘅炸大蝦，後者其實喺伴菜（Side Dish）嘅炸蕃薯條，其實唔特別去分，數款伴菜都可以作為小食。原隻吉列炸大蝦一客有6條，炸得實在香脆，脆漿又夠薄，蝦肉爽彈，配微辣嘅沙律醬，中和一吓「熱氣」，令味道多份層次；至於個炸蕃薯條有少少失望，雖則粉甜，但唔脆喺其致命傷。

Buffalo Wings $65

水牛城辣雞翼唔使好介紹就知喺美式小食嘅名物，大隻，醬汁香濃喺其賣點。雞翼焗得金黃，皮脆肉嫩唔在講，又富肉汁，最正可以蘸點辣醬或藍芝士醬，更加惹味。

一輪小食過後，就喺分享一啲較為飽肚嘅包類，Hot Dawgs、Sandwiches、Burgers每類都試番一款，試多啲嘢之餘，又可以互相比較一下，邊類做得好啲。

The Mexican $70
熱狗類只有3款，價錢為$65-$70，當中以The Mexican最有特色，印象中都曾經晌一啲熱狗店試過依款熱狗，記得喺辛辣惹味，而今次重遇，味道回憶返晒嚟。熱狗大概有8吋長，上枱時本身己打開咗，上面手撕豬肉鋪得滿滿，唧上芝士辣醬，一啖咬入口，就算幻想唔到身處墨西哥，都滿口火辣，滋味滿fun。

Philly Cheese Steak Sandwich $108

初時以為嚟錯咗，因為件「三文治」外形跟熱狗無咩兩樣，真喺無諗過，而多款三文治定價晌$82-$108範圍內。三文治以烤牛肉、芝士、洋蔥及青椒為餡料，牛肉用上原件西冷，唔怪得咁嫩滑，食肉獸一定開心死，而半溶嘅芝士，令口感更緊緻，不過，稍嫌醬汁多咗啲，食到尾個包身腍晒，影響個口感，要扣點分。

The Wagyu $138

始終喺間美式餐廳，漢堡嘅款式相對多啲，7款口味由$92-$138，就以依個「和牛」最貴最有霸氣。賣相平平無奇嘅和牛漢堡，味道行先，睇個餐牌知佢除有和牛所做嘅漢堡扒之外，仲有煙肉、芝士、蕃茄、生菜、酸青瓜及另一亮點自家製松露蛋黃醬，而蕃茄、生菜、酸青瓜放在漢堡一旁，大可按個人喜好先加入去，令彈性大得多。成個漢堡成3-4吋厚，最好幾個人一齊分嚐，牛肉打得實淨而鬆化，牛肉味濃，配以松露蛋黃醬，濃香有個性，個人就覺得加番啲酸青瓜平衡吓煙肉同芝士嘅鹹味就最好不過。

BBQ Pork Ribs $170

肉類嘅大菜就揀咗店家嘅招牌「燒豬肋排」，燒得焦香，亮麗有光澤，單睇賣相已引得人流晒口水；一落刀已感受到肉質十分之軟腍，入口味道又帶點酸酸甜甜，肉汁香濃，唔點啲燒汁都同樣好食，因為本身已好入味。

Mac ‘n Cheese $85

另一道大菜Macaroni and Cheese，就即喺通粉同芝士，以小煎盆盛載嘅通粉，鋪滿白汁同芝士，焗得金黃。雖然簡簡單單，但味道一啲唔差，通粉無焗過籠，有咬口，啖啖滿有芝士香，3-4人分享最合適，因為幾濃重芝士味，獨食會太「漏」喇！

Sautéed Vegetables $35

除沙律外，餐廳本身無乜蔬菜食品，不過，伴菜中有一道炒雜菜，大可點嚟當一味素菜，平衡番成餐都喺肉嘅現況。個炒雜菜其實一樣好簡單，牛油、蒜蓉、黑椒炒吓西蘭花、甘筍、法邊豆……等等，相信當日有咩菜就炒咩菜。

食到尾聲，都喺時候同甜品講你好，好彩我哋夠人多，個個就算唔喺甜品精，亦對甜品無任歡迎，所以，就一次過試晒店內5款甜品（$60-$70），滿足嗜甜嘅心魔。

Home-Made Donuts $60
一客有6粒新鮮炸起嘅冬甩，金黃亮澤，件頭頗大，冬甩都喺一啲炸粉糰，本身無乜味，所以要靠沾香橙醬或鮮忌廉提味。冬甩軟綿唔油膩，喜歡甜啲可點香橙醬，酸酸甜甜又帶微甘；相反，唔想太甜，可點鮮忌廉，令口感多添一份柔滑，有食友建議改為配雪糕球，一凍一熱，亦喺一個期待嘅食法，最好淋少少焦糖漿，相信更正。

Chocolate Walnut Brownie $70

布朗尼蛋糕一向喺心水甜品之一，兩件布朗尼加上鮮忌廉及雲呢拿雪糕，再淋上朱古力漿，喺頗傳統嘅組合。布朗尼質感挺實、黏潤，濃濃嘅朱古力香，配搭著鬆化嘅合桃，喺標準嘅質感同味道，做得有水準！

Apple Tart $64

無刻意為朋友預備慶生蛋糕，而依件蘋果撻就正正可借用成為慶生蛋糕。撻底非常酥脆，又富牛油香；撻內滿載蘋果肉，焗得軟腍，又帶微微玉桂味，而面面又加上少少金寶，實在美味；雲呢嗱雪糕球，都變得有無皆可。

N.Y. Cheesecake $62

紐約芝士餅本身比較「漏」，配上雜莓醬就最好不過，襯上蓋莓及薄荷葉，細小精巧。蛋糕嘅芝士味好濃郁，質感厚實，好足料，面層嘅酸忌廉做得夠薄，只喺挑剔少少嫌個消化餅底有點厚，但已認為件紐約芝士餅已好高質素。

Chocolate Sundae $68

幾款甜品中，以朱古力雪糕新地最為普通，就只喺幾球雪糕，唧上朱古力漿及焦糖漿，灑上花生碎而已，當然，味道不俗，啖啖甜蜜，只喺相比之下，較其他欠缺特色，不過，都相信有唔少雪糕迷會揀佢做餐後甜品嘅。

飲品方面咪以為得奶昔咁美國，另有一個飲品餐牌，羅列咗啤酒、烈酒、餐酒、雞尾酒及多種非酒精特飲……等，不愁無選擇。

荔枝士多啤梨奶昔 $50

所有奶昔都喺劃一價賣$50，小弟就揀咗杯Lychee’N Strawberry，顧名思義，就喺荔枝加士多啤梨，入口冰凍，以新鮮生果加雪糕打成，味道香滑，士多啤梨挺突出，反而荔枝味唔喺好覺。

今晚食得好開心，嚟到依度與友人飯聚，一來可以試到新店菜式，飽嚐多道美味菜式；二來又可為人慶生，彼此言笑談歡，又講起有啲好耐無見嘅朋友，唔知近況又喺點呢？或許，no news就喺good news吧！