之前我們都有興趣參加"新創建香港地貌行", 不過幾年來唔係時間唔夾、對路線冇興趣, 就係中唔到簽, 或者時間唔啱, 今年終於成功報名, 有得去行山~~ 這次又是3人行, 搵埋奶奶一齊玩~~
沿途看到的海景很美哩~~ 下文再分享多些相片~~
一齊行去碼頭先~~ 見到就嚟起好的香港摩天輪~ 雖然臨海的風景一定唔錯, 不過報紙話成人1張票都要100蚊, 真係要諗吓坐唔坐~~
去到5號碼頭, 登記之後就拎免費船票~~ 張票好大張, 因為有地圖, 背面就有船期~ 這次活動係包來回船費, 喺芝麻灣落船, 行去梅窩, 之後可以免費坐船回中環, 或者坐一程橫水渡去其他離島 (例如長洲), 不過之後坐船返中環就要自費了~~
上船之後, 冇咩做, 趁住未暈船浪, 影吓維港先~~ 這日有難得的好天氣~
清楚看到昂船洲大橋~~ 原本都想看多點風景, 不過可能早起身, 人有點累, 要小睡片刻......
起身的時候, 已經到了芝麻灣~~ 海天一色~~~
自己係第一次來芝麻灣, 不過都知道呢度有間懲教所~ 第一次咁接近這類設施哩...
一個平靜的小海灣~~
大家浩浩蕩蕩落船~~ 今次活動應該有幾百人~ 所以主辦人將大家分成4組, 由中學生組成的青年大使為大家作導賞~
這個就是芝新懲教所和芝麻灣懲教所的地圖~~
這些懲教設施平時真係唔會特別去參觀~ 依家好似變成旅遊景點, 大家都在影相~~
重重鐵絲網背後不知有什麼人?......不過當日行過就見唔到任何人......
好多人都留心聽青年大使的介紹~ 可是奶奶同老公都想行快啲, 於是就冇聽到繼續行~~
希望除了觀光之外, 唔會再有機會去這些懲教設施啦...
其實芝麻灣有什麼特別? 根據網頁介紹, 除了懲教所之外, 芝麻灣半島有1億4千萬年歷史的花崗岩, 即係特別的地貌~~
行了一段路之後, 我們去到一個類似河口的地方~~ 大家又急不及待行去看看~~ 這裡叫拾塱, 又係第一次來哩~~ 自己去大嶼山都係去過好少地方~~
這條寧靜的小村, 原來都有獨特的風貌~~
根據網頁介紹, 這裡有個潟湖, 就是這個涌口~~
真係好想睇多一陣, 不過又係時候趕路啦~~
秋天的太陽不算好曬~~ 不過時近中午, 都開始有啲熱~~
之後行到去拾塱村的另一處~~ 點知見到幾隻水牛~~ 又係估唔到呀~~ 平時通常見到的都是黃牛、啡牛, 咁近見到水牛真係唔係好多次~~
除了水牛, 這裡有昔日的梯田遺址, 見證以前村民的農耕歲月~~
水牛見到一大班人影佢哋, 有幾隻都識望鏡頭添~~
影低鄉公所先~~證明來過拾塱~~ 不過通常村村都有的天后廟, 這裡似乎沒有哩...
村公所對出就是一個美麗的小海灘~~ 又是一片好風景~~
在這裡小休一會, 去一去洗手間~~ 呢個中途站的公廁算新淨, 另外之後要行到去梅窩先有洗手間, 當然個個都去"幫襯"~
小休之後當然繼續行~~ 咦? 呢片"樹葉"似乎幾肥大喎......
呢棵樹上面仲有好多菇菇, 幾得意~~
其實呢塊"樹葉"係野生的楊桃~ 真係唔講唔知~~ 真係同啲真樹葉好似樣~~
附近仲有幾棵好高的香蕉樹~~ 好多未熟的香蕉~~
又看到一些梯田了~~~
又有幾隻水牛呀~~ 原來這些水牛會行來行去, 所以沿途一邊行, 都要小心, 唔好踩到"米田共"架~~
這裡應該是所謂"潮澗帶"的牛牯灣~~
行到半路, 又有一個不知名的沙灘~~ 風景又是很美~~ 不過其實一邊行的時候, 都留意到周圍其實有不少由潮水帶來的垃圾......要保護環境真係好唔容易......
這次行的山路, 最初都算平坦, 不過去到半路, 有不少上斜、落斜位, 難怪活動只適合大人參加~ 小朋友、有手推車或輪椅都不適合來哩...
雖然愈行愈累, 不過看到大嶼山的海岸風光, 都難得架~~~
又有段上斜路了~~
來到了一個山路交匯處~~ 原來仲有半小時就行到梅窩~~ 頭先我們行了2.5公里? 不過我們行了個幾小時有多, 應該不只2.5公里吧?...
這裡的最後導賞點要行少少路上山, 去到一個涼亭~~
原來高處看海真係幾靚~~ 這天天朗氣清, 連港島都幾乎見得好清楚~~ 另外可以看到喜靈洲~~
另外涼亭有櫈, 大家都可以坐在這裡輪流休息, 享受海風, 正~~
點都影低這個先~~
就是在這個山路交匯處, 沿去"貝澳"的路上山一會, 就見到涼亭了~~ 去完涼亭, 我們就行返落去, 再向梅窩進發~~
這個就是喜靈洲了~~ 都係第一次睇得咁清楚~~
最後這段路真係要步步小心, 很多都是泥路~ 而且不時又有越野單車經過, 所以都唔敢行太快~~
慢慢行, 終於行到梅窩了~~
老公話呢間中學其實荒廢了, 就係正生想搬入去但搬唔成......唔係老公講都唔知, 因為這間學校仲有個"天文台"在屋頂, 好似好新淨咁~~
很久沒有來過梅窩, 於是休息一會之後, 一齊行去銀礦灣看看~~
比起長洲或其他離島/新界地區, 幸好人不算好多, 感覺輕鬆悠閒, 難怪周圍都幾多外國人, 佢哋好識揀渡假/居住的地方~~ 當然情侶、一家大細也不少~~ 遠遠已經見到沙灘和有多年歷史的酒店~~
唔係天氣已經涼涼哋, 可能我們都會落去行吓, 掂吓水, 因為真係幾靚, 很有外國渡假的感覺~~ 可惜這天要趕船回中環, 不然真係想留耐啲~~~ 遲啲希望有機會可以再來~~
這次行山除了有免費來回船坐, 仲每人一個環保手機袋~~ 不過如果送個大啲的環保袋會更加開心~~
如果大家有興趣知道有關"新創建香港地貌行", 可以看看官網~ 今年已經是第7屆了:
============================================
感謝 helenhlblog 提供以上資料
helenhlblog的網誌: http://helenhlblog.blogspot.hk/
============================================
