探險家攻略 > 休閒玩樂 / 城中探秘 / 美食之旅 / 旅遊 > 主題公園 / 其他 / 特色景點 / 餐廳 / 長線旅遊 > 新山。龜喀漁村﹑Johor Premium Outlet

新山。龜喀漁村﹑Johor Premium Outlet

由平凡人於 2014-12-01 15:20:00 發表 | 累積瀏覽 1179

分類：主題公園其他長線旅遊餐廳特色景點；地區：其他

< 新加坡﹑馬來西亞8天遊 >

第三天（續）

離開Hello Kitty Town好快就去到附近既legoland，不過我地只係諗住去門口望望，今次唔會入去玩啦；首先去到legoland酒店，入去參觀一下先

好多人排隊check in

legoland酒店入面全部野都係同legoland有關，lego迷一定喜歡



legoland酒店旁邊就係真正legoland；到legoland前會經過一排商店&餐廳

前面就係真正legoland入口啦，影張相就要走人lu，哈哈


影完相就離開啦，搵地方午餐
legoland附近好荒蕪，想搵食有小小難度，所以我地就先返去新山市搵地方開餐；琴日我地食過印度早餐之後大家都話好食，今日大家都想再試多次，咁岩係路邊見到一間印度餐廳，所以立刻將車開到門口

嘩...好多咖喱丫，見到都流晒口水
係香港好少機會食到咁正宗既印度咖喱，今次可以食返夠本啦

好多炸雞

我既咖哩雞飯
印度咖哩真係好好味，只係用咖哩汁撈飯都可以食得一餐^^印度米同我地食開既好唔同，印度米係長條型，唔同我地平時食開一粒粒既米，口感都有唔同，食落口軟好多架

除左咖哩雞飯，仲叫左咖哩牛肉﹑咖哩魚等等唔同美食，印度餐都可以食得好豐富

午餐之後起程，大約個半鐘車程去到目的地Pulau Kukup（龜喀漁村）

天氣熱最好就係食雪糕，整返條榴槤雪條先


龜喀漁村呢道遊客唔多，我相信大部份人同我一樣聽都未聽過呢個地方，事關呢道好偏遠，坐車來真係好難架，如果唔係有朋友介紹，仲有朋友車我來既話我一定去唔到呢道；參觀漁村最好既方法就係坐船，又舒服又可以睇到漁村風景，呢個時間一個遊人都冇，船家見我地來就專程開船載我地八個人出海，每人只係RM5當係遊船河都抵啦



八個人就變成包船出海啦，哈哈^^有海風吹好舒服


龜喀漁村感覺同大澳有小小似，建築物都係建築係水上，由一枝枝長腳撐起

海上有好多漁排



我地可以上漁排參觀
呢道養左好多唔同海洋生物，魚蝦蟹咩都有；第一次上漁排特別開心，四圍睇四圍影



龜喀漁村對出有一個小島龜喀島，島上以紅樹林而聞名，而且龜喀島係馬來西亞其中一個國家公園

見到紅樹林啦


龜喀島上午開放比遊人參觀，可惜我地下午到就無緣上去，只可以遠觀

準備由漁排離開



坐船去漁村另一邊，都係有好多高腳屋



黃色呢座我估係天后廟


返到碼頭啦，碼頭呢道除左可以坐船遊覽，原來仲可以坐船去對岸既印尼，睇返地圖見到原來印尼只係一海之隔，由漁村呢道都可以望到過去



龜喀漁村有好多華人聚居，四圍都可以見到中文字，唔怕唔識睇

黃昏時間離開漁村開車返新山，路上見到一個榴槤園就入去睇睇，不過已經過左榴槤收成季節所以冇晒榴槤lu

返到新山時，見到路邊有好多生果，全部都又平又新鮮又靚，琴晚食左咁多榴槤要食返多啲山竹下下火先



返到酒店時天已經黑啦，周圍去想搵一間好出名既「順興肉骨茶」，來到馬來西亞唔試試正宗肉骨茶點得呢！可惜搵左好耐又問當地人始終都係搵唔到...咁都冇辦法啦......

唯有係酒店對面是但入一間食，呢間多左個「順」字！今朝大排檔老闆娘都話呢間肉骨茶唔好食，係冇其他選擇之下都要試下，希望佢有驚喜啦

個名又唔同左既？

可以選擇唔同配料放入肉骨茶

肉骨茶出場啦，我係第一次食肉骨茶架
以前有諗過肉骨茶係唔係飲既茶呢？咁當然唔係啦，肉骨茶係用肉用骨再加上中藥煲成既湯，當係餸菜又得當係湯飲都得，再加上油炸鬼點黎食就正啦！不過呢碗肉骨茶味道比較淡，朋友話唔夠正宗...

其它餸菜都ok，特別喜歡馬來西亞既芽菜，又肥又短好好食，香港好少將芽菜咁煮？

食完就係酒店樓下超級市場shopping，買啲馬來西亞特產返屋企，好多野都係香港冇得賣架！

買左好多山竹係房間慢慢食，多到食唔落，哈哈

今晚大家又出動去食榴槤，不過我食得太飽今晚暫時唔食住啦，睇大家食

繼續買貓山王&黑刺，不過大家都話今晚冇琴晚個啲咁好食，就算係同一個品種但唔同樹出產都會有分別



呢道食榴槤服務好好架，如果開到唔好食會換一個新既比你^^呢個小榴槤係老闆請我地食

陪大家食完榴槤就返去酒店訓教啦



第四天

上午一早執齊行李，早餐都未食就離開酒店去新山最後一個目的地Johor Premium Outlet，話明係Outlet當然有好多野賣啦



可能時間尚早，Outlet人影都唔多個


Outlet有間大餐廳，我地就係道舒舒服服開餐


今餐就食馬來西亞美食Nasi Lemak，即係椰漿飯，呢個香港好難食到


除左唔食啲魚仔，呢個飯好岩我食，個醬味道好特別架

呢罐香港冇得賣，但飲落唔太特別（比人呃左話好好飲）

呢道賣既都係名牌，冇野岩我架啦，哈哈



離開Outlet就北上向馬六甲出發，藍天白雲天氣好好


馬來西亞好多地方都有生果賣，五顏六色好靚丫

有啲生果好特別，右邊呢個長既生果好臭，味道比起榴槤更強烈，而且真係臭味個種臭，我都頂唔順丫，要行遠啲避開；唔知呢個生果好唔好食呢？我就唔敢試啦

繼續坐車向馬六甲出發；由新山到馬六甲大約需時兩個半鐘，好快就可以去到一個全新既地方啦，期待中！

鐘意SeeWide的分享，給我們一個Like吧！