8 Burgerman：

由山區麵包王於 2014-12-17 00:00:00 發表 | 累積瀏覽 1239

分類：餐廳；地區：大角咀

晌大角咀短短兩截埃華街，食店嘅選擇真喺好到不得了，車品品、神廚館、貴族甜品、韓淼莊、巴蜀麻辣米綫依啲較出名唔在講，仲有好多其他小店。今日走到嚟試嘅，都喺一間「小」店，指嘅喺鋪位窄長，大概得10-12個位左右嘅Burgerman。

咁細個鋪位，當然要裝修簡約啦，對住門口，左邊喺面壁位，右邊就幾張高腳枱，兩邊牆身都喺以紐約市為背景。由於鋪細，三幾批客就已經佔晒成間鋪，所以，亦見唔少客人喺買外賣拎走食。

取食物櫃位上方設置咗兩部大電視，不停顯示餐廳所提供嘅食物，唔想「頭岳岳」，枱上都備有餐牌，底面兩頁，由沙律、意粉、小食、飲品，以及各款漢堡包，以漢堡包店而言，實屬幾多元化。而所有漢堡所標示嘅價錢都喺套餐價，即喺已包薯條或沙律及罐裝汽水，由$55-$128，價位算喺中上，但另亦有幾款「廚師推介」，只喺$45套，可惜供應時間只晌晏晝2:30-5:30pm，仲要週六、日、假期暫停。

由於唔喺麥記咁快餐式，個個柯打都喺落單先做，所以，店方已溫馨提示大家，為保食物質素，全部都喺即叫即製，煩請耐心等候。

食咁巨型嘅漢堡包，當然會「嗱搞」少少，故此，餐廳都好貼心，晌枱上放置便利膠手套，咁就唔怕食到一手都喺，而且，搵手拎住食點都易好多。

燒菠蘿牛肉漢堡 $45

其中一款廚師推介，但緊記只限閒日下午茶時段先有供應。第一個先嚟熱身嘅漢堡唔想食得太重口味，想輕盈少少，所以，就先揀燒菠蘿牛肉漢堡一試。如想更輕盈，當中有一款全素漢堡：燒大菇漢堡，以烤大磨菇代替牛肉，並採用香草橄欖油。

燒菠蘿牛肉漢堡，我哋揀咗配沙律，務求輕盈中更清新。沙律喺常見嘅雜沙律菜、粟米粒、青瓜粒及車厘茄伴自家製蜜糖芥茉汁，清新開胃，甜蜜中滲出點點芥茉香。

個漢堡包睇怕都應該有6吋高，內餡有齊生菜、蕃茄、牛肉、芝士及燒菠蘿，切開跟朋友一人一半，都仲喺覺得佢好大嚿。黑白芝麻漢堡包稍微烘過，外脆內軟，而中間作為主角嘅漢堡牛肉好鬆化，好有肉味，至於大配角嘅燒菠蘿，個人就覺得如果能夠再燒耐啲，燒燶少少，唔單更香，收咗水嘅菠蘿肯定更甜，但點都好，有個菠蘿平衡一吓牛肉嘅油脂，的確少份「好漏」嘅感覺。

鵝肝漢堡 $128

成個餐牌，就以依個鵝肝漢堡喺店中最貴，既然被稱為高膽固醇嘅配搭，就一於邪惡到抵，配薯條，啱感覺、啱襯嘞啩！

薯條炸得金黃唔油，部份薯條仲帶少少連皮，枱中已備有茄醬及沙律醬，多數人會沾前者，其實蘸後者也不妨一試。而個包餡基本元素喺：生菜、蕃茄、牛肉、芝士，再加上一件香煎嘅鵝肝，另一特點喺再淋上無花果黑醋汁，頓時減去鵝肝嘅油膩感，仲散發出酸甜香味。鵝肝大件又厚身，絕無欺場底將貨就價，入口豐膩甘香，口感幼滑綿綿，好有入口即溶嘅感覺；再配合芝士、漢堡牛肉，真喺濃香豐富，故此，幾個朋友分嚐好啲。

Appletiser Sparking $16 & Snapple $25

套餐只配一般罐裝汽水，如可口可樂、雪碧、雀巢檸茶，其實，店中嘅飲品仲有其他選擇，如Snapple、Arizona（美國一隻綠茶品牌），以上喺散點價，不過，轉款補錢喺常識吧！

雖然秋冬進補，可能食吓靈芝、冬蟲草、花膠、鹿茸、人參、烏雞、海參……等等好嘢，小弟自問虛不受補，食個材料豐富，新鮮即製嘅漢堡，都好心足嘞。

個人評分
味道：8/10
環境：6/10
服務：7/10
抵食：7/10
平均每人消費：HK$0（試食邀請）

餐廳資料：
Burgerman
大角咀埃華街95-97號地下
2331 3973

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！