講起墨西哥，你會諗起乜？仙人掌?墨西哥闊邊帽？墨西哥包（當然依個有啲抽水）？小弟滿腦都喺一大埋86墨西哥世界杯嘅事情，馬勒當拿嘅上帝之手，巴西對法國嘅世紀之戰，仲有唔少典堂球星，如柏天尼、蘇古迪斯。墨西哥菜嘛，印象中未有一次喺真正嘅接觸，今晚，就走訪中環嘅「得哥先生」（Mr Taco Truck），一嚐正宗墨西哥菜。
得哥先生位處和安里街尾，雖然蘭桂坊、雲咸街喺酒吧街，一入夜就滿街喺人，然而屈咗入去嘅和安里就出奇地清靜，整條街亦比較幽間，所以，燈光通明嘅「得哥」晌街尾盡頭就特別顯眼。
一入店內，滿有墨西哥風情，充滿色彩好似披肩嘅墨西哥民族服，無咁大個頭但可以載咁大頂嘅闊邊帽，唔會拮親人嘅仙人掌擺設，當然，少不了墨西哥國旗啦，統統掛滿一室，有心思又別具氣氛，讓人感受到依個中美洲國家嘅熱情。
依份活力、熱情，延續到餐牌之上，餐牌嘅設計，無論封面、封底，抑或內頁，都喺紅紅、橙橙、綠綠，份外醒目；菜式以外，內頁仲有唔少有趣資訊，如餐廳經營背後嘅故事，墨西哥唔同地域嘅出產，都喺值得了解一下。
講到食，原來墨西哥菜都有咁多款式，而餐牌內裡大部份菜式都已經圖文並茂列出；類別方面，包括主菜、墨西哥夾餅、墨西哥芝士薄餅、墨西哥手卷、墨西哥焗芝士卷、墨西哥脆片、沙律、甜品及飲品等，此外，店方亦強調會堅持採用新鮮食材、無添加物、無防腐、無味精，又直接由墨西哥入口食材，務做到口味正宗。
各類食物嚟之先，仲要同得哥算一算「醬」，因為墨西哥菜嘅其中一個特色，就喺好鍾意做啲醬汁嚟配襯唔同嘅食物，所以，點完菜無耐就會奉上幾款自家製醬汁，分別喺炭燒莎莎醬（深啡）、綠莎莎醬（黃色）、紅莎莎醬（紅色），究竟用咩材料混成及配咩食物好，自己細閱一下餐牌就會明晒，所以，都唔晌度多講。
![bowl]()
至尊焗墨西哥脆片 $62（細） / $92（大）
得哥嘅菜式都可以揀選唔同嘅配料，就以依份大嘅墨西哥脆片，就有燒汁雞脾肉、烤豬肉、香汁豬柳、燒牛肉粒及素菜，再佐以莫薩里拉芝士、斑豆蓉、芝士、碎蕃茄洋蔥芫茜粒、酸忌廉、牛油果醬，已經成為一道味道豐富嘅前菜小食。
金黃嘅墨西哥脆片烤得好香脆，實在有好多配料，我哋配以烤豬肉，雖然烤豬肉有些微韌身，但不失香口，再者，加咗咁多配料，味道多變而有層次，加上色彩斑斕嘅賣相，又要趁熱食，所以，不消幾分鐘就「處理」掉。
![bowl]()
瑞士忌廉雞肉焗芝士卷 $72
焗芝士卷喺店方推介嘅菜式之一，據介紹亦喺晌墨西哥好普遍嘅食物之一，一共有3款選擇：綠莎莎醬、瑞士忌廉及紅莎莎醬，一客兩條，都喺賣$72。
瑞士忌廉雞肉焗芝士卷，以麵粉薄餅捲起雞肉，再先淋上忌廉蕃茄莎莎醬，然後加入莫薩里拉芝士烤焗。熱辣辣嘅卷皮煙韌有咬口，而雞肉軟軟滑滑，當然，個汁醬亦喺亮點之一，酸香中又有點芝士嘅濃香，美味！
![bowl]()
墨西哥七海湯 $198
第一次睇見依個湯覺得好搞鬼，即時聯想咗去啲咩健絡保健湯水之類，不過，只喺諗歪咗。由於墨西哥一邊喺墨西哥灣，另一邊喺太平洋，所以有不少海鮮出產，故此，一份七海湯就載得滿滿海鮮，有青口、大蝦、魷魚、蜆肉……等等。不占，打趣咁講，因為個湯加咗青紅蘿蔔，所以，睇落似叫青紅蘿蔔煲海鮮湯。
咪以為佢哋喺就咁飲個湯，仲會跟一大碟配料：牛油果、蕃茄、洋蔥、芫茜、青瓜、青檸、粟米片，咁食法真喺大開眼界。不過，最後變成餸料多過湯，感覺有啲似食緊湯渣咁，哈哈！
![bowl]()
慢煮燉牛肉 $148
成窩燉牛肉咁，色澤深沉，但上枱時確然香氣四溢，店員話個湯汁先喺依個菜式嘅靈魂所在。隨窩附上一碟墨西哥飯伴青檸、洋蔥、芫茜，食法喺將所有材料入加燉牛肉度，再唧下青檸汁便成。感覺就猶如食緊湯飯，而個「湯汁」真喺好濃香，簡直喺濃縮嘅牛肉精華液，只喺個人口感略嫌有啲啲鹹，至於慢煮嘅牛肉口感軟腍；雖然個湯頭極濃，但加入咗青檸、洋蔥、芫茜，有份平衡嘅作用，又令個味道富層次唔單一，此外，亦可改選麵粉薄餅或粟米薄餅伴食。
講完一大輪「食」，又講吓「飲」，奶茶、咖啡、汽水雖然有供應，應該唔及墨西哥洛神花茶、墨西哥肉桂米漿、墨西哥香濃朱古力等嚟得特別。
![bowl]()
墨西哥香濃朱古力 $25
朋友點了一杯凍嘅墨西哥香濃朱古力，不過，佢話香就香，但未有期望中咁濃郁。
![bowl]()
墨西哥肉桂米漿 $23
小弟就要咗杯熱嘅墨西哥肉桂米漿，味道可以話喺豆奶嘅一類，帶有幽幽玉桂味。
![bowl]()
鬆軟粟米糕 $48
最後，又喺甜品嘅時間，既然嚟食墨西哥嘢，就真喺要試一試佢嘅粟米糕，口感有啲似蛋批，好軟熟，不過，質感就挺身啲，而粟米味非常濃郁突出，清香不膩，糕面又烘成有些少焦香，真喺值得一試。
![bowl]()
墨西哥香蕉船 $48
一般常見嘅香蕉船都喺簡單香蕉加上雪糕球，不過，依隻「船」就好唔同，會產生冰火效果，因為香蕉刻意烤焗，倍感焦香，蕉肉更香甜，配上自家製香蕉雪糕，雖有少許冰粒感，但實在好有「蕉」氣，味道香甜，兩者同時放入口，真喺滋味在心頭，個人覺得可真百吃不厭。
雖然位處中環嘅一間小店，但定價真喺唔貴，而且份量都有番咁上下，味道嘛？既有特色，又好食，可真價廉物美，部份菜式更帶來驚喜，尤其兩款甜品都深得小弟心，聽講店中仲有一款自家製粟米雪糕，好人氣，可惜無緣未能撞見！
個人評分
味道：8/10
環境：7/10
服務：8/10
抵食：8/10
平均每人消費：HK$200
餐廳資料：
得哥先生 Mr Taco Truck
中環蘭桂坊和安里14-15號地下B鋪
2810 0888
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
