探險家攻略 > 美食之旅 / 旅遊 > 餐廳 / 長線旅遊 > 日本九州。拉麵﹑鐵道之旅 @ 2014 秋

日本九州。拉麵﹑鐵道之旅 @ 2014 秋

由平凡人於 2015-02-09 12:00:00 發表 | 累積瀏覽 789

分類：長線旅遊餐廳；地區：九州

攻略日期：2014-10-16

是次消費：每人平均約HK$ 3000.00

< 福岡﹑熊本﹑小倉﹑長崎5天遊 >

自八月星馬之旅後，本來都冇計劃咁快再去旅行，十月既時候，HK Express竟然賣特價機票，而且價錢係非常震撼既一蚊！冇睇錯真係一蚊丫！好多朋友見到咁既價錢都心郁郁，開始時我都冇特別留意，因為冇諗住去旅行ma，直到有一晚返到屋企咁岩見到當日賣緊福岡特價機票，我又手多多去check check，又比我見到真係有一蚊機票而且個段時間又得閒，咁我就問問屋企人有冇興趣去日本玩玩，媽媽本來都想去但後來又話唔去住（媽媽同妹妹之後都有去福岡，佢地玩既地方比我更正呢^^）；我諗左陣諗到十一點半，決定都係唔理咁多買左機票先算，再遲多半個鐘就夠鐘冇得買啦，最後就以超抵價兩蚊買左福岡來回機票，連稅先$558，平到唔敢想像！

由買機票到出發中間只有兩日時間準備，但我對九州﹑福岡等地係完全唔認識，之前從來冇諗過去呢道，連九州有咩地方都唔係太知，不過我相信日本係一個安全又易玩既好地方，就算我咩都唔準備就出發都唔會驚，只要搵到地方住就得啦，不過就係因為準備唔足夠所以今次行程有少少奇怪，而家諗返都覺得唔係咁好，不過算啦有得去玩就得啦

日本九州（福岡﹑熊本﹑小倉﹑長崎）5天行程：
Day 1：香港 - 福岡
Day 2：博多 - 熊本。阿蘇男孩號﹑阿蘇火山 - 博多
Day 3：博多 - 熊本。由布院之森﹑熊本城 - 博多。博多燈會（燈火觀照） - 小倉
Day 4：小倉 - 門司港 - 博多 - 長崎。平和公園﹑稻佐山夜景 - 博多
Day 5：福岡 - 香港
   博多住宿：International Hostel Khaosan Fukuoka,
   Guest House Nakaima
     小倉住宿：Fukuoka Guesthouse Little Asia Kokura

可能會覺得奇怪，點解有一日會去左小倉住？其實我都唔想架，我最想就係四日都住係博多咁就唔洗煩啦，可惜其中有一日book唔到岩既住宿，全博多甚至熊本既所有hostel都full晒，冇辦法之下唯有住到去小倉咁遠...後來先知道原來呢日博多﹑熊本都有大型活動，可能因為呢個原因太多人去而full晒...

上次去新加坡時發現相機出現問題，今次唔可以用佢啦，所以出發前要先去旺角揀相機！而家影相越來越懶咁就唔再用大機啦，都係DC仔岩我呢啲懶人，最後平平地買左呢部舊款相機，希望佢將來陪住我去多啲唔同地方啦

我對九州完全唔熟悉，買張上網卡就方便睇地圖啦，拜託朋友幫我係鴨寮街買左呢張富士卡，可以用七日有1.8GB數據用量，多到用唔晒；呢張卡價錢唔貴，鴨寮街賣$100咋！

係福岡機場check到速度唔算慢，用來whatsapp睇地圖好足夠
不過要留意呢張唔係4G卡，而且係大陸卡唔係香港卡，要考慮一下自己介唔介意啦；我係九州用覺得唔錯，行SoftBank網絡，未試過收唔到信號

出發前上網睇左一啲九州旅遊資訊，再麻煩妹妹幫我搵好住宿地方，可以出發！

16-10-2014

第一天

話咁快就到左出發大日子！今次係坐下午機，可以係屋企食完早餐先出發，不過食得慢，部巴士又行得慢，起飛前1小時25分鐘先去到check in，好少咁遲到機場！冇晒我最鐘意既窗口位！

機場咁靚點都要影返張

大部份人既指定動作，影呢個牌

冇得行登機橋，要坐接駁巴士上飛機

今次旅程所有行李就只係得呢個背囊咋；我發覺越去得多旅行就越帶得少野，以前去旅行可以將全個68L大背囊裝滿，而家拎少左好多無謂野，只係帶衫褲﹑差電器等等必須品，半個細背囊就裝得晒；都係少啲野輕便啲好，遲啲都唔知會唔會減到咩都唔拎只係帶本passport就出發，哈哈^^（唔咪「背包客」都冇得做，變成「香蕉人」...諗起都覺得有少少痴線，應該好難做到...）

上飛機啦

蝦餃


我覺得香港快運既座位ok闊，坐得好舒服，呢部機左邊中後排位置比右邊更闊（右邊有廁所係後面頂住所以座位距離比較少）

襯旁邊兩位乘客行開左望下出面先

三個半鐘機程，日本時間大約六點鐘完成所有入境程序；福岡機場好細，落機一行出來就已經係入境櫃位，好快好順利過完關出到來

接機大堂好細

如果要坐地鐵離開機場比較麻煩，要先係國際線客運大樓坐穿梭巴士到國內線客運大樓，係個邊先有地鐵；好多人都會用呢個方法，坐呢部穿梭巴士再轉地鐵出市中心

日本的士咁貴唔多人搭

福岡機場位於市區，就好比以前啟德機場一樣，所以行出去都得架；我住既地方距離機場唔太遠，如果坐穿梭巴士轉地鐵相信比行路更加慢，所以我就唔坐車自己行出機場



我諗冇咩人會得閒到行出機場，全條路除左一個日本人之外就冇其他人


行去hostel既時間天已經黑晒，日本比較早天黑

用左34分鐘，成功去到今日住既地方「International Hostel Khaosan Fukuoka」

見到自己張床攤返一陣先
開門入房時勁尷尬，一打開門見到有個女仔係入面我仲以為入錯房即刻關門，但望到房號冇錯，而且條鎖匙又真係開到門，所以都係入返去，哈哈

休息左一陣，出發去食拉麵啦，博多拉麵之旅正式開始
日本第一餐竟然唔係自己一個食，同房既韓國女仔話未食飯想同我一齊食！OH MY GOD！咁就變成兩個人一齊出去食啦！不過唔知點解呢個韓國女仔講英文講得好似韓文，開頭我仲以為佢同我講韓文tim！雖然溝通有少少困難，不過咁又幾得意

Hostel呢頭比較靜，行出去博多站會旺好多，咁一於向博多站出發；來呢道之前覺得有啲奇怪，點解機場叫福岡但火車站又叫博多？而家先知原來呢道古時係叫博多，後來因為同其他地方合併改為叫福岡，而家博多區就係福岡市之下其中一個分區；不過好多人都係鐘意博多呢個名，最少我地成日都聽到最出名既拉麵係博多拉麵而唔係福岡拉麵

行左大約15分鐘來到博多站旁邊，發現有條食街，咁就岩晒啦睇下有冇拉麵食先

成條街得一間拉麵鋪，揀都唔洗揀就佢啦！博多話晒係拉麵聖地第一餐點可以冇拉麵呢，我話過要日日食拉麵！

呢間鋪頭細細間裝修比較簡單，但又有唔少人幫襯，咁地道唔會中伏掛？諗起上次係大阪入到一間拉麵鋪入面全部都係香港人，碗麵難食到...我好肯定呢道所有都係日本人應該冇伏既；話時話九州應該唔算係香港人旅遊熱點，除左係機場同阿蘇之外都冇點遇到香港人，相反係大阪心齋橋香港人比例我覺得仲高過西洋菜街！

拉麵啊！拉麵啊！拉麵啊！終於有拉麵食啦！要食到「雪﹑雪」聲！
睇上去拉麵賣相好似普通左少少，不過好好食囉，湯底又正塊肉又正麵又正！都唔知點解人地一碗普通拉麵都可以整得好好食，香港個啲差咁遠架！

日本商場好早關門，食完都已經冇得行啦；之後先知道博多站另一邊有條地下食街，多好多好野食架！

如果唔係有韓國女仔一齊我諗我會出去四圍行下先返，不過冇理由掉低人地自己走左去既...所以都係返去lu

返到黎啦！唔知點解呢道reception職員係美國人（估下咋），唔識日文都唔怕

Hostel地下有睡房﹑廁所等等設施，環境乾淨企理，我覺得咁平既價錢好抵住；我去個時四人房價錢係$166一晚，而家Yen跌左咁多更平都唔定（當時Yen係¥100=$7.2，返來之後好快就跌到六點幾）

我住既房間係二樓，要除鞋先可以上去


上面一樣有廁所等等設施

又返到自己張床啦


九點就返到來，真係好早！見有時間就上網搵定明天既資料，最重要係睇定邊道有拉麵食！夜少少有位德國人入來（佢又型又高大又靚仔），房間多一位住客啦；德國人由東京﹑大阪一路向南玩到福岡，行程咁豐富真令人羨慕，如果我有咁多錢咁多時間慢慢玩就好...好彩東京大阪都叫做去過，言談間冇令香港人失霸氣^^今晚冇咩特別，沖完涼後全晚就係房間入面渡過，明天先係旅程真正開始，好好訓一教，訓醒後出發！