【糯米情人】執著的溫香糯米堡 @ Sticky House的「C奶」

我家附近的柏樹街, 老店林立, 最近, 忽然多了一間感覺有點似Mos Burger的光鮮小店出現.

不過這並非漢堡包專門店, 而是4位溫州年青人, 經香港溫州同鄉會而認識, 去年暑假泛起創業念頭, 共同經營, 賣家鄉情懷小食~專賣糯米飯.

全店主力賣4款糯米產品, 對應大門口的「對一碗糯米飯的執著」標語. (唔知係米每一樣食物代表一個老闆呢?)

廚房由Alan話事, 一走入店內, 賣相最最最吸引我的便是「溫香糯米堡」, 怕怕羞的Alan回應:「因為係即整嘅, 大約要等5分鐘...」無問題, 最開心當然Alan答應給我拍攝製作過程.

「梅菜豬肉扒」放在糯米飯內加熱約2分鐘, 同時Alan便一面盛糯米飯, 一面說:「我哋啲梅菜係浙江運嚟, 比香港嘅乾身啲, 感覺同味道都有啲唔同」(乾同濕...煮出嚟我唔知食唔食得出喎...)

之後Alan就將糯米飯, 連同梅菜豬肉扒, 用上牛油煎成微微輕脆...(我企係隔離都聞到好鬼香~)

手勢熟練的Alan, 本來準備為糯米飯, 及豬肉扒「掃豉油」, 我提出個人愛偏淡口味, 所以今次選擇了「減色」特別版, Alan:「不過, 之前有客人就嫌淡囉...」(我唔怕, 因為我性格偏鹹, 但口味愛淡嘅~)

(你由細到大都好鍾意煮嘢食架?) Alan一邊加生菜, 蕃茄又說:「係呀! 我好鍾意研究, 開舖前, 我又專登返番鄉下學多一個先返嚟囉」(一個月就學識~幾勁喎!)

嘩!!中式糯米梅菜豬肉堡出場啦... 中西合壁的配搭, 梅菜香再加入牛油煎過的味道, 整個包熱辣辣, 似粢飯的糯米飯, 外表輕脆, 入面還是煙煙韌韌...

Alan話:「溫州糯米飯蒸熟後, 會再加入湯汁, 同香港啲唔同...」係呀.. 好食不「頂胃」,(最起碼我食完一啲胃痛都無), 只是份量少了一點, 食完還覺得未夠喉! (Alan下次個包可唔可以加大架?)

同場有客人建議:「個包係好食, 但E個舊區, 老人家多, 佢哋點會同你食糯米包吖, 搬去旺角你唔止賣$28啦, $58都得...」(E區係多老人家, 難怪Alan話最多人買都係傳統糯米飯...不過, 搬去旺角舖租唔止兩倍呢...)

今日阿太就是點了合適她年紀的傳統(鹹)糯米飯...(Hehe), 本來Alan推介配韓個泡菜, 但我們還是偏愛日式的納豆.

糯米飯混入菇菇絲, 肉碎, 而最特別算是切至碎粒的油炸鬼, 乾乾脆脆的感覺, 與綿綿的糯米軟軟硬硬, 又幾得意.

不過, 雖然我年紀大, 但還是愛驚喜, 太傳統太正經, 好食但不太令仁留下印象.

反而又是由Alan想出來的鬼主意, 糯米小飯糰過癮得多. 迷你糯米磁混上雞蛋, 細細粒但充滿臘味, 臘腸, 及潤腸, 一口一粒, 無得輸! 如果可以灑少少沙糖效果更正!!

Alan是溫州人, 親人一年才於家鄉見一次. 當年隻身來港讀大學, 之後又到東京留學兩年, 不過還是愛香港的感覺, 「當年讀書日日經過太子, E家又住係附近, 我覺得太子太親切, 所以就係附近揀舖頭」

負責宣傳的拍檔Leo今日馬不停蹄, 在太子附近大派傳單, 年輕人一股作氣, 因為他們揚言盡快達到下一個目標~開分店。(好!!希望快快見到第二間, 第三間Sticky House)

「賢惠滴老娘客」?? 本來印了四款制服, 一個老闆設計一句, Alan話:「我個句係溫洲話, 即係﹝持家嘅C奶﹞」, 他自言把守廚房, 「仲唔係持家嘅男C奶??」

(你每日9點準備材料, 一直做到夜晚10點先收得舖, 唔止C奶, 簡直係鐵人添啦!!)

我問:「咁忙!!女朋友無投訴咩?」Alan直言:「無呀!!...我雖然忙, 但我都畀時間陪佢架, 睇你鍾唔鍾意見佢啫, 我哋一早講好咗, 我一有時間就一定陪佢架」(朱先生...駛唔駛咁冧呀?? 太子糯米情人當之無愧)

Sticky House

味道: ★★★★

環境: ★★★★

服務: ★★★★

抵食: ★★★★

推介度: ★★★★★