15 MARCH 2015(SUN)
今日大肥豬又嚟俾啲驚喜節目我地，就係失驚冇神帶我地去郊遊啦~其實大肥豬係想帶我地去清水灣郊野公園玩呀！
原本清水灣郊野公園係有停車場提供，不過大肥豬今次將車泊左係山下嘅停車場，要我地一齊齊行去目的地。
佢話行山對身體好啲，又可以等小小豬感受一下行山樂趣。雖然行上山目的地又真係幾辛苦(對我嚟講)，不過行下又真係幾舒服，邊行邊休息咁又真係唔錯呀！
行左大約二十分鐘，我地終於嚟到啦~
一嚟到小小豬都已經非常開心，因為知道就嚟有得玩啦~
終於嚟到我地嘅郊遊目的地啦~
去搵個靚位做基地先~
安置好就當然準備玩啦，依套拋圈圈玩具係小小豬自己話要帶上嚟玩呀~
之後佢地兩父子就係度玩飛碟~
玩左一輪當然又到左小小豬最鐘意環節，就係去野餐食嘢啦~
由於都係大肥豬嘅即慶活動，所以都嚟唔切整啲小食嚟野餐，所以都係超級市場買少少食物。雖然係簡單左少少，不過小小豬都一樣咁興奮呀(緊係啦...有得食嘛)~
哈哈哈...邊食邊玩，個天雖然都唔係好算太好，不過勝在唔熱又有少少涼風，整個環境都好好，所以真係好舒服呀~
食飽飽又嚟玩過，今次就係佢地兩父子玩風箏呀~
兩父子玩認真哦，佢地好努力咁希望可以放到隻風箏上天空。睇見佢地兩父子失敗又再嚟過，又話要去搵個靚位去放，坐係一旁嘅我都睇得幾好笑呀~
終於....都係放唔到上天，可能係我地個位置風向唔啱啦！不過依個唔放棄嘅爸爸就繼續好努力咁嘗試~
小小豬就已經俾我嘅泡泡吸引到，陪我拍泡泡啦~
我地玩到五點幾先走，係走嘅時候大肥豬又嚟同小小豬上戶外學習課，教小小豬欣賞下四周圍嘅樹木又花草，又教小小豬睇遠處嘅海岸，佢地兩父子睇睇講講又可以企左半個鐘。不過，戶外學習都係好重要，所以等下佢地兩父子我都係非常樂意~
玩下休息下又再繼續玩，悠悠閒閒咁又過左一個下午。走嘅時候小小豬都係十萬個不願意，仲即刻提意下星期再嚟過野餐，真係俾依個攪笑豬笑C呀！
不過輕輕鬆鬆咁郊遊我都幾鐘意，所以趁天氣未太熱又好好天嘅時候可以考慮再嚟多幾次，等我地感受下大自然都係一個唔錯嘅親子活動呀！
其他博客區
※※ SINA ※※
※※ MyBB星級Blogger ※※
※※ She.com ※※
※※ WeShare ※※
※※ theZtyle ※※
※※ U-Blog ※※
※※ SeeWide ※※
※※ BlogSpot ※※
※※ BK Milk 親子語 ※
