0

【一檔一個夢想】Dream Catcher 堅持心中理想 @ MON型市集

大仁生活 於 2015-04-19 03:48:49 發表  |  累積瀏覽 586

分類:手工藝 ;地區:觀塘

攻略日期:2015-04-18


觀塘周未有市集, 我當然要去八八逛逛!! 今日在鱷魚恤旁的工業大廈舉行, 一步出電梯, 感覺今次「Mon」型市集...出奇的比較文靜嘅...



一進場我即時被「勾focus」的店名, 及十足野餐情景的設計好特別, 檔主Emma: 「我第一次擺檔, 所以用咗3個星期預備產品同佈置」...



早前辭掉正職的Emma, 正式當上全職手作人只是數個月, 「暫時興趣玩吓, 創作條路唔易行, 所以之後應該都會搵返份工, 但一定要唔好咁辛苦, 因為我想有多啲時間做我想做嘅創作」 (我都想搵份多啲時間寫文的工作就好!)



本來也有進行皮革創作的Emma, 但因為覺得勾冷, 勾線比較簡單, 她說:「材料好簡單, 只係一條線, 一個勾, 加多把鉸剪就得, 做皮難好多...」



(最初妳點會學到勾冷嘅?) Emma一邊勾線一邊答我:「嘩!好耐好耐之前啦喎...中學時代有個朋友教我基本功, 之後自己再上網學, 愈做就愈覺得好玩囉」(唔記得問中學時代即係幾多年前添...:)



(大鄉里的我...妳哋係度勾緊啲乜嘢呀??) Emma的朋友Germam答:「Dream Catcher...(更加抓頭??)「繼承者們」呀, 好HIT架喎套韓劇, 李敏镐喎?? (陳豪我就識) 咁你要識下啦...」(真係要喇...忽然覺得自己好OUT)



本來是掛在床頭, 可以幫人捕捉好夢的Dream Catcher, Emma製作時反而相信「有夢想, 就用E個Dream Catcher用來提醒自己, 一定要捉住唔好放棄」(真係好有意思...) 



原來勾一隻雞蛋只須15分鐘, 不過奇異果因為背後收線問題, 所以要長達45分鐘才能完成.



Dream Catcher是Emma近期最滿意作品, 看到辭工後每一言一語都表現自信, 又無壓力的她...我想信Emma一定已經夢想成真吧!


勾focus_focus crochet




Janet從事押花差不多一年時間, 最初只製作透明系列的飾物, 之後再發展字母, 最近才想出手機殼. (iPhone定三叔殼好賣啲?)「梗係iPhone多人買啲」



押花步驟要先將花押平, 再將平面的花放入手機殼, 或是吊飾內...「花莖被剪開後, 花頭易散開嘅花種比較難處理, 例如玫瑰, 飛燕草, 菊花, 一般大朵又厚, 所以落膠就要分兩日落, 過程比較其他花麻煩」



制作一件押花產品, 平須時15分鐘, Janet解釋:「一般會係一批製作, 先為所有乾花擺好位置, 於是就落膠, 因為開咗嘅膠好快就會變硬變乾, 所以每次做20個, 大約就要3個鐘頭左右.」




(英文字母邊幾個最多人買呢?)「B」, 「S」,「U」Janet:「我都唔知呀...可能B字頭英文名多啲掛...」(我以為多人叫BB咋)



Janet與拍檔Bibi也夢想開設一間屬於自己的實體鋪, 或工作室, 到時就可以更加擴大作品的層...(其實妳哋E家都有教班啦...夢想都實現了一半)Bibi: 「家陣工作坊係我屋企咋...」(哦!! 租咗Workshop 記得第一時間通知我呀!!)




Oone_n_Only Handmade




Ginny 的手繪插畫店只運作了一個月, 最初由繪製心意卡開始, 我問:「之前有啲咩事最難忘呢?.」 她想也不用想:「早前同朋友一齊去過倫敦, 巴黎, 阿姆斯特丹, 柏林賣藝一個月, 我就畫卡, 有朋友就表演定鏡, 音樂...  」(年青真好...)



「好多人走埋嚟同我講加油, 叫我唔好放棄, 外國人好熱情, 令我好感動, 之後我就好似諗通咗啲啲, 不單止只畫卡片, 就開始畫明信片, 畫薄, 畫木戒指」




 (堅持, 夢想真係好正, 我忽然都好被Ginny擦出一團火, 老仁都要努力追夢先得....)



Ginny亦有一個夢想, 就是希望可以成為一位令人開心的藝術治療師.(很有抱負, 而我夢想就羞家...我只係想唔駛做, 每日齋吃喝玩樂...相形見絀)



「邊個發明了返工」簡直一矢中的, 我每日起床就是說這句說話, Ginny 笑言:「我諗應該係好多人嘅心聲啦!!」



同香港有密切關係的明信片, Ginny:「人人都孭住一層樓, 香港人壓力好大...」未來Ginny又打算向台灣出發再賣藝, 希望妳未來會更加成功. 大家一齊堅持‧夢想, 加油.


Some2cards 手繪插畫雜貨



因為自己對一般金屬首飾敏感, 唯獨純銀則沒有影響, 於是Kendy便開始慢慢鑽研手造純銀創作.



學了一年便全職創作人的Kendy, 原來每一件產品也要經工場生產, 「我要先係屋企造出蠟版, 再攞去工場翻印出銀器架」(我以為係屋企扭吓扭吓就得添)



(點解妳做純銀...但會有一隻馬嘅?) Kendy笑笑口:「E隻驢嚟架...(又魚多一次!!)西班牙話叫Pinata, 係墨西哥傳統, 係生日會掛一隻約2呎長的Pinata, 裡頭塞滿玩具, 糖果, 好到高潮位就會打爛佢, 咁小朋友就好開心去執嘢食, 執嘢玩...」



(聽過..聽過...上次十二道鋒味見過呀...謝霆鋒帶阿Sa去打爛嗰隻嘢吖麻...哈哈..終於都搭到嘴...不過Kendy佢哋無睇過十二道鋒味呢!!)



因為線條簡單, 所以Kendy第一次製作的就是這個「對話雲」:「因為工場都會嫌我生意細奀, 所以當時我要分開咗6日去工場造先完成...」



為何Kendy會如此熟悉墨西哥文化呢? 原來她是墨西哥出世, (吓?你廣東話咁流利嘅?):「因為我爸爸媽媽係墨西哥攪餐館, 而我3歲時佢哋又無做, 所以就帶埋我返番嚟香港囉...」 Kendy還會不時回墨西哥探親, 所以總覺得她的銀器與別不同, 隱約帶點拉丁, 帶點仙人掌般的獨立...



Kendy自覺當上全職純銀創作, 已經算是實現了夢想的第一步, 未來希望可以得到更加分享她的成品, 更多人留意到她這個小開始...(滿足可以令自己非常喜悅! 恭喜)


Piñata silversmith workshop




MON型市集:

日期: 2015年4月18日 - 19日 12nn -7 pm

地址: 觀塘開源道77號業發工業大廈一期14樓 



大仁生活facebook
http://dayanlife.blogspot.hk/2015/04/dream-catcher-mon.html


鐘意SeeWide的分享,給我們一個Like吧!
  • 攻略日期:2015-04-18
    攻略地點:觀塘
  • 攻略時間:1-3小時
    是次消費:N/A
0人比"掂"

最多能輸入300字

累積瀏覽 1050551

全部攻略 890

全部回應 2289